Laḡani 2022 lalonai, nius ai tuari, moni hekwakwanaidia, bona disasta e varamu sivaraidia na ta kamonai momomu. Baibul sibona ese e varamu ḡaudia badidia e hahedinaraimu.

Laḡani 2022 ai e vara ḡaudia badidia

 Laḡani 2022 ai e vara ḡaudia ese e hahedinaraia ḡoevaḡoevamu ita na Baibul ese e gwauraiamu “dina gabedia” ai ta nohomu. (2 Timoteo 3:1) Una na laḡani 1914 ai e matama. Mani aita itaia edena dalai hari e varamu ḡaudia na Baibul ena peroveta herevadia ida e heḡereḡeremu:

 “Tuari.”​—Mataio 24:6.

•   “Laḡani 2022 Na Europe ai Tuari E Vara Lou.” a

 “Hitolo bada.”​—Mataio 24:7; NWT.

•   “2022: Hitolo Bada E Vara Laḡanina.” b

 “Dai-hanai goreredia.”​—Luka 21:11.

•   “Polio gorerena e vara lou, monkeypox bona COVID-19 ese dika bada e havaraiamu. Unu ḡaudia ese dai-hanai goreredia ena dika e hahedinaraiamu bona taunimanima na dia heḡereḡere unu gorere bae koudia diba.” c

 “Hahegari ḡaudia.”​—Luka 21:11.

•   “Heatwaves, droughts, lahi badadia, bona abata. Laḡani 2022 na momo ese basie laloa boio badina disasta momo ese dika bada e havaraia, taunimanima tausen momo e mase, bona tanobada heḡeḡemadai taunimanima milion momo na edia ruma e haboiodia.” d

 “Heloḡo-heloḡo.”​—Luka 21:9.

•   “Moni hekwakwanaidia ese taunimanima na e habadudia dikadika bona laḡani 2022 ai taunimanima na gavamani enai protest momo e kara.” e

Laḡani matamatana ai be dahaka be varamu?

 Ta na asi dibana laḡani 2023 ai be dahaka be varamu. Ta dibamu ḡauna na, kahirakahira Dirava ena Basileia, eiava guba gavamanina, ese tanobada ai ḡau iboudiai be hanamodiamu. (Daniel 2:44) Una gavamani ese taunimanima edia hisihisi be haoredia vaitanimu bona Dirava ena ura tanobada totona na be ḡuḡurumu.​—Mataio 6:9, 10.

 Tanobada ai e varamu ḡaudia ese Baibul ena peroveta herevadia e haḡuḡurumu dainai, ai ese a hagoadamuimu Iesu Keriso ena sisiba ba badinaia bona “ba gima.” (Mareko 13:37) Bema o uramu Baibul ese hari baine durumu dalana ba dibaia bona oi bona emu ruma bese ese vaira nega helarona ba dibaia totona, mani ba hadibamaimu.