Profet Moiz ti dir ki si nou obeir bann komannman Bondie, nou pou gagn Bondie so benediksion. (Deteronom 10:13; 11:27) Nou pa obeir Bondie parski nou per ki Li pini nou. Okontrer, so bann zoli kalite pous nou pou obeir Li parski nou kontan Li ek nou pa anvi fer nanye ki kapav rann Li tris. “Kan nou kontan Bondie, nou obeir so komannman.”​—1 Zan 5:3.

Me kouma kan nou obeir Bondie nou gagn so benediksion? Anou get de fason.

“Mwa, Zeova, Momem to Bondie, Momem ki ansegn twa pou to profi, . . . ki gid twa lor semin ki to bizin marse.”​—IZAI 48:17.

Nou Kreater, Zeova, konn nou ek donn nou direksion ki nou bizin. Ki nou bizin fer si nou anvi ki so bann lansegnman ed nou pou pran bann desizion ki saz? Nou bizin lir bann Lekritir Sakre pou kone ki Bondie anvi nou fer ek lerla, met li an pratik.

“Bienere . . . seki ekout laparol Bondie e obeir li!”​—LIK 11:28.

Azordi, bann milyon dimounn ki obeir seki ena dan bann Lekritir Sakre konn vre boner. Anou pran enn lexanp, enn misie ki res dan Lespagn ti ena labitid ankoler vit ek tret lezot dan enn fason dir, parmi ena osi so madam. Enn zour li ti lir seki profet Moiz ti ekrir lor garson Zakob, setadir Zozef ki ti ena enn karakter dou. Mem si ti vann Zozef kouma enn esklav ek ti anprizonn li dan enn fason inzis, li ti res kalm, li ti prezerv lape, ek li ti pardone. (Zenez, sapit 37-45) Sa misie ki res Lespagn la ti dir: “Kan mo ti reflesi lor lexanp Zozef, sa ti pous mwa pou ena douser, bonte, ek metriz lor momem. Gras-a sa, zordi mo ere.”

Dan bann Lekritir Sakre ena lezot konsey lor fason ki nou bizin tret lezot. Nou pou gagn plis detay lor la, dan prosin lartik.