A Estados Unidos bo dyønꞹji janzi trʼii ñe xuntrʼi kjo mi kjaji oración, akjanu bo unꞹji nguenda ke ma mi ngeji 10 trʼii maxke xuntrʼi, mi ngeji 8 kʼo kjaji oración, pe mi ngextrjo 4 kʼo øtꞹji Mizhokjimi pama pama. Ngekʼua bʼꞹma gi nee ri pa̱rge: “¿Søø ra mbøxkꞹji ma ra kjaji oración? ¿Kjo pjoxkꞹtjoji ra søji na joo kja i mꞹbʼꞹ?”.

•  ¿Pje ngeje nu oración?

•  ¿Na kjuana ga dyⱥtkⱥ Mizhokjimi?

•  ¿Pje søø ra xipji e Mizhokjimi?

•  Nu kʼo manji yo dyaja trʼii ñe yo xuntrʼi

 Ma ri kjaji oración ri zopjꞹji e Jehová, kʼꞹ bo nda jyokꞹ texe yo kjaa ajensʼe ñe kja ne xoñijomꞹ. ¡Tsjijñi pje nee ra mamayo!: angeze me na zɇzhi, zø nge akjanu, “dya je̱e̱ bʼꞹbʼꞹ Mizhokjimi ko nuzgøji ri nteji” (Hechos 17:27). Ne Biblia xitsiji pje nge kʼo nee e Tsʼitajensʼe ke ra kjaji: “Chɇzhgeji a jmii Mizhokjimi; angeze xo ra chɇzhi in jmigeji”​(Santiago 4:8).

 ¿Pje søø ri tsjage ngekʼua ri chɇzhi a jmii Mizhokjimi?

•   Tsjage oración.​ Ngeje akjanu ke søø ri zopjꞹ e Tsʼitajensʼe.

•   Xorꞹ ne Biblia.​ E Mizhokjimi “zokʼꞹ” akjanu.

 Søø ri zopjꞹ e Mizhokjimi ñe søø ri dyⱥrⱥ angeze ma ri tsjaa oración ñe ma ri xorꞹ ne Biblia, nujyo ra mbøxkʼꞹ ri chɇzhi a jmii e Mizhokjimi.

 “Me na joo ke søø ra ñagøji ko e Tsʼitajensʼe, ke søø ra zopjꞹji kʼꞹ bo dyⱥtrʼⱥ nrrexe, ngeje kʼꞹ xe nda na mubi ke ra peskʼøji yo ntee” (Jeremy).

 “Ma ri xipji e Jehová texe ja ga søø a mboo kja i mꞹbʼꞹ, nujyo me kjakꞹ ra søø ke ri chɇzhi ko angeze” (Miranda).

 Bʼꞹma nutskʼe gi kreoge na kjuana bʼꞹbʼꞹ e Tsʼitajensʼe​—bʼꞹma xo gi kjage oración​—pe bʼꞹma xo gi ønꞹtsjɇ mꞹ na kjuana ga dyⱥtkʼa angeze ma gi øtꞹ. Pe, nu Biblia mama ke e Jehová ngeje kʼꞹ “ⱥrⱥ yo oración” (Salmo 65:2). Angeze xo nee ke ri xipji texe kʼo i mbeñege. ¿Pjenga? “Nange angeze me mbentsꞌeji ga mbøʼkʼꞹji” (1 Pedro 5:7).

 Tsjijñiyo: ¿Gi jodʼꞹ ndajme ngekʼua ri potka ñage yo gi jogeji? Xo søø ri tsjage akjanu ko e Mizhokjimi. Zopjꞹ angeze pama pama, ma ri zopjꞹ, nⱥmbʼⱥ nu tju̱u̱, Jehová (Salmo 86:​5-7; 88:9). Ne Biblia xo xitsʼi ke dya ri jyɇzi rgi dyøtꞹ Mizhokjimi (1 Tesalonicenses 5:​17).

 “Ma ri zopjꞹgø Mizhokjimi ri søgø ke ri pøtka ñagø ko in Jyogø kʼꞹ bʼꞹbʼꞹ ajensʼe, nge ma ri xikʼø texe yo ri søgø me amboo kja i mꞹnkʼø (Moises).

 “Ri xikʼø e Tsʼitajensʼe jaga kjaa texe yo ri søgø, nzakja ma ri ñagøjme in jñꞹꞹ ñe yo ri jogø” (Karen).

 Ne Biblia mama: “Ri xipjigeji Mizhokjimi texe kʼo ni jyonkʼꞹji. Ri dyøtꞹgeji angeze. Ri unꞹji na pøjø” (Filipenses 4:6).

¿Nee ra mamayo ke na joo ri dyøtꞹ angeze ma ri tsjogꞹ ndumꞹ? ¡Ja̱a̱!  Ne Biblia xitskʼøji na joo ra kjaji akjanu, mama: “Xipji e Jehová yo nrrumꞹ yo i kjogꞹ, angeze ra mbøxkʼꞹ” (Salmo 55:22).

 Xo na joo ri mbeñe ke ma ri dyøtꞹ e Mizhokjimi, dya ngextrjo ri xipji yo ndumꞹ yo gi kjogꞹ. Na xuntrʼi ke ni chju̱u̱ Chantelle mama: “Dya ro jogø na joo ko e Jehová ma ngextrjo ro dyøtꞹ ra mbøxkꞹ”. Angeze xo mama: “Nutsʼkʼø ri mango, otʼꞹ ra unꞹji na pøjø e Mizhokjimi, ñe na kjuana bʼꞹbʼꞹ na punkjꞹ pje ra unꞹji pøjø angeze”.

 Tsjijñiyo: ¿Pje nge kʼꞹ me gi unꞹ pøjø? Tsjijñi jñii ke søø ri unꞹdya pøjø e Mizhokjimi.

 “Ma pje kʼo ri jñanda, nzakja ma ri chotrʼꞹ na tsʼindⱥjnⱥ kʼꞹ me na jotrjo, søø ri tsjaa na oración ngekʼua ri unꞹ pøjø Mizhokjimi” (Anita).

 “Tsjijñi jaga kjaa kʼo me kjakʼꞹ ri tsjentrjo yo bo dyⱥtrʼⱥ Mizhokjimi o ma pje bi xorꞹ kja ne Biblia ke me go zⱥtrʼⱥ kja i mꞹbʼꞹ, søø ri unꞹ na pøjø angeze” (Brian).