Zistwar Bann Zapot 23:1-35
23 Pol ti get bann manb Sanedrin fran ek ti dir: “Mo bann frer, mo finn touzour konport mwa devan Bondie avek enn konsians kler ziska zordi.”
2 Lerla gran pret Ananias ti donn lord bann ki ti pe debout akote Pol pou bat li lor so labous.
3 Lerla Pol ti dir li: “Bondie pou tap twa, ipokrit.* Eski to pe asiz la pou ziz mwa dapre Lalwa ek anmemtan to pa respekte Lalwa kan to donn lord pou bat mwa?”
4 Bann ki ti pe debout la ti dir: “Eski to pe insilte gran pret Bondie?”
5 Me Pol ti dir: “Mo bann frer, mo pa ti kone gran pret sa. Parski finn ekrir, ‘Fode pa to koz an mal lor enn sef parmi to pep.’”
6 Pol ti kone ki enn parti Sanedrin ti bann Sadisein ek lot parti ti bann Farizien. Alor li ti dir bien for: “Mo bann frer, mo enn Farizien, desandan bann Farizien. Pe ziz mwa akoz mo krwar dan rezireksion bann mor.”
7 Akoz li ti dir sa, ti ena enn gran diskision ant bann Farizien ek bann Sadisein, ek group-la ti divize.
8 Parski bann Sadisein dir ki pena ni rezireksion ni anz ni bann kreatir invizib, me bann Farizien aksepte* tousala.
9 Alor zot ti koumans kriye, ek sertin exper Lalwa* parmi bann Farizien ti leve ek ti koumans proteste for-for. Zot ti dir: “Nou pena okenn repros pou fer sa zom-la, me si enn kreatir invizib ouswa enn anz inn koz ar li—.”
10 Kan diskision ti pe anpire, komandan larme ti per ki bann-la touy Pol, alor li ti donn lord bann solda pou desann ek pou ras Pol parmi bann-la ek pou amenn li dan kazern bann solda.
11 Me so lanwit apre, Lesegner ti debout akote li ek ti dir: “Pran kouraz! Parski parey kouma to’nn rann temwaniaz lor mwa afon dan Zerizalem, koumsa mem to pou bizin rann temwaniaz dan Rom.”
12 Kan ti ariv lizour, bann Zwif ti fer enn konplo ek ti fer enn serman* ki zot pa pou ni manze ni bwar tanki zot pa’nn touy Pol.
13 Ti ena plis ki 40 zom ki ti fer sa serman-la.
14 Sa bann zom-la ti al get bann sef pret ek bann ansien ek ti dir: “Nou’nn angaz nou par enn serman* pou pa manz nanye tanki nou pa’nn touy Pol.
15 Alor zot, ansam avek Sanedrin, bizin inform komandan larme ki li bizin amenn Pol devan zot, swadizan pou examinn so ka plis an detay. Me avan ki li vinn isi, nou pou’nn pare pou touy li.”
16 Selman, Pol so ser so garson ti tann koz lor konplo ki zot ti pe fer, ek li ti rant dan kazern bann solda ek ti rakont sa Pol.
17 Lerla Pol ti apel enn ofisie larme ek ti dir: “Amenn sa zenom-la kot komandan larme parski li ena enn kitsoz pou rakont li.”
18 Alor ofisie larme la ti amenn zenom-la kot komandan larme ek ti dir: “Sa prizonie ki apel Pol la inn apel mwa ek inn demann mwa pou amenn sa zenom-la kot twa parski li ena enn kitsoz pou dir twa.”
19 Komandan larme la ti trap so lame ek ti amenn li dan enn kwin ek ti demann li: “Ki to ena pou rakont mwa?”
20 Li ti dir: “Bann Zwif finn tom dakor pou demann twa pou amenn Pol devan Sanedrin demin, swadizan zot anvi gagn plis detay lor so ka.
21 Me pa les bann-la konvink twa, parski ena plis ki 40 parmi zot bann zom ki pe atann pou piez Pol, ek zot inn fer enn serman* ki zot pa pou ni manze ni bwar tanki zot pa’nn touy li; zot inn pare ek zot pe atann ki to donn zot lotorizasion.”
22 Lerla, komandan larme la ti donn sa lord-la zenom-la: “Pa dir personn ki to’nn dir mwa sa bann zafer-la.” Apre sa li ti les zenom-la ale.
23 Ek li ti apel de ofisie larme ek ti dir zot: “Prepar 200 solda ki pou marse, ek osi 70 kavalie ek 200 zom arme ar lans pou al Sezare ver nef-er aswar.*
24 Anplis, fer Pol gagn bann seval pou amenn li an sekirite kot gouverner Felix.”
25 Ek li ti ekrir enn let ki dir:
26 “Mwa Klod Lizias pou Onorab Gouverner Felix: Bonzour!
27 Bann Zwif ti’nn trap sa zom-la ek ti pre pou touy li, me mwa ek mo bann solda vit-vit inn ale ek inn sap li, parski mo finn aprann ki li enn Romin.
28 Mo ti anvi kone pou ki rezon zot ti pe akiz li, alor mo’nn amenn li devan zot Sanedrin.
29 Mo’nn aprann ki ti pe akiz li lor bann kitsoz konsernan zot Lalwa, me pena okenn sarz ki merit lamor ouswa prizon.
30 Me parski mo’nn al aprann ki ena enn konplo kont sa zom-la, deswit mo pe avoy li ar twa ek mo pe donn lord bann ki pe akiz li pou dir seki zot ena kont li devan twa.”
31 Alor parey kouma ti’nn donn zot lord, sa bann solda-la ti pran Pol ek ti amenn li Antipatris aswar.
32 So landemin bann kavalie ti kontign zot larout avek Pol, ek bann lezot solda ti retourn kazern bann solda.
33 Bann kavalie-la ti rant Sezare ek zot ti donn gouverner let-la ek zot ti osi livre Pol ar li.
34 Alor, li ti lir let-la ek li ti demann Pol ki provins li sorti ek li ti aprann ki li sorti Silisi.
35 Li ti dir: “Mo pou ekout bien to ka kan bann ki pe akiz twa vini.” Ek li ti donn lord pou ki bann gard vey li dan pale Erod.
Not
^ Ouswa “miray ki’nn penn an blan.”
^ Ouswa “dir an piblik ki ena.”
^ Get Lexplikasion Bann Mo.
^ Savedir ki zot ti krwar ki zot pou gagn enn malediksion si sa serman-la pa ti realize.
^ Savedir ki zot ti krwar ki zot pou gagn enn malediksion si sa serman-la pa ti realize.
^ Savedir ki zot ti krwar ki zot pou gagn enn malediksion si sa serman-la pa ti realize.
^ Lit., “apepre trwaziem-er.” Ti koumans kont sa kan soley ti kouse.
