“UIT na vada e lo ḡoevaḡoeva, to iutuna taudia na dia hoho; taunabunai uma biaguna ba noia, ia ese iutuna taudia haida ma baine siaidia, ena uit bae utua.” (Luka 10:2) Unu hereva na Iesu ese laḡani 2,000 gunadia ai e gwaurai, bona una ese hari ina negai Myanmar ai e vara ḡauna e hahedinaraia ḡoevaḡoeva. Dahaka dainai? Myanmar ai, pablisa 4,200 heḡereḡerena ese sivarai namona na taunimanima 55 milion ediai e harorolaiamu.

To, “uma biaguna,” Iehova, ese tano idauidau amo tadikaka bona taihu e hagoadadia, bona una tano ela, Saotist Asia ai, haroro ḡaukarana bae durua totona. Dahaka dainai edia tano korikori e rakatania? Edena dala ai heduru e abi unu amo Myanmar ela? Bona dahaka hahenamo e moalelaimu? Mani aita itaia.

Laḡani haida gunadia ai, Kazuhiro, Japan ai e painiava tadikakana ta, na mai ena epileptic gorerena dainai, e maserea, bona hospele e laohaia. Dokta ese e hamaoroa laḡani rua lalonai motuka na do basine tari. Kazuhiro na e daradara. Sibona e henanadai, ‘Na ura heniamu ḡaukarana​—painia ḡaukara​—be ede ba karaia tomamu?’ Ḡuriḡuri amo Iehova e noia goadagoadava, dala baine kehoa dounu baine painia totona.

Kazuhiro na eto: “Hua ta murinai, bamogu ta, Myanmar ai hesiai ḡaukara e karaiava tadikakana, ese egu hekwakwanai na e kamonai. Ia ese e rini henigu bona eto: ‘Myanmar ai na PMV e ḡaukaralai momomu. Bema inikaha bo maimu, emu hesiai ḡaukara na dounu bo karaiamu bona motuka na basio tarimu!’ Egu dokta na nanadaia bema lau na heḡereḡere Myanmar bainala diba. Na hoa, badina dokta na eto: ‘Kwara harana e itaiamu doktana ta na harihari Myanmar amo Japan be vadivadiamu. Ia ida bame hedavari. Bema emu gorere ese baine abimu lou, ia ese baine durumu diba.’ Dokta ena hereva amo na diba Iehova ese egu ḡuriḡuri na e haerelaia.”

Maoromaoro, Kazuhiro ese e-mail ta e siaia Myanmar brens ofesi bona e noinoi ia bona adavana na e uramu una tano ai bae painia. Dina 5 muridiai, brens ofesi ese haere e siaia, “Baoma, ai na painia taudia momo a ura henidiamu!” Kazuhiro bona adavana, Mari, ese edia motuka e hoihoilaia, edia visa e abi, bona plein tiket e hoi. Hari, idia na mai moaledia ida Mandalay ai sign-language grup e duruamu. Kazuhiro na eto: “Ina ekspiriens ese emai  abidadama Dirava ena gwauhamata ai na e hagoadaia, una gwauhamata na Salamo 37:5 ai, eto: ‘Oiemu dala idoinai Iehova imana ai bavatoa; ia bavabidadama henia, ia ese baine ḡaukaralaia.’”

Laḡani 2014 ai, Myanmar ai Iehova ena Witnes ese spesol hebouhebouna ta e abia. Tano idauidau taudia momo na una hebouhebou ela. Idia ta na, Monique, ia na United States amo bona laḡanina na 34, ini e gwau toma: “Hebouhebou amo na lou neganai, egu mauri ai baina karaia ḡauna na Iehova enai na ḡuriḡurilaia. Danu, tamagu sinagu ediai Iehova ena hesiai ḡaukara ai baina kara ḡaudia na herevalai. Iboumai a lalo Myanmar baina lou lao na namo, to nega daudau baina heḡaeḡae bona baina ḡuriḡuri loulou na namo, gabeai egu abi hidi baina karaia.” Monique ese badina e herevalaia.

“Iesu ese ena hahediba e hagoadadia ‘davana bae haeroa guna.’ Una dainai sibogu na henanadai: ‘Egu moni be heḡereḡere una tano bainala totona, a? Una tano ai tauanina iduruna totona ḡaukara haida baina kara diba to egu nega bada na moni ḡaukara ai basina haorea, a?’” Ia na ma eto: “Haraḡa herea na laloparara egu moni na dia heḡereḡere una tano bainala.” To, edena dala ai ela?​—Luka 14:28.

Monique na eto: “Nega ta, egu bosi ese e boirigu baina ha itaia. Na gariva badina na laloava be hadokogumu. To, egu ḡaukara namona dainai bosi ese e tenkiu henigu. Bena e hamaorogu, ia na dala e karaia egu pei monina baine habadaia, una moni na heḡereḡere lau bainala totona!”

December 2014 amo Monique na Myanmar ai doini hesiai ḡaukara e karaiamu. Pablisa dia momo gabuna ai ena hesiai ḡaukara be ede e laloa tomamu? Ia na eto: “Ina tano nama dainai na moale dikadikamu. Lau ese Baibul stadi toi na karadiamu. Egu stadi hahinena ta laḡanina na 67. Ia na hanaihanai mai kirina ida e hedavari heniguva bona e rosiguva. Ia na e diba Dirava ladana na Iehova neganai, e tai. Eto: ‘Egu mauri ai ina na nega ginigunana name kamonai Dirava ladana na Iehova. Ena be oi na maraḡi bona lau na bada, to oi ese mai anina bada ḡauna ta ome hadibagu, una na lau ese asina dibaia ḡauna.’ Lau danu na tai. Pablisa dia momo gabudia ai ekspiriens unu bamodia ese moale e havaraiamu.” Vanegai, Monique na Basileia Evanelia Sikulina ela.

Ma haida na Myanmar ela badina na 2013 Yearbook of Jehovah’s Witnesses ai una tano sivaraina e duahia karana ese e hagoadadia. Laḡanina 30 mai kahana taihuna ta ladana Li, na Saotist Asia ai e nohomu. Ia na moni ḡaukara e karava, to Yearbook ai e duahia sivaraina ese e hagoadaia dainai Myanmar ela. Ia na eto: “Laḡani 2014 ai, Yangon ena spesol hebouhebouna nala neganai, tadikaka ta mai adavana ida na hedavari henidia, idia na pabilsa dia momo gabuna ela Myanmar ai bona Chinese teritori ai e haroromu. Lau na China gado mai dibagu dainai, lalogu na hadaia Myanmar bainala bona Chinese grup baina durua. Monique ida a ḡaukara hebouva, bona Mandalay ala. Iehova ese e hanamomai dainai sikuli tamona ai pat-taim hahediba ḡaukarana a karaiava, bona gabu kahikahina ai apatment ta a davaria. Ena be siahu gabuna bona hekwakwanai haida e varava, to egu hesiai ḡaukarana na moalelaia. Myanmar taudia na edia mauri ai kohu momo asie tahuva, to edia kara na nanamo bona mai edia ura ida nega e heniva sivarai namona bae kamonai totona. Iehova ese ḡaukara e haharaḡaiamu dalana baita itaiamu na mai moalena. Na abia dae momokanimu Iehova na e uramu Mandalay ai baina noho.”

Pablisa dia momo gabudia ela taudia momo na e mamia ḡuriḡuri na mai siahuna. Mani Jumpei, laḡanina na 37, bona adavana, Nao, laḡanina na 35 aita lalodia.  Idia na Japan ai sign-language kongrigeisen e bamoava. Dahaka dainai Myanmar ela? Jumpei na eto: “Lau bona adavagu na hanaihanai a urava idau tanona ta ai pablisa dia momo gabuna baiala. Japan ai emai sign-language kongrigeisen tadikakana ta na Myanmar ela. Ena be a haboua monina na dia bada, to May 2010 ai ala. Myanmar tadikakadia bona taihudia ese mai moaledia ida e abimai dae!” Myanmar ai sign-language teritorina be ede e laloa toma? “Momo na e urava bae kamonai. Sign-language vidiodia a hahedinaraiva neganai, mu taudia na e hoava. Ai na a moalemu badina abi hidi a kara ina tano ai Iehova baia hesiai henia!”

Edena dala ai Jumpei bona Nao na moni dalanai e haheauka? Jumpei na eto: “Laḡani toi murinai, a habou monidia momo na a ḡaukaralai bona emai ai na dia heḡereḡere vaira laḡani ai emai renti davana baia karaia totona. Lau bona adavagu na a ḡuriḡuri loulouva. A hoa, badina brens ofesi amo revareva ta a abia, una revareva ai e boirimai spesol painia ḡaukarana baia karaia! Iehova a abidadama heniava, bona a mamia ai na se rakatanimai. Ia ese dala idauidau ai e narimai.” Vanegai, Jumpei bona Nao danu Basileia Evanelia Sikulina ela.

Simone na Italy amo bona laḡanina na 43, bona adavana, Anna na New Zealand amo bona laḡanina na 37; dahaka ese e durudia dainai Myanmar ela? Anna na eto: “2013 Yearbook ai Myanmar sivaraina ese e durumai!” Simone na eto: “Myanmar ai a nohomu na hahenamo badana ta. Iniseniai kohu momo asia tahumu, bona egu nega bada na Iehova ena ḡaukara ai baina ḡaukaralaia diba. Pablisa dia momo gabuna ai Iehova ese e narimai dalana a mamia neganai a moale dikadika.” (Sal. 121:5) Anna na eto: “Hari na moale dikadikamu dia guna heḡereḡerena. Emai mauri ai kohu momo asia tahumu. Nega bada na atomu adavagu ida a ḡaukara heboumu, bona una ese emai hetura karana na e hagoadaiamu. Danu, tura matamatadia momo a davaridia. Taunimanima ese Witnes taudia na se inai henidiava, bona teritori ai kamonai taudia na momo herea!” Ededia dala ai?

Anna na eto: “Dina ta, makedi gabuna ai kekeni ta na davaria bona dala na kara baina lou henia. Na lou neganai, ia na bamona ta e mailaia. Dina ma ta ai na lou neganai, ia na bamona hani ma e mailaidia. Gabeai, ma 5 e mailaidia. Hari iboudiai na stadi henidiamu.” Simone na eto: “Teritori ai taunimanima na heabidae taudia bona e urava diba bae abi. Momo na e urava bae kamonai. Emai nega na dia heḡereḡere kamonai taudia iboudiai baia durudia.”

Tadikaka taihu be dahaka ḡau ma haida e kara Myanmar baela totona? Japan taihuna ta, Mizuho na eto: “Lau bona adavagu, Sachio, na hanaihanai a urava pablisa dia momo tanona ta ai hesiai ḡaukara baia karaia​—to edeseni ai? 2013 Yearbook ai Myanmar sivaraina a duahia murinai, ekspiriens idauidau ese  kudoumai e hamarerea dainai, a lalo matama Myanmar baiala na namo.” Sachio na eto: “Palani a kara wiki ta lalonai Yangon baia vadivadia, una na Myanmar ena siti badana, haroro gabuna baia itaia totona. Una laolao kwadoḡina ese e hagoadamai unu baiala.”

Laḡani 2010 amo, Rodney bona adavana, Jane​—idia na Australia amo bona laḡanidia na 50 heḡereḡerena​—na natudia merona Jordan bona kekenina Danica, ida Myanmar ai pablisa dia momo gabuna ai hesiai ḡaukara e karaiamu. Rodney na eto: “E hagoadamai ḡauna na, a itaia taunimanima na e ura dikadikava Dirava bae dibaia. Na uramu ruma bese ma haida baina hagoadadia Myanmar heḡereḡerena gabudia baela hesiai ḡaukara ikarana totona.” Dahaka dainai? “Emai ruma bese ida ina hesiai ḡaukarana amo emai hetura karana Iehova ida a hagoadaiamu! Matamata taudia momo na edia fon, motuka, moni ḡaukara, bona ḡau ma haida e lalodia momomu. To ai natumai na e hekwarahimu hereva matamatadia bae diba unu amo haroro ḡaukara ai bae ḡaukaralai. Idia na e uramu Baibul asi dibadia namonamo taudia idurudia daladia bona kongrigeisen heboudia ai haere ihenidia daladia bae diba, bona eda tomadiho ḡaukaradia idurudia totona ḡau idauidau e dibamu.”

Oliver, laḡanina na 37 bona United States amo, ese una ḡaukara ikarana totona ma haida e hagoadadia badina e herevalaia: “Tano idauna ma ta ai Iehova ihesiai henina karana na mai ena hahenamo momo. Egu gabu na rakatania karana ese e durugu egu abidadama Iehova enai baina hagoadaia, herevana bainala gabuna ai noho dalana na idau. Guna asina dibadia tadikakadia ida na ḡaukaramu bona emai abidadama dainai lalotamona ai a nohomu. Una na Dirava ena orea lalonai mo e varamu.” Hari, Oliver bona adavana, Anna, na China edia teritori ai e haroro goadagoadamu.

Laḡanina 52 taihuna ta, Trazel, na Australia amo, bona ia na laḡani 2004 amo Myanmar ai hesiai ḡaukara e karaiamu. Ia na eto: “Edia noho daladia heḡereḡere taudia na, na hagoadadiamu pablisa dia momo gabudia baela hesiai ḡaukara bae karaia totona. Bema mai emu ura ida unu gabu ai hesiai ḡaukaradia bo karamu, Iehova ese emu hekwarahi na be hanamoamu, lauegu ai una na e vara. Asina laloa lau na ini baina noho toma. Una na mai moalena bona mai ena hahenamo.”

Myanmar ai pablisa dia momo gabudia ela taudia edia hereva namodia ese bae hagoadamu, do asie kara teritoridia ai kudou namo taudia idurudia karana ba laloa. Oibe, pablisa dia momo gabudia ai e nohomu taudia na e boimu, “Mani emu kara, Myanmar aoma bona bame durumai!”