Wiki Ta Ta Ba Stadi Daladia
EMU STADI ba karaia hanaihanai bona ba moalelaia totona o hekwarahimu, a? Ita iboudai edai una na nega haida e varamu. To hanaihanai ta karaiamu ḡauna ta mani aita laloa, heḡereḡere digu. Ita na eda nega ta ḡaukaralaiamu bona ḡau ma haida ta karamu baita digu totona, to ta digumu murinai eda hemami na e namomu. Una heḡereḡerena, Baibul istadilaina karana ese ede hemami danu be hanamoamu. (Efe. 5:26) Ini dala haida mani ba tohodia:
Sediual ta ba karaia. Kristen tauna enai, Baibul istadilaina karana na ‘mai anina bada.’ (Fili. 1:10) Emu sediual ba badinaia totona, una sediual na ba itaia haraḡa diba gabuna ta ai bavatoa, heḡereḡere notis bod eiava fridge idurana ai ba kapaia kau. Eiava emu fon ai alarm ta bavatoa, unu amo emu stadi negana ai baine hahelalomutao.
Emu stadi negadia ba ha idau’idau diba. Ba stadi totona edena nega be namo oiemu ai? Hora ta lalonai o uramu ba stadi eiava emu nega ba hakwadoḡia. Oi sibomu mai dibamu edena nega ba nega namona. Unu iboudiai ba haero bena plen namona ta ba karaia. Reana emu stadi negana na vada e abia, to oi na doumu so uramu ba stadi be ede bamona? Reana miniti ten heḡereḡerena ba stadi. Una nega kwadoḡina lalonai oi na ḡau momo bo dibamu. Bena oi ese emu stadi negana na o moalelaiamu dainai, oi na bo uramu ba hadaudaua.—Fili. 2:13.
Ba stadilaia topik bavabia hidi guna. Bema emu stadi horana ai ba stadilaia ḡauna bo lalohadailaiamu, emu nega na basio ḡaukaralaia namonamomu. (Efe. 5:16) Una dainai o uramu ba stadilaia atikol eiava topik listina ba karaia. Bema henanadai ta na lalomu ai e daemu, ba torea diho haraḡa. Bona emu stadi negadia ta ta muridiai, o lalomu ḡaudia ma haida na una listi ai bavato.
Emu stadi dinadia ba haidau’idaudia diba. Mai anina bada ḡauna na wiki ta ta ai sibomu emu stadi ba karaia. Una dainai, o abia hidi dinana, negana bona horana na ba ha idau’idau diba bona topik idauidau ba stadilai.
Stadi hanaihanai karana na mai ena namo ita ta ta edai. Iehova ida eda hetura karana na be hagoadaiamu, eda mauri lalonai abi hidi maorodia baita karamu, bona goada baita abimu.—Ios. 1:8.
