Ihavarada Diravana ena aonega ese eda aonega e hereaia vaitani. Ia na ita Tamada lalokauna bona ita e laloda badamu. Danu, ia na se uramu iena amo baita gini siri. (Ieremia 10:23) Tama sina ese natu e hakaudiamu heḡereḡerena, Dirava ese ita baine hakauda na maoro. (Isaia 48:17, 18) Baibel ese ita baine hakauda diba​—una na Dirava ena harihari ḡauna ta.​—2 Timoteo 3:16 duahia.

Iehova ena taravatu ese ita e hadibadamu, edena dala ai hari eda mauri baita hanamoa, bona nega vairai mia hanaihanai hahenamodia baita davari diba. Dirava ese e havarada dainai, Ia sibona ena taravatu na mai moaleda ida baita badinadia.​—Salamo 19:7, 11; Apokalupo 4:11 duahidia.

Baibel ena hereva momokani badadia haida be ita be hadibadamu, Dirava na e uramu dala momo ai ita baine hakauda. To, taravatu haida anidia be, e hahedinaraidia ḡoevaḡoeva. (Deuteronomi 22:8) Namona na lalo-dobu karana amo baita lalo-parara Baibel ena hereva momokani badana ta ese ita be e hamaorodamu dahaka baita kara. (Hereva Lada-isidia 2:3,10-12, NW) Heḡereḡere, Baibel ena hahediba herevana ta binai: Mauri na Dirava ena harihari ḡauna ta. Una hereva momokani badana ese ita na baine hakauda diba. Una hereva momokani baita laloataomu negadiai, eda mauri bona ma haida edia mauri ihadikadia karadia basita karamu.​—Kara 17:28 duahia.

Iesu na taravatu badadia rua e herevalai. Ginigunana ese e hahedinaraiamu, eda mauri ai baita kara karadia binai: Dirava baita diba, baita lalokau henia, baita kamonai henia,  bona isiaina baita lao heni. Una dainai, abi hidi o disisen idauidau ta karamu negadiai, una taravatu ginigunana baita laloa guna. (Hereva Lada-isidia 3:6) Una taravatu e badinaiamu taudia edia hahenamo bini: Dirava turana ai e laomu, moale korikori e davariamu, bona mauri hanaihanai bae abia.​—Mataio 22:36-38 duahidia.

Taravatu badana iharuana ese baine hakauda, ma haida ida maino ai baita noho hebou totona. (1 Korinto 13:4-7) Una taravatu baita badinaia totona, namona na Dirava ese taunimanima e kara henidiamu dalana baita tohotohoa.​—Mataio 7:12; 22:39, 40 duahidia.

Dirava ena taravatu ese famili e hadibadiamu, lalokau ese ede baine hatamonadia toma. (Kolose 3:12-14) Danu, Baibel ese famili igimana totona e hadibadamu hereva momokani ma ta binai: Namona na tau bona hahine ese edia headava basie hamakohia.​—Genese 2:24 duahia.

Baibel ena taravatu baita badinadiamu neganai, eda hemami bona kohu baita gimadia namonamo diba. Haheitalai binai: Haida na Baibel ena taravatu e badinaiamu dainai, edia moni ḡaukara gabudiai, asi e koikoimu bona edia ḡaukara e goadalaimu; una dainai, edia bosi ese e ura henidiamu. (Hereva Lada-isidia 10:4, 26; Heberu 13:18) Danu, Baibel ese e hadibadamu aniani, dabua o unu bamona ḡaudia baita moalelai diba, to basita atodia guna, a Dirava itura henina karana baita atoa guna.​—Mataio 6:24, 25, 33; 1 Timoteo 6:8-10 duahidia.

Baibel ena taravatu baita badinadiamu neganai, tauanida baita gimaia namonamo diba. (Hereva Lada-isidia 14:30; 22:24, 25) Haheitalai binai: Dirava ese kekero na e taravatuamu, bona una taravatu baita badinaia neganai, gorere badadia o aksiden na basita davari. (Hereva Lada-isidia 23:20) Iehova ese alkahol (wain o bia) baita inu na se taravatua, to ia ese kekere o inuinu momo karana mo e taravatua. (Salamo 104:15; 1 Korinto 6:10) Dirava ena taravatu ese e hadibadamu eda kara bona lalohadai danu nahuadia baita toho, unu amo namo baita davari. (Salamo 119:97-100) To, Kristen taudia momokanidia ese Dirava ena taravatu e badinadiamu badina e uramu (1) namo bae davari, bona (2) Iehova bae hanamoa totona.​—Mataio 5:14-16 duahidia.