O jmuxkꞹji a Paddington, kja na jñijñi ke mi ka̱ra̱ na punkjꞹ ntee a Londres (Inglaterra). Mi bʼꞹnkʼønu ko i nana ñe jñii in kju̱juegø ke mi otrʼꞹji. Mi tatagø me mi ti̱ʼi̱ ngekʼua mi bʼꞹbʼꞹ paa ke dya mi bʼꞹbʼꞹ ko nutsʼkøjme.

Ma mi tsʼixutʼigø mi nana o jitsi ro øtꞹgø e Diosi ma xomꞹ. Mi  tjegø na Tsʼijñakjimi nu ja ma e̱trjo yo salmo, i mi kjatsʼɇgø kʼo tjo̱jo̱. Dʼa nu paa ro xørꞹgø na jñaa kja na skuama ke me ro kentrjokʼua, mi mama: “Ra sⱥjⱥ na paa ma dya kja pje søø ri tsjaa”. Me mi mbʼentjogø ne jñaa ma xomꞹ. Mi øntsʼɇgø: “¿Pje ra kjogꞹ a ma xojñi? ¿Pje ri kjagøba?”. ¡Dya mi nee ro tu̱gø!

Mi ne ro pa̱rgø kjo mi nge yo sɇrø nangeje mi nee ro jñagø ko kʼo a bi ndu̱u̱, jesta mi pøjme kja kʼo kaposanto ko kʼo mi jogøjme, xo mi jandajme pelicula ke mi pedye yo sɇrø, zø me mi su̱gøjme mi nee ro jandajmeyo.

Ma kja mi ɇdyigø 10 kjɇɇ ro pjꞹrꞹ ro sʼꞹtrʼꞹ tju̱sʼꞹ ñe marihuana. Ma ro søtʼꞹ 11 kjɇɇ ro pjꞹrꞹ ro sii pare, zø dya mi gustazꞹ, mi kjakʼꞹ ke ro søgø na joo ma mi ti̱gø. Me mi gustazꞹ yo bʼizhi, ma xomꞹ ma in bedyigigø a ma i̱ji̱ mi penkʼø, nakʼua mi pagø kja kʼo diskoteka, mi nzhogꞹ ma a ro jyasʼꞹ. Ngekʼua ma mi sⱥjⱥ nu hora ke ro magø kja colegio, dya mi nee ro magø nange dya bʼe mi soyagø na joo. Ma mi pagø, mi sigø pare kja yo salón ma mi pjꞹrꞹ kʼo clase.

Ma ro kjuargø nu escuela, dya ro pjongꞹgø na joo calificación. In nanagø dya mi pa̱ra̱ kʼo mi kjagø, ngekʼua ma o mba̱ra̱ o zangꞹ ñe ro chju̱bʼe, ngekʼua ro pedyegø kja in nzꞹngø. Nakʼua ro ma minkʼø ko in noviogø e Toni, angeze mi nge na rastafari, angeze mi kjaa kʼo na sʼoo. Mi ponꞹ, mi pøø droga ñe me mi chu̱ʼu̱ ko yo ntee. Ma kja mi e̱nkʼø 16  kjɇɇ ro jmusʼꞹ na lele.

Ro pa̱rgø kjo mi nge yo testigo e Jehová ma ro minkʼø kja na albergue ja mi pjosʼꞹji yo xuntrʼi ke mi jñʼeji chʼi i dya mi jñʼeji xira. Kʼo testigo mi paa xøpꞹjinu janzi xuntrʼi kʼo mama ne Biblia. Na paa ro nee ro ⱥrgø kʼo mi manji, nangeje mi nee ro xikø ke dya ma kjuana kʼo mi manji. Angezebi bo ndꞹrꞹbi ko ne Biblia texe kʼo trʼønꞹ yo ro kjapꞹbi. Mi ñetsʼe ke me ma jontebi, ngekʼua xi ro negø ke ro jitsʼibi kʼo mama ne Biblia.

Dya go mezhe ma ro pa̱rgø kʼo mama ne Jñakjimi ke me gø mbøxkꞹ. Ma mi ts’ixutr’igø mi su̱gø ro tu̱gø, ngekʼua ma ro pa̱rgø kʼo mama ne Biblia ke e Jesús ra tsjapꞹ ke ra yepe ra nangaji yo ya ndu̱u̱, dya kja ro su̱gø (Juan 5:28, 29). Xo ro pa̱ra̱ ke e Mizhokjimi me mbenzeji (1 Pedro 5:7). Kʼo ju̱sʼꞹ kja Jeremías 29:11 me go zⱥtrʼⱥ kja in mꞹbʼꞹgø, nujnu mama: “A ro nugø na joo ja rga mbøxkꞹji ra kjagø kʼo na joo, dya ra kjakʼꞹji kʼo na sʼoo, me na joo rgi bʼꞹnji, dya kjaa ra bʼꞹbʼꞹ ndumꞹ yo i kjogꞹjidya, nange ri pa̱rgø yo ra kjagø ama xojñi —eñe e Jehová—”. Me go mbøxkꞹgø ne jñaa ke søø ra minkʼø texe yo paa kja ne xoñijomꞹ (Salmo 37:29).

Ma ro magø kja yo jmurkjimi ko yo testigo e Jehová, ro janda ke me ma jonteji, me ma joo ma søgø, me mi nee ro bʼꞹnkʼø ko angezeji (Juan 13:34, 35). ¡Dya mi chjenjui ma mi pagø kja nitsjimi! Yo testigo e Jehová dya  pje mi xitsi ja ma ngegø. Me  go mbøxkꞹgøji na punkjꞹ, me mi sʼiyazꞹji. Mi søgø ke a mi nge in bʼɇdyi.

Ma mazi ro pjechigø kʼo mama ne Biblia ro unꞹ nguenda ke mi jyongꞹ ro minkʼø ja ga nee e Mizhokjimi. Me ro søgø ke ma sʼɇzhi ro jɇzgø ro sʼꞹtrʼꞹ trju̱sʼꞹ. Ro unꞹ nguenda ke bʼꞹbʼꞹ yo bʼizhi ke ma mi ⱥrgø mi kjakꞹ ke ro nee ro sʼꞹtrʼꞹgø marihuana, ngekʼua ro potʼꞹgø kʼo bʼizhi ke mi ⱥrgø. Xo ro jɇzi ro maa kja yo mbaxua ñe kja yo diskoteka jango mi bʼꞹbʼꞹ yo ntrʼee ke mi siji droga ñe mi ti̱ji̱. Ro jodʼꞹ kʼo jobi ke kjaji kʼo nee e Diosi, ngekʼua ro mbøxkꞹji xo ro kjagø kʼo nee e Mizhokjimi (Proverbios 13:20).

Kʼo pakʼo e Tony xo bo mbꞹrꞹ go xørꞹ ne Biblia ko yo testigo e Jehová, o unꞹ nguenrra ke kʼo mama ne Jñakjimi na kjuana i go nrrꞹrꞹ yo trʼønꞹ ke mi pɇsi angeze. O jyɇzi kʼo na sʼoo kʼo mi kjaa, dya kja go chu̱ʼu̱, dya kja bo ponꞹ ñe dya kja go sʼꞹtrʼꞹ marihuana. Ro unꞹbʼe nguenrra ke ma mi nee ro kjabʼe kʼo nee e Jehová, mi jyodʼꞹ ro chjutꞹbʼe ja ga mama yo gobierno, akjanꞹ ro mimibʼe na joo kʼo in chʼibʼe, ngekʼua ro unꞹbʼe texe kʼo mi jyodʼꞹ. Kja kʼe kjɇɇ 1982 ro chjꞹntꞹbʼe.

Mi mbenkʼø ke mi jodʼꞹgø yo experiencia yo ba e̱je̱ kja yo skuama La Atalaya ñe ¡Despertad! a Mi xørgø ke mi bʼꞹbʼꞹ kjuarma ñe kju̱u̱ ke xo bo kjogꞹji yo nrrumꞹ nzakjazgø, kʼo go tsjaji me gø mbøxkꞹgø ngekʼua dya ro jɇzgø e Jehová. Nudyakʼua e Tony ñezgø, go juinkʼibʼe kja nrreje kja kʼe kjɇɇ  1982, nu zana julio.

Kʼꞹ ro jogobʼe e Jehová o mbøxkꞹgø ke dya ro tu̱gø. E Tony ñezgø ri unꞹbʼe nguenrra ke e Jehová me pjøxkꞹbʼe ma ri kjogꞹbʼe ndumꞹ, ro pa̱ra̱bʼe ke ma ri e̱chʼeji kja in mꞹbʼꞹji e Jehová dya ra jyɇzgijme.Ngekʼua ro søgøbʼe ke e Jehová go mbøxkꞹbʼe ra pjørꞹbʼe na joo in bʼɇdyi (Salmo 55:22).

Me ri mⱥkjøbʼe ke ro søø ro jichibʼe in chʼibʼe ñe in xutrʼibʼe ro joji ko e Jehová. Ñedya,  xo ri mⱥkjøbʼe ke in bʼechʼibʼe xo na pa̱ra̱ji e Jehová.

A ri i̱kjø na jodya, dya kja ri su̱gø ke ra tu̱gø ñe dya kja ri søxigø kʼo ra kjogꞹ a ma xojñi. E Tony ñezgø ri kjijñibʼe yo jmurkjimi ngoma ngoma ngekʼua ra pjøsʼꞹbʼe yo kjuarma ñe yo kju̱u̱, ri  paa jichijme yo ntee ke ma ra ñe̱chʼeji kja o mꞹbʼꞹ e Jehová ra minji texe yo paa kja ne dʼadyo xoñijomꞹ.