Gũciarwa gwa kaana no kũrete gĩkeno na mĩnoga ĩmĩrito kĩrĩ mũkũrũ na mwekũrũ. Bũrĩ aciari babeerũ, no bũrigare kwona atĩ ĩgiita na inya yeenu ĩnyiingĩ ĩgatumĩka kũmenyeera mwana weenu. Kwaga toro na kũgarũka kwa ũrĩa muntũ akwigua kwomba kũreta nkuucanio kĩrĩ ngwatanĩro yeenu. Bubaĩrĩ bũkabatara kũthithia moogarũrũku kenda bũmenyeera kaana keenu na bũtũũria mũranũ jwenu. Nĩatĩa mataaro ja Bibiria joomba kũbũteethia kũrwa na mathĩĩna jau?

ŨRĨA BIBIRIA YUUGAGA: “Wendani nibu buumagiiria, bukathithagia bwega.” Kinya wendo “butiicwagira untu bwabu bungwa, ningi buti muthuuro.” (1 Akorintho 13:4, 5) Ũrĩ ng’ina ũmweerũ wa mwana, kĩwĩthĩre, ũgatumĩra ĩgiita rĩriingĩ kũmenyeera mwana waaku. Amwe na bũu, mũkũrũ waaku no aambie kwigua atiganĩrĩtue, menya ũũrĩrua atĩ kinya we nakwenda ũmũthũgaanĩria. Ũrĩ na weteeri na kĩao, no ũmũteethie kwigua atĩ nakũbatarwa na nakwendekana kĩrĩ kũmenyeera mwana weenu.

“Na kinya bwi arume, tuuranagireni na aka benu kuringana na uria buri na uume bung’ana.” (1 Petero 3:7) Menya bwega atĩ mwekũrũ waaku agatumĩra inya yaawe ĩnyiingĩ kĩrĩ mwana weenu. Arĩ na ngũgĩ ĩnjerũ na kwou no ethĩrwe arĩ na ũntũ bũkũmũcumbũra, anogi, kana aunĩki nkoro. Magiita jamwe, no akũthũũrĩre, ĩndĩ ciũmie kũmarĩĩra, nĩũntũ “uria uumagiiria muthuuro nakurukite ncamba ing’etu.” (Njuno 16:32) Onania ũmenyo na ũmwee ũteethio bũrĩa akũbatara.—Njuno 14:29.

ŨRĨA ŨŨMBA KŨTHITHIA:

• Ĩthe wa mwana: Teetheria mwekũrũ waaku kũmenyeera mwana, kinya ũtukũ. Nyiyia kagiita karĩa ũtumagĩra mantũũne jangĩ nĩkenda wĩthĩrwa na kagiita gakaingĩ amwe na mwekũrũ na mwana waaku

• Ng’ina wa mwana: Rĩrĩa mũkũrũ waaku akwenda gũgũteethia kĩrĩ ngũgĩ ya mwana, ĩtĩkĩĩria ũteethio bwawe. Kethĩra atĩrita ngũgĩ ĩu bwega, menya ũmũmeneeria, ĩndĩ mwoneerie na njĩra ya kĩao ũrĩa abwĩri kũmĩthithia

ŨRĨA BIBIRIA YUUGAGA: ‘Bo-bairi baejaga mwiri jumwe.’ (Kiambiriria 2:24) Kinya kethĩra muntũ ũngĩ akwongereka kĩrĩ nja yeenu, menya atĩ gwe na mũkũrũ kana mwekũrũ waaku bũrĩ “mwiri jumwe.” Ciũmieni buru gwĩkĩra ngwatanĩro yeenu inya.

Eekũrũ, cookerieni akũrũ beenu nkaatho nĩũntũ bwa kũbũteethia na kũbwigĩka. Rwaria rwaku rwa gũcookia nkaatho no rwĩthĩrwe rũrĩ “thiiria injega.” (Njuno 12:18) Akũrũ, ĩreeni eekũrũ beenu ũrĩa bũbendeete na kũboona barĩ ba gĩtũmi. Mũkaathe nĩũntũ bwa ũrĩa amenyagĩĩra nja.—Njuno 31:10, 28.

“Muntu kinya uriku natigage gucwa mantu ja kumuguna wenka, indi nkuruki nacwage mantu ja kuguna mutuuri wawe.” (1 Akorintho 10:24) Rĩonthe thithagia jarĩa jaagĩrĩte kĩrĩ mũkũrũ kana mwekũrũ waaku. Bũrĩ mũkũrũ na mwekũrũ, ĩthĩrweni na kaanya ga kwaranĩria, gũkaathana, na kũthikanĩĩra. Ĩthĩrweni bũtĩ gwicienda mantũũne jegiĩ kwonana kĩmwĩrĩ. Thũgaanĩria moobatu ja ũngĩ. Bibiria yuugaga: “Tigageni gwaatana o muntu na ungi, tiga bwethirwa buriikanitie kuthithia u.” (1 Akorintho 7:3-5) Arĩĩrieni ũntũ bũu bũtĩkwiithana bubaĩrĩ. Weteeri na umenyo bwenu bũgeekĩra ngwatanĩro yeenu inya.

ŨRĨA BŨŨMBA KŨTHITHIA:

• Menya bũũrĩrua nĩ gũcwa kaanya ga kwĩthĩrwa amwe bubaĩrĩ

• Thithĩria mũkũrũ kana mwekũrũ tũmantũ tũniini tũrĩa tũtũmaga aigua atĩ nũmwendeete, ta kũmũtũmĩra kabarũga kana kũmũretera kĩewa

ŨRĨA BIBIRIA YUUGAGA: “Kuuma o igiita riria wari mwana-munyi niwamenyaga Maandiko jaria Matheru jarĩa joombikia gukuumiyia, nikenda wija kwonoka.” (2 Timotheo 3:15) Baangeni ũria bũkathithia kenda bũritana mwana weenu. Arĩna ũũmbi bũbũnene bwa kwiritana kinya mbere aciarwa. Kinya rĩrĩa arĩ kĩu kĩa ng’ina, mwana no amenye kaajũ gaaku na akaringithua nĩ ũrĩa ũkwigua. Mũthoomere kuuma arĩ mwana mũnyi. Kinya kethĩra atĩmenya jarĩa ũkamũthoomera, jakamũteethia kũgwĩrĩrua kũthooma akũra.

Mwana waaku tĩ ũmũniini wa kũremwa kwigua ũkĩaria mantũ jegiĩ Mũrungu. Reka aigue ũkĩromba Jehova. (Kuriikanithia Maathana 11:19) Kinya rĩrĩa bũgũceetha amwe, arĩĩrieni into birĩa Mũrungu ombĩte. (Zaburi 78:3, 4) O ũrĩa mwana weenu agũkũra, akoona wendo bwenu kĩrĩ Jehova na kinya we akairitana kũmwenda.

ŨRĨA BŨŨMBA KŨTHITHIA:

• Rombeni Mũrungu abwee ũũme bwa kũritana mwana waaku

• Cookera biugo na mantũ jarĩa jagũciumĩria kenda mwana waaku ambĩrĩria kwiritana kũrĩo