CANADA ai, Iehova ena Witnes tauna ta ladana Don na dala ai e nohova taudia e hereva henidiava. Don ese e hereva henidia tauna ta na ini e herevalaia toma: “Ogoḡami tauna ta ladana Peter na se heḡoeva namonamova. Ia na se urava taunimanima ese ia bae hereva henia. Bona taunimanima edia hebogahisi karadia na se abi daeva.” To, laḡani 14 mai kahana lalodiai, Don na mai haheaukana ida una ogoḡami tauna e durua.

Dina ta, Peter ese Don e nanadaia: “Dahaka dainai nega iboudiai o uramu lau ba durugu? Taunimanima momo ese lau na asie durugumu. Dahaka dainai oi ese lau na o lalogumu?” Don na aonega dalanai siri toi e ḡaukaralai Peter baine durua totona. Ginigunana na, Peter e nanadaia bema ia na mai dibana Dirava ladana, bona e noia Baibul ai Salamo 83:18 baine duahia. Iharuana na, Don na e ura baine hahedinaraia dahaka dainai ia ese Peter na e laloa badava. Una dainai Peter e noia Roma 10:13, 14 baine duahia, una siri na e gwaumu, “[Iehova] ladana e hahaneamu taudia iboudiai na bae mauri.” Ihatoina na, Don ese Mataio 9:36 e duahia bena Peter ma e noia sibona ese baine duahia. Una siri na eto: “[Iesu ese] aru taudia e itadia, e bogadia hisi, badina be taudia e boera, bona e karoho, mamoe asi ireḡudia na heheto.” Peter na una siri e duahia murinai, mai iruru matana ida e henanadai: “Lau be ina mamoe ta, a?”

Peter ese ena kara e haidaua. Ia na e heḡoevava, aukina huidia e utu, bona Don ese e henia dabua namodia e hahedokilai. Una murinai Peter na hanaihanai e heḡoeva namonamova.

Peter na mai ena buka (o diary) ta. Una buka matamana kahanai na ena lalohisihisi sivaraidia e tore, to ena kara e haidaua sivaraidia danu e tore. E torea herevana ta na ini bamona: “Hari dina Dirava ladana name dibaia. Egu ḡuriḡuri ai Iehova baina hereva henia diba. Ia ladana name diba dainai na moalemu. Don na e gwa Iehova na Turagu ai bainela diba, bona Ia na hanaihanai lau be  kamonai henigumu, herevana edena negai o edeseniai baina hereva henia.”

Peter ena hereva oredia na tadina bona kakana e tore henidia. Ini e torea toma:

“Hari dina tauanigu mamina na dia namo. Reana laḡanigu na vada bada. Ena be ina na egu dina orena, to mai dibagu lau turagu [Don] na Paradaiso ai baina itaia lou. Bema umui na ina o duahiamu, lau na vada lasi. To bema egu fineral ai vaira matamata ta o itaiamu, ba hereva henia, bona mani emui kara ina buka blu-na ba duahia [Baibul stadi bukana, “The Truth That Leads to Eternal Life,” laḡani gunadia ai e abia ḡauna e gwauraia]. * Una buka ai na e gwaumu turagu na Paradaiso ai baina itaia lou. Una hereva na mai kudougu idoinai ida na abia daemu. Tadikakamui lalokauna, Peter.”

Fineral murinai, Peter taihuna Ummi na eto: “Laḡani rua gunadiai, Peter ida a herevahereva. Laḡani momo lalodiai ia na se moaleva, to una na nega ginigunana na itaia e moale.” Ummi ese Don e hamaoroa, eto: “Ina buka na baina duahia, badina reana tadigu e durua herevadia na mai anidia bada.” Danu, Ummi na e ura Iehova ena Witnes ta ida Baibul Ena Hahediba Maorodia be Dahaka? bukana bae stadilaia.

Ita danu taunimanima toadia na basita lalo, lalokau baita hahedinaraia, bona mai haheaukada ida taunimanima iboudiai baita kara namo henidia. (1 Tim. 2:3, 4) Unu baita kara tomamu neganai, ita ese Peter heḡereḡerena taudia baita durudia dibamu, ena be asie heḡoevamu dainai toadia na dia nanamo to idia na kudou-namo taudia. Namona na baita diba kudou e itamu Diravana ese kudou-namo taudia kudoudia ai hereva momokani baine hatubua diba.​—1 Sam. 16:7; Ioa. 6:44.