Texe yo religión dya ga chjenjui. Kja ne Biblia junsʼꞹ ke na punkjꞹ ntee mi manji ke mi matrʼꞹjikjimi, pe dya mi kjaji janzi ga nee angeze. Ra nuji yeje ke mi kjaji akjanu.

Nu daja: Nu kʼo matrʼꞹji yo diosi ke dya ga kjuana

 Ne Biblia mama ke ma ra matrʼꞹji yo diosi ke dya ga kjuana, dya pje pjøxkꞹji (Jeremías 10:3-5; 16:19, 20). Mi jingua e Jehová bo xipji kʼo israelita: “Dya nrre naño Yose ri matʼꞹ, ngextrjozꞹgø” (Éxodo 20:3, 23; 23:24). Ma kʼo israelita o matrʼꞹji naño Diosi, “e Jehová me go mbɇkuɇ ko angezeji” (Números 25:3; Levítico 20:2; Jueces 2:13, 14).

 Xo akjanudya, e Palesito ajensʼe me mbɇkuɇ ma kʼo ntee matrʼꞹji “kʼo xiji mizhokjimi [...] kʼo kjapꞹ yo ntee o jmuji” (1 Corintios 8:5, 6; Gálatas 4:8). Kʼo ntee ke nee ra tsjaji janzi ga nee e Tsʼitajensʼe ni jyodʼꞹ ra jyɇziji kʼo religión ke dya ga kjuana. Ne Biblia mama: “Ri xo̱gꞹji kja kʼo kjaa na sʼoo, dya kja ri dyokjeji” (2 Corintios 6:14-17). Ma texe yo religión ro dyotrjoji ñe ro mbøxkꞹji ro chɇzhiji ko e Palesito ajensʼe, ¿pjenga ro mamayo e Mizhokjimi?

Nu yeje: Yo religión ke manji ke matrʼꞹji e Tsʼitajensʼe pe dya kjaji janzi ga nee angeze

 E Jehová mi jɇzi kʼo israelita ma mi nee ro matʼꞹji angeze pe xo mi matʼꞹji naño tsʼita, o xo mi kreoji kʼo mi jizhi kja kʼo religión ke dya ma kjuana, e Jehová dya mi nee akjanu (Éxodo 32:8; Deuteronomio 12:2-4). E Jesús bo xipji kʼo mbøkjimi mi jingua ke dya ma joo janzi mi matrʼꞹji e Palesito ajensʼe. Na ngeje angezeji ngextrjo mi kjaji kʼo na joo ngekʼua kʼo ntee ro unꞹji nguenrra ke ma jonteji. Pe kʼo na kjuana nge ke dya mi “køʼtpʼꞹji ñiʼi kʼo jñaa kʼo xenda ni mubi kja o ley Mizhokjimi. Mama kʼe ley ra kjaji kʼo na joo ñe ra juentseteji, ñe ra cumpleji kʼua ja nzi rga mamaji” (Mateo 23:23).

 Yo padya nu religión ke ra mbøxkꞹji ra chɇzhiji ko e Tsʼitajensʼe ngeje kʼꞹ kjaa kʼua ja nzi ga mama ne Biblia (Juan 4: 24; 17:17; 2 Timoteo 3:16, 17). Yo religión ke dya kjaji kʼua ja nzi ga mama ne Biblia, kjapꞹji ke yo ntee ra xo̱gꞹji ko e Palesito ajensʼe. Bʼꞹbʼꞹ yo ntee ke kreoji ke dya ga kjuana o jizhi ne Biblia, nzakja nu xiji trinidad, xo jizhiji ke sido ra bʼꞹntjoji ma ra tu̱gøji, ñe ke ma ra ndu̱ji yo sʼonte ra supjreji texe yo paa kja sibi. Pe dya na kjuanakʼo, nange texeyo mi ngeje kʼo mi kreoji kʼo mi matʼꞹji naño tsʼita ke dya ga kjuana. Yo religión ke jizhiji akjanu, dya pje na dyee, ngeje o tju̱rꞹ yo ntee, dya ngeje yo manda e Tsiʼtajensʼe (Marcos 7:7, 8).

 E Yose dya nuu na joo ma kjo mama ke matrʼꞹkjimi pe dya ga tsjaa janzi ga nee angeze (Tito 1:16). Ma na religión na kjuana pjøxkꞹji ra chɇzhiji ko e Diosi dya ngextrjo ra jitskʼøji jarga xorpꞹji e Diosi, xo ni jyodʼꞹ ra jitskʼøji jarga kjaji yo na joo pama pama. Kja ne Biblia mama: “Ma kjo kʼo pɇzhitsʼꞹji na joo ga matʼꞹ Mizhokjimi, pero ma dya pjøtpꞹ nguenda kʼo jñaa kʼo pedye a neʼe ga xipji yo nu minteji, dya joo kʼꞹ kjijñimakʼꞹ. Na ngeje dya kjuana. Na nge dya pje ni mubi kʼꞹ ni mama matʼꞹ Mizhokjimikʼꞹ. Kʼo ix na kjuana matʼꞹ Mizhokjimi kʼin Tataji, pjøsʼꞹji yo ndixu̱ yo ya ndu̱u̱ nu xi̱ra, ñe yo jyoya ma supjreji. Xo pjørꞹtsjɇji ngekʼua dya ra ndɇpiji o ʼñiji yo ntee kja ne xoñijomꞹba yo dya pa̱ra̱ Mizhokjimi“ (Santiago 1:26, 27). O Jñaa e Tsʼitajensʼe, kja nu versión La Palabra de Dios para Todos kja jñangicha, junsʼꞹnu “religión pura”, nujyo nee ra mama ke ra jyaxtrjoji kja i mꞹbʼꞹji ma ra matrʼꞹjikjimi.