DAPRE Lalwa Mozaik, ti kapav donn Zeova bann pizon ek bann tourtrel kouma sakrifis. Bann lalwa lor bann sakrifis ti touletan mansionn sa de zwazo-la ansam, ek sakenn ti kapav pran plas so kamarad. (Lev. 1:14; 12:8; 14:30) Kifer sa ti enn bon kitsoz ki Zeova ti aksepte sa de kalite zwazo-la? Enn rezon se parski, dan Izrael, pa ti gagn bann tourtrel toutlong lane.

Bann tourtrel, zot bann zwazo migrater. Zot res dan pei Izrael pandan bann mwa kot fer so. Sak lane, ver mwa Oktob, zot al dan lesid, dan bann pei kot fer pli so, ek zot retourn Izrael pandan printan. (Kantik S. 2:11, 12; Zer. 8:7) Alor, dan lepok Biblik, li ti difisil pou bann Izraelit pou donn bann tourtrel kouma sakrifis pandan liver.

Parkont, ti kapav gagn bann pizon toutlong lane dan Izrael parski zot pa bann zwazo migrater. Anplis, bann pizon ti bann zanimo domestik. (Konpar ar Zan 2:14, 16.) Dapre liv Bible Plants and Animals, “dan tou bann vilaz ek bann lavil dan Palestine, ti ena bann pizon domestik. Sak proprieter lakaz ti ena so lakaz zwazo (volier), ouswa li ti ena bann trou dan so miray kot bann zwazo ti kapav reste.”​—Konpar ar Izai 60:8.

Alor, toutlong lane, bann Izraelit ti kapav donn Zeova bann zwazo kouma sakrifis, ek sa montre ki Zeova ena lamour ek ki Li rezonab.