PRINSIP LABIB: “Vomie enn kikenn ki pa ankoler vit ki enn zom ki ena boukou lafors.”​—Proverb 16:32.

KI SAVEDIR: Nou gagn bann bienfe kan nou devlop kapasite pou kontrol nou bann santiman. Defwa li kapav arive ki nou ena enn bon rezon pou ankoler, me si nou pa kontrol nou koler, sa kapav fer boukou ditor. Bann resers ki’nn fer pa tro lontan montre ki, kan bann dimounn ankoler souvan zot dir ouswa fer bann kitsoz ki apre zot regrete.

KI OU KAPAV FER: Aprann kontrol ou koler avan ki li kontrol ou. Sertin dimounn panse ki bann dimounn ki ankoler zot for, me an realite zot feb. Labib dir ki ‘enn dimounn ki pa kontrol so koler li parey kouma enn lavil ki’nn defonse ek ki pena miray.’ (Proverb 25:28) Enn bon fason pou ed ou kontrol ou koler, se konpran seki’nn arive vremem avan ki ou dir ouswa fer enn kitsoz. Labib dir: “Kan enn dimounn konpran seki ena pli lwin, vremem sa ralanti so koler.” (Proverb 19:11) Li bon ki nou ekout bien tou bann dimounn ki inplike. Kan nou fer sa, nou pa pou les nou bann lemosion dominn nou.

PRINSIP LABIB: “Montre ki zot ena rekonesans.”​—Kolosien 3:15, NW.

KI SAVEDIR: Sertin dir ki se zis enn dimounn ki ena rekonesans ki kapav ere. Mem bann dimounn ki’nn perdi enn kikenn ouswa enn kitsoz ki ena boukou valer pou dir ki sa li vre. Zot dir ki seki’nn ed zot pou sirmont zot sagrin, se kiltiv rekonesans pou seki zot ankor ena olie ki zot kontign pans lor seki zot inn perdi.

 KI OU KAPAV FER: Sak zour, fer enn lalis bann kitsoz pou ki ou rekonesan. Sa pa oblize bann gran kitsoz. Reflesi osi lor bann ti kitsoz, kouma par exanp enn zoli konversasion avek enn kikenn ki ou kontan, enn soley ki pe leve, ouswa pou lavi ki ou ena. Sa bann kitsoz-la kapav fer ou plis ere si ou pans lor zot ek ena rekonesans pou sa.

Ou kapav osi gagn bann bienfe kan ou reflesi lor ou fami ek ou bann kamarad. Kifer ou kontan ki ou ena zot dan ou lavi? Kan ou’nn kone ki kitsoz ou apresie avek zot, dir zot sa, ouswa ekrir zot enn let, enn e-mail, ouswa enn mesaz. Sa pou ranforsi ou relasion avek lezot ek ou pou kapav gout lazwa ki ena kan done.​—Zistwar Bann Apot 20:35, NW.

KAN ENA BANN DISKISION ALE.

“Koumans enn lager, se koumadir ouver baraz enn rezervwar delo; avan ki lager eklate, ale.”​—PROVERB 17:14.

PA TRAKAS PLIS KI BIZIN POU LAVENIR.

“Zame pa trakase pou landemin, parski landemin pou ena so prop traka. Traka sak zour li ase.”​—MATIE 6:34, NW.

PA REAZIR DAPRE SEKI OU RESANTI DAN SA LER-LA, ME REFLESI BIEN AVAN.

“Kapasite pou reflesi pou vey lor twa ek disernman pou protez twa.”​—PROVERB 2:11.