Ne Biblia mama: “Texe kʼo xi bʼꞹntrjoji pa̱ra̱ji ke ra nrru̱ji, kʼo ya nrru̱u̱ dya kja pje pa̱ra̱ji, dya kja søø ra pɇpjiji ngekʼua ra ngontrʼpꞹji, nu kʼo ri mbenkøji ja ma kjaa angezeji dya kja ra mbeñeji” (Eclesiastés 9:5; Salmo 146:4). Ngekʼua ma tu̱u̱ na ntee, dya kja bʼꞹbʼꞹ. Yo a nrru̱u̱ dya kja søø ra ngijñiji, dya kja pje søø ra tsjaji ñe dya kja pje søji.

“Ri pjɇzhi jomꞹ”

 Mizhokjimi bo xipji e Adán pje ro kjogꞹ ma ro nrru̱u̱. Ma dya kja go dyⱥtⱥ Mizhokjimi, go xipji: “Ro ⱥkʼⱥ ko jomꞹ, ngekʼua ma ra e̱ nu paa kʼꞹ ri chu̱u̱, nrro ri pjɇzhi jomꞹ” (Génesis 3:19). Dya mi bʼꞹbʼꞹ e Adán jesta ma e Mizhokjimi go dyⱥtrʼⱥ “ko jomꞹ” (Génesis 2:7). Ma bo nrru̱u̱ nrro go pjɇzhi jomꞹ, ñe dya kja bo bʼꞹbʼꞹ.

 Nge yo xo kjogꞹzꞹjidya. Ne Biblia mama ke yo ntee ñe yo añimale: “Texe je ni ñe̱ji kja xijomꞹ, ñe texe nzhogꞹji kja xijomꞹ” (Eclesiastés 3:19, 20).

Zø ra tu̱ji ra søø ra minji na yeje

 Ne Biblia mama ke ma ri tu̱ji nge nzkja ma ri i̱ji̱ (Salmo 13:3; Juan 11:11-14; Hechos 7:60). Ma kjo i̱ji̱ dya pje søʼø ñe dya pa̱ra̱ kʼo kjogꞹ. Je xo akjanu yo a nrru̱u̱ dya kja pje pa̱ra̱ji. Zø nge akjanu, ne Biblia mama ke e Mizhokjimi søø ra xosꞹ kʼo a nrru̱u̱ (Job 14:13-15). Kʼo ra xosꞹ Mizhokjimi, søø ra minji na yeje.