1. Dahaka dainai haida baita matauraidia na namo, bona hari dahaka baita herevalaiamu?

ITA ese ta baita matauraia anina na ia baita laloa bada bona baita hanamoa. Vaia, ta na ḡaukara namona ta e karaiamu eiava dagi badana ta e abiamu neganai, baita hanamoamu bona baita matauraiamu. To, reana baita henanadai: Daidia baita matauraidia na namo, bona dahaka dainai unu baita kara toma na mai anina bada?

2, 3. (a) Dahaka dainai Iehova baita matauraia na maoro? (Rau 8 ai laulau ba itaia.) (b) Apokalupo 5:13 ai, Mamoe Natuna be daika, bona dahaka dainai baita matauraia?

² Apokalupo 5:13 ese e hahedinaraia heḡereḡerena, “Terono ai e helaimu Diravana bona Mamoe Natuna” baita matauraidia na maoro. Apokalupo karoa 4 ese Iehova baita matauraia badina ta e herevalaia. Lauma taudia guba ai na mai gado badadia ida Iehova, “Mauri Hanaihanai Diravana,” e imodaia. Idia na eto: “Emai Lohiabada, emai Dirava e, namona binai: Hairai bona hemataurai bona siahu bavabi. Badina be oi ese ḡau iboudiai  o havara, emu ura dainai o karadia bona e miamu.”​—Apok. 4:9-11.

³ Mamoe Natuna na Iesu Keriso, ia na “Dirava ena Mamoe Natuna . . . tanobada ena dika iabi-ohona tauna.” (Ioa. 1:29) Baibul ese e hadibadamu Iesu ese king iboudiai e hereadia. Ini e gwau toma: “Ia mo sibona Ḡaubada; pavapava edia Pavapava; bona lohia edia Lohia; ia sibona e noho hanaihanaimu, asi iraka-kahikahina diarina ai e nohomu; ta ese asine itaia, bona ta ese basine itaia diba.” (1 Tim. 6:14-16) Edena pavapava be mai ena ura ida ita daidai ena mauri e heni? Una dainai guba anerudia hutuma ida ini bo gwau tomamu: “Mamoe Natuna e alaia mase, ia hari namo; siahu bona taḡa bona aonega bona goada bona hemataurai bona hairai bona hahenamo baine abi.”​—Apok. 5:12.

4. Dahaka dainai Iehova bona Iesu baita matauraidia hanaihanai na ḡau badana?

⁴ Iehova bona Iesu baita matauraidia hanaihanai na ḡau badana. Bema unu baita kara tomamu, mauri hanaihanai baita abia dibamu. Ioane 5:22, 23 ai Iesu ena hereva amo una baita lalopararalaiamu, eto: “Tamana ese tau ta se hahemaoro heniamu; a hahemaoro siahuna idoinai Natuna vada e henia: taunabunai taunimanima iboudiai ese Natuna bae matauraia, Tamana e matauraiamu heḡereḡerena. Natuna se matauraiamu tauna ese Tamana, Natuna e siaia Diravana, danu se matauraiamu.”​—Salamo 2:11, 12 ba duahi.

5. Dahaka dainai taunimanima baita matauraidia na namo?

⁵ Dirava ese taunimanima na “ia heida-idana” e karadia. (Gen. 1:27) Una dainai, idia momo na Dirava ena kara namodia haida bae hahedinarai diba. Heḡereḡere, taunimanima ese lalokau, manau, bona hebogahisi bae hahedinarai diba. Dirava ese taunimanima e karadia neganai, lalomamina danu e henidia, una hemami, ena be nega haida e maoromu eiava e kereremu, to e durudiamu namo eiava dika, momokani eiava koikoi, maoro eiava kerere edia idau e dibamu. (Roma 2:14, 15) Taunimanima momo ese ḡau ḡoevadia bona ḡau hairaidia e ura henimu. Bona e uramu ma haida ida maino ai bae noho. Ena be e lalopararamu eiava lasi, to idia na dala haida ai Iehova hairaina e hahedinaraiamu. Una dainai, ita ese idia baita matauraidia na namo.​—Sal. 8:5.

6, 7. Hemataurai ihahedinaraina karanai, edena dalai Iehova ena Witnes na taunimanima momo edia amo idau?

⁶ Dala maorona ai haida baita matauraidia na namo, to edena dala ai hemataurai maorona baita hahedinaraia? Taunimanima momo na Satana ena tanobada ena lalohadai ese e hakaudia kereremu. Una dainai taunimanima haida ese tatau eiava hahine haida na e imodaidia badamu, unu amo hemataurai dalana maorona asie hahedinaraiamu. Idia ese tomadiho bona gavamani igunalaidia taudia, spot taudia, muvi ekta, bona mai ladadia taudia ma haida na e imodaidiamu, vaitani dirava ai e halaodiamu. Una dainai, eregabe bona burukadia na unu taunimanima edia dabua e hahedokilaimu daladia, edia kara, bona hereva daladia e tohotohomu.

⁷ Kristen taudia momokanidia na mai dibadia taunimanima unu bae matauraidia toma na dia maoro. Keriso sibona ena haheitalai hereadaena baita tohotohoa na namo. (1 Pet. 2:21) Dirava na basine moalemu bema ita ese taunimanima baita imodaidiamu. Namona na ina hereva momokanina baita laloatao: “Iboudiai vada e kara dika, bona iboudiai ese Dirava  hairaina vada e reaia.” (Roma 3:23) Momokani, taunimanima na dala maorona ai baita matauraidia, to basita imodaidia bada.

8, 9. (a) Iehova ena Witnes taudia ese gavamani taudia be ede e kara henidia tomamu? (b) Ena be gavamani baita durua to dahaka baita laloatao na namo?

⁸ Ḡaukara gabudia ai, taunimanima haida na mai edia dagi. Gavamani taudia na taravatu heḡereḡerena edia taunimanima e naridiamu bona durudiamu. Unu amo iboudiai na namo e davarimu. Una dainai, aposetolo Paulo ese Kristen taudia e haḡanidia gavamani o “lohia” bae matauraidia na namo. Eto: “Iboudiai na ena ḡau ena ḡau ba henidia: tax gogo tauna tax ba henia; . . . e matauraiamu tauna ba matauraia.”​—Roma 13:1, 7.

⁹ Ita na Iehova ena Witnes tauda dainai, gavamani henunai e ḡaukaramu taudia na baita matauraidia. Vaia, ena be tano ta ta ai gavamani imatauraidia daladia na idauidau, to edia ḡaukara e karamu neganai baita durudia na namo. To, idia imatauraidia bona idurudia karana na mai hetoana, Baibul ese e hahedinaraia heḡereḡerena. Asita uramu baita karaia ḡauna ta amo Dirava baita gwau-edeede henia bona eda Kristen gini siri karana baita hadikaia.​—1 Petro 2: 13-17 ba duahi.

10. Edena dala ai idaunegai Iehova ena hesiai taudia na haheitalai namona e hahedinaraia?

¹⁰ Idaunegai Iehova ena hesiai taudia ese gavamani bona dagi taudia e kara henidia dalana ai haheitalai namona e hahedinaraia. Roma Basileiana ese ena taunimanima e haḡanidia edia hanua ai ladadia bae tore neganai, Iosef bona Maria na unu e kara toma. Idia na Betelehem ela, ena be Maria ena mara negana vada e kahikahi. (Luka 2:1-5) Haheitalai ma ta na Paulo, haida ese e habadelaia koikoi neganai, ia na mai hematauraina ida King Herod Agripa bona Iudea ai Roma provins gavana Festo vairadiai ena maoro e herevalaia.​—Kara 25:1-12; 26:1-3.

11, 12. (a) Gavamani taudia bona tomadiho igunalaina taudia be ede baita kara henidia toma? (b) Witnes ta ese gavamani ena memba ta enai hemataurai karana e hahedinaraia neganai, dahaka namo e vara?

¹¹ To, Iehova ena Witnes taudia ese tomadiho igunalaidia taudia na se imodaidiamu, ena be unu hegunalai taudia na e uramu taunimanima ese unu bae kara henidia toma. Tomadiho koikoi oreadia ese Dirava sivaraina bona ena Hereva na e hahedibalaia kereremu. Una dainai, ita ese tomadiho igunalaidia taudia na taunimanima iboudiai heḡereḡeredia baita matauraidia, to basita imodaidia bada. Iesu ese iena nega ai unu bamona taudia na e gwauraidia, koikoi taudia bona matakepulu hahekau taudia. (Mat. 23:23, 24) To, gavamani henunai e ḡaukaramu taudia na baita matauraidia, badina nega haida idia ese ita na be duruda dibamu.

¹² Austria ai, Witnes goadana ta Leopold Engleitner na Nazi taudia ese e abia bena trein amo e laohaia Buchenwald dibura rumana ai. Dokta Heinrich Gleissner danu dibura tauna ta una trein ai. Ia na guna Austria gavamani ena memba ta. To, Nazi taudia ese asie ura henia. Dibura rumana e laova lalonai, Tadikaka Engleitner ese e abi dae ḡaudia na mai hematauraina ida Gleissner enai e herevalaiva, bona ia na e kamonai namonamo. Tanobada tuarina iharuana murinai, Gleissner na nega momo ena dagi e ḡaukaralaia Austria ai Witnes taudia e durudia. Reana oi na Witnes taudia ese gavamani henunai e ḡaukaramu taudia e matauraidia neganai namo e davari sivaraidia haida o lalotaomu. Momokani, idia na Baibul ena hereva heḡereḡerena hemataurai karana e hahedinaraia.

13. Daidia baita matauraidia na namo, bona dahaka dainai?

¹³ Eda tadikaka bona taihu danu baita matauraidia. Bona ita e hakaudamu elda taudia baita matauraidia. (1 Timoteo 5:17 ba duahia.) Unu elda taudia na baita matauraidia, ena be edia tano, diba, bona noho daladia na idau, o idia na taḡa taudia eiava ogoḡami taudia. Baibul ese idia na e gwauraidiamu “herahia” ḡaudia, bona idia na Dirava ese e ḡaukaralaidiamu ena taunimanima bae naridia. (Efe. 4:8) Kongrigeisen elda taudia, seket taudia, Brens Komiti, bona Gavanin Bodi ena memba mani a lalodia. Aposetolo edia negai tadikaka bona taihu ese ihakaudia taudia na e matauraidiava, bona hari ita danu unu ta kara tomamu. To unu Kristen kongrigeisen ena gwaukau taudia na basita imodaidia, eiava aneru heḡereḡeredia basita kara henidia. A edia ḡaukara goada bona manau karana dainai baita matauraidia bona baita hanamodia.​—2 Korinto 1:24; Apokalupo 19:10 ba duahi.

14, 15. Kristen elda taudia bona tomadiho igunalaina taudia be ede e idau toma?

¹⁴ Unu elda taudia na mai manaudia ida mamoe e naridiamu. Edia manau karana dainai, asie uramu haida ese bae imodaidia mai ladadia taudia heḡereḡeredia. Unu elda taudia na hari ina negai bona Iesu ena negai e nohova tomadiho igunalaina taudia edia amo idau, Iesu ese tomadiho igunalaina taudia na ini e herevalaidia toma: “E uramu anibou ai gabu hereadia ai bae ege diho, bona dubu ai helai ḡaudia hereadia ai bae helai; e uramu danu hoihoi gabudia ai taunimanima ese bae hanamodia.”​—Mat. 23:6, 7.

¹⁵ Kristen elda taudia na mai manaudia ida Iesu ena hereva e badinaiamu, eto: “Umui be ‘hahediba taumui’ basie gwauraimui, badina be emui hahediba tauna na tamona mo, Keriso binai; bona iboumui ai na tadikaka. Bona tanobada ai tau ta ‘tamamui’ basio gwauraia, badina be Tamamui na tamona mo, ia na guba ai e nohomu. Bona ‘hahekau taumui’ basie gwauraimui, badina be emui hahekau tauna na tamona mo, Keriso binai. Umui bogaraḡimui ai ta baine ura baine herea, ia ese isiaimui baine lao heni. Sibona e heimodai tauna na do bae hamanaua; a sibona e hahemanau tauna na do bae imodaia.” (Mat. 23:8-12) Una dainai, ta dibamu tanobada heḡeḡemadai kongrigeisen elda taudia na e manaumu dainai tadikaka taihu ese e lalokau henidiamu, e matauraidiamu, bona e hanamodiamu.

16. Dahaka dainai baita hekwarahi hemataurai karana baita hahedinaraia?

¹⁶ Haida imatauraidia dalana na nega daudau lalonai baita dibaiamu.  Kristen ginigunadia ediai una na e vara. (Kara 10:22-26; 3 Ioa. 9, 10) To ḡau badana na baita hekwarahi Baibul ena hereva heḡereḡerena hemataurai karana baita hahedinaraia. Unu baita kara tomamu neganai, hahenamo momo baita abimu.

17. Gavamani henunai e ḡaukaramu taudia baita matauraidia ena namo haida be dahaka?

¹⁷ Gavamani henunai e ḡaukaramu taudia baita matauraidiamu neganai, idia ese bae duruda diba eda haroro ḡaukara baita karaia totona. Nega momo, idia ese eda ḡaukara na be matauraiamu. Laḡani haida gunadiai, Germany ai painia ta ladana Birgit, na natuna kekenina ena sikuli gradueisen ela. Hahediba tauna o tisa ese Birgit e hamaoroa idia na e moalemu badina laḡani momo lalodiai Witnes natudia e hadibadiava. Idia na e gwa bema edia sikuli ai Witnes natudia na lasi, unu na basiema moale toma. Birgit na eto: “Ai natumai na a hadibadiamu Dirava ena taravatu bae badina, bona edia tisa bae matauraidia.” Hahediba ta na e gwa, “Bema natu iboudiai na oi natumu heḡereḡerena, emai hahediba karana na basinema auka.” Pura haida muridiai, hahediba ta na Leipzig ai hebouhebou ta ela.

18, 19. Dahaka dainai elda taudia imatauraidia dalana maorona baita laloa na namo?

¹⁸ Baibul ai hahekau herevadia ese be durudamu dala maorona ai kongrigeisen elda baita matauraidiamu. (Heberu 13:7, 17 ba duahi.) Namona na edia ḡaukara goadagoada dainai baita hanamodia bona e henidamu hahekau herevadia baita badina. Unu baita kara tomamu neganai, idia na mai moaledia ida edia ḡaukara be karamu. To una anina na dia elda “hereadaena” ta ena heḡoeva dalana, ena hahediba dalana, eiava ena hereva daladia baita tohotohodia. Bema unu baita kara tomamu, una na vaitani ia ta imodaia badamu. Namona na baita helalotao, elda tauna danu dia ḡoevadae. Keriso sibona ena haheitalai baita tohotohoa.

¹⁹ Dala maorona ai elda taudia baita matauraidiamu, bona mai ladadia taudia heḡereḡeredia basita kara henidiamu neganai, idia baita durudiamu. Unu amo idia na basie hekokorokumu, bona basie lalomu idia ese ma haida e hereadia eiava idia sibodia na maoro.

20. Haida imatauraidia karana ese ita be ede be duruda tomamu?

²⁰ Haida imatauraidia karana ese ita be durudamu siboda eda namo basita laloamu. Bona be durudamu haida ese bae hanamoda neganai, basita hekokoroku. Danu hemataurai karana ese be durudamu Iehova ena orea ida baita ḡaukara heboumu; una orea ese taunimanima​—mai edia abidadama eiava asi edia abidadama taudia​—na se imodaidiamu. Una na aonega karana, badina ita be durudamu basita hekwakwanai bema ta matauraidiamu taudia ese laloda bae hahisi.

21. Dala maorona ai haida baita matauraidiamu ena hahenamo badana be dahaka?

²¹ Dala maorona ai haida baita matauraidiamu ena hahenamo badana binai, ita ese Dirava baita hamoaleamu. Iena ura heḡereḡerena baita kara bona Ia baita badinaia henia hanaihanai. Unu amo Dirava ese ia e gwau heniamu tauna baine haere henia diba. (Her. 27:11) Taunimanima momo na dia dala maorona ai hemataurai karana e hahedinaraiamu. To ita na ta moalemu badina Iehova ena dala heḡereḡerenai hemataurai karana ta hahedinaraiamu.