Ta ena kara baita dibaia namonamomu neganai, eda hetura karana ia ida danu be goadamu. Una heḡereḡerena, Iehova ena kara baita dibadia namonamomu neganai, eda hetura karana ia ida na be goadamu. Dirava ena kara namodia iboudiai amo iena kara badadia foa na ini: siahu, aonega, hahemaoro maoromaoro, bona lalokau.

“Ḡaubada Iehova e, oi ese guba bona tanobada na emu siahu badana bona imamu hetoi-rorona amo vada o kara.”​—IEREMIA 32:17.

Dirava ena siahu na e havara ḡaudia amo ta itamu. Heḡereḡere dina ai bo ginimu neganai, kopimu ai be dahaka bo mamimu? Dina siahuna. Oibe, oi na Iehova ena siahu amo e havaraia ḡauna ta o mamiamu. Dina siahuna ena bada be ede bamona? Dina lalona siahuna ena bada na 15,000,000°C. Seken ta ta lalonai, dina siahuna na nuclear bomu milion momo bema pou siahuna heḡereḡerena.

To iunives ai, hisiu milion momo bona dina baita haheḡereḡerediamu neganai, dina na maraḡi. Saiens taudia na e laloamu, hisiu badana ta ladana UY Scuti na bada herea. Bema UY Scuti na dina ena gabu ai baita atoamu, tanobada na be kouamu bona planet ladana Jupiter danu be hanaiamu. Una ese e durudamu Ieremia ese e gwauraia herevana baita lalopararalaia totona, eto Iehova Dirava na ena siahu badana amo iunives o guba bona tanobada e karadia.

 Dirava ese ena siahu amo ita be ede e duruda tomamu? Dirava e kara ḡaudia ese eda mauri e duruamu, heḡereḡere dina bona tanobada ai e ato ḡau namodia iboudiai. Danu, Dirava na ena siahu amo ita ta ta e durudamu. Edena dala ai? Aposetolo edia negai, Dirava ese Iesu na siahu e henia hoa karadia baine kara. Baibul ese una e herevalaia, e gwa: “Mata-kepulu taudia matadia e papamu, ae-hedairike taudia e raka namonamomu, lepra taudia e ḡoevaḡoevamu, taia-kudima taudia e kamonaimu, mase taudia e tore isimu.” (Mataio 11:5) To hari be ede bamona? Baibul na e gwa: “Manori taudia na [Iehova] ese e hagoadadiamu,” bona ma e gwa: “Iehova e nariamu taudia ese edia goada bae hamatamata.” (Isaia 40:29, 31) Dirava ese “siahu herea-daena” baine henida diba, eda mauri ai ta davarimu hekwakwanaidia eiava hahetohodia baita hanaidia totona. (2 Korinto 4:7) Oibe, Dirava na ita e laloda badamu bona ita daidai ena siahu e ḡaukaralaiamu dainai ta lalokau heniamu.

“Iehova e, o kara ḡaudia dahaka ini heḡiḡi-boudia; iboudiai na mai aonegamu ida vada o kara.”​—SALAMO 104:24.

Dirava ese e kara ḡaudia baita dibadia namonamomu neganai, ena aonega dainai baita hoamu. Heḡereḡere, saiens taudia edia stadi ta ladana biomimetics eiava biomimicry amo, Iehova ese e kara ḡaudia e stadilai bona e tohotoho, unu amo ḡau haida e kara. Heḡereḡere, kamera ena lens o plein e karadia daladia amo ta itamu.

Dirava ese tauanida e karaia dalana amo iena aonega ta itaiamu. Haheitalai ta na, beibi e tubumu dalana mani aita laloa. Beibi na sel ta amo e hematamamu, bona ena tubu dalana ibounai na una sel tamona lalonai. Una sel tamona amo sel idauidau e varamu bona toadia na tamona. To nega korikorina ai, unu sel ta ta na sel idauidau 200 mai kahana ai e pararamu, heḡereḡere rara ena sel, varovaro edia sel, bona turia edia sel. Una murinai, tauani ena kaha idauidau e hedinaraimu bona e ḡaukara matamamu. Bena hua nain lalodiai, una sel tamona amo sel bilion momo e hekaramu bena beibi ta ai e laomu. Dirava ena aonega unu e hedinarai toma dainai, momo na Baibul itorena tauna ena hereva e abia daemu, e gwa: “Lau ese oi na hanamomumu, badina hoa dalanai lau o karagu.”​—Salamo 139:14, NWT.

Dirava ena aonega amo dahaka namo ta davarimu? Ihavarada Tauna na mai dibana ita be dahaka ese baine hamoaleda diba. Iena diba bona laloparara na bada dainai, ena Hereva Baibul amo sisiba namodia e henida. Heḡereḡere, Baibul na e gwa: “Emui dika ba hegwau tao heheni.” (Kolose 3:13) O laloamu una be sisiba namona, a? Oibe. Dokta ese e davaria ḡauna na, dika igwau-taona karana ese ta baine durua baine mahuta namonamo bona ena blood pressure baine hamaraḡia diba. Una ese danu depression gorerena bona gorere ma haida baine koudia diba. Oibe, Dirava na mai aonegana bona ia na tura namona ta na heto, hanaihanai iduruda sisibadia e henidamu. (2 Timoteo 3:16, 17) Oi be tura unu bamona ta o uramu, a?

“Iehova na kara maoromaoro e ura heniamu.”​—SALAMO 37:28.

Dirava e karamu ḡaudia iboudiai na hanaihanai mamaoro. Momokani, “Dirava na basine kara dika; Siahu-idoinai Diravana na basine kerere, lasi ona lasi vaitani!” (Iobu 34:10) Ena hahemaoro karadia na mamaoromamaoro, Salamo itorena tauna ese Iehova e herevalaia neganai, ini e gwau toma: “Tanobada taudia o hahemaoro henidiamu mai maoromaoromu ida.” (Salamo 67:4) “Iehova ese [kudou] e itaiamu” dainai, ta ese ia na basine koia diba, to mai dibana daika be hereva momokani e gwauraiamu bona hahemaoro maorona baine karaia diba. (1 Samuel 16:7) Danu, taunimanima ese karamu kara gagevadia bona koikoidia iboudiai na mai dibana, bona ia na e gwauhamatamu, kahirakahira “kara dika taudia na tano amo bae henege daure.”​—Hereva Lada-isidia 2:22.

To, Dirava na dia hahemaoro tauna aukana bona se uramu taunimanima baine panisidia. Ia na nega maorodiai hebogahisi karana e hahedinaraiamu. Baibul na e gwaumu, kara dika taudia ediai danu “Iehova na mai ena hebogahisi bona mai ena harihari-bada” bema idia na bae helalo-kerehai momokani. Una na hahemaoro maoromaoro karana, ani?​—Salamo 103:8; 2 Petro 3:9.

Edena dala ai Dirava ena hahemaoro maoromaoro karana amo namo ta davarimu? Aposetolo Petro na ini e gwau toma: “Dirava ese taunimanima oromadia se lalomu, a bese iboudiai lalodiai ia garina e garimu bona kara maoromaoro e karamu tauna na ia ese e lalo namo heniamu.” (Aposetolo Edia Kara 10:34, 35) Dirava ena hahemaoro maoromaoro karana amo namo ta davarimu badina be ia na taunimanima oromadia se lalomu eiava haida mo se kara namo henidiamu. Una dainai ena be ita na bese bona gado idauidau tauda eiava ta skuli namonamo eiava lasi to e abidia daemu bona ia baita toma diho henia diba.

Dirava na e uramu iena hahemaoro maoromaoro baita lalopararalaia bona una kara amo diba baita abi dainai, ia ese lalo mamina e henida. Baibul ese e hahedinaraia, lalo mamina na ‘laloda ai e torea taravatuna’  na heto, bona e hadibadamu bema eda kara na mamaoro eiava kekerere. (Roma 2:15) Edena dala e durudamu? Laloda mamina baita hadibaia namonamomu neganai, kara kereredia na baita dadaraimu. Una dainai, bema kerere ta ta karaiamu, laloda mamina ese be doridamu baita helalo-kerehai bona una kerere baita hamaoromaoroa. Oibe, Dirava ena hahemaoro maoromaoro karana baita lalopararalaiamu neganai, una ese be durudamu ia baita raka henia kahimu!

“Dirava na lalokau.”​—1 IOANE 4:8.

Baibul na se gwa Dirava na siahu, eiava ia na aonega, eiava ia na hahemaoro maoromaoro to e gwa ia na lalokau. Dahaka dainai? Badina Dirava ena siahu na heḡereḡere kara ta baine karaia, bona e karamu ḡaudia lalodiai iena hahemaoro maoromaoro bona aonega na hedinarai. To Iehova na lalokau dainai e uramu baine kara ḡaudia iboudiai na mai lalokauna ida e karadiamu.

Iehova na ḡau ta ai se dabumu, to iena lalokau dainai aneru bona taunimanima e karadia, bona idia na iena lalokau bona henari amo namo e davarimu. Ia ese ina tanobada e karaia namo herea unu amo taunimanima ese bae noholaia. Bona taunimanima iboudiai ediai ena lalokau na dounu e hahedinaraiamu badina “ia ese ena dina na kara dika taudia bona kara namo taudia latadiai e hatataia dae rohamu, medu danu kara maoromaoro taudia bona kara kerere-kerere taudia latadiai e hadihoamu.”​—Mataio 5:45.

Danu, “[Iehova] ena hebogahisi bona ena harihari-bada vada e bada herea.” (Iakobo 5:11) Ia ese mai momokanidia ida ia e raka henia kahimu taudia na e lalokau henidiamu. Dirava ese idia ta ta na e abidia daemu. Oibe, ‘ia ese oi na e lalomu’ badamu.​—1 Petro 5:7.

Edena dala ai Dirava ena lalokau karana amo namo baita abimu? Dina e dihomu hairaina ta itaiamu neganai ta moalemu. Beibi ena kiri reḡena ta kamonaiamu neganai ta moalemu. Eda ruma bese tauna ta ena lalokau karana na ta laloa badamu. Unu na reana dia ḡau badadia, to eda mauri e hanamoamu.

Dirava ena lalokau karana ma ta ita edai na ia baita ḡuriḡuri henia. Baibul na e gwaumu: “Ḡau ta basio lalo haguhilaia; a ḡau iboudiai ḡuriḡuri ai, noinoi ai, heimodai ai, emui ura na Dirava ba hamaorolaia.” Tama lalokauna ta heḡereḡerena, ia na e uramu laloda ai e miamu ḡaudia na ḡuriḡuri amo ia enai baita gwauraidia hedinarai. Iehova na mai lalokauna ida e gwauhamatamu “ena maino, eda diba idoinai e hereaiamu mainona,” baine henida.​—Filipi 4:6, 7.

Dirava ena kara badadia heḡereḡere ena siahu, aonega, hahemaoro maoromaoro, bona lalokau tame herevalaidia amo ome diba Dirava ena kara be ede bamona, ani? Dirava enai emu tenkiu karana ba hahedinaraia totona, a noimumu, oi daimu ai vada e kara ḡaudia bona baine kara ḡaudia ba dibadia.