Deux-trois fait depuis l’Angleterre pou aide ou trouvé kifer fodé jamais ou perdi l’espoir. Ou pou aussi trouvé seki ou kapav faire pou “envoye [ou] di-pain lor de l’eau,” setadir, seki ou kapav faire pou aide bann ki pankor prend position pou la verité.​—Eccl. 11:1.

Enn kitsoz bien important ki ou bizin ena, c’est perseverance. Ou bizin contigne reste attaché ar la verité ek ar Jéhovah. (Deut. 10:20) C’est seki Georgina ti faire. Kan li ti commence etudié la Bible avek bann Témoins de Jéhovah en 1970, so missié, Kyriacos, ti bien en colere. Kyriacos ti essaye faire Georgina arrete etudié, ti empeche bann Témoins rente kot li, ek li ti jette n’importe ki publication bann Témoins de Jéhovah ki li ti trouvé.

Kan Georgina ti commence assisté bann reunion, Kyriacos ti pli en colere encore. Enn jour li ti al la Salle du Royaume pou leve enn discussion. Kan enn soeur ti trouvé ki Kyriacos ti koz pli bien Grec ki Anglais, li ti telephone enn frere Grec dan enn lot congregation pou vinn aide zot. Kyriacos ti bien reagir parski sa frere-la ti koz bien avek li, ek pendant deux-trois mois, zot ti mem etudié la Bible ensam. Mais apré, Kyriacos ti arrete etudié.

Pendant trois l’année encore, Georgina ti contigne gagne l’opposition. Kyriacos ti dire ki li pou quitte Georgina si jamais li prend bapteme. Jour so bapteme, Georgina ti prié Jéhovah avek tou so leker pou ki Kyriacos pa quitte li. Kan bann Témoins ti vinn cherche Georgina pou al l’assemblée, Kyriacos ti dire zot: “Al toujours, nou pou suive zot dan nou l’auto.” Li ti assisté session gramatin ek ti guette so madame prend bapteme!

Apré sa, Kyriacos ti moins opposé, ek tigit-tigit li ti faire bann grand changement. Environ 40 an apré ki li ti zwenn bann Témoins pou premier fois, Georgina ti trouve so missié prend bapteme! Ki finn aide Kyriacos? Li dire: “Seki mo ti bien content avek Georgina, c’est li pa’nn laisse nanyé arrete li contigne adore Jéhovah.” Georgina dire: “Mem si mo missié ti opposé, mo pa ti pou arrete adore mo Bondié. Pendant tou sa le temps-la, mo’nn contigne prié Jéhovah, ek jamais mo’nn perdi l’espoir.”

Enn lot kitsoz ki kapav aide ou conjoint c’est kan ou developpe personnalité Chretien. L’apotre Pierre ti donne sa conseil-la bann femme: “Soumette ar zot prop mari, pou ki si ena ki pa oulé ecoute la parole, kapav gagne zot sans parole grace a conduite zot femme.” (1 Pierre 3:1) Christine ti suive sa conseil-la, mem si sa finn prend beaucoup l’année avant ki li’nn reussi gagne so mari. Plus ki 20 an avant, kan li ti vinn enn Témoin, so mari ki appel John pa ti croire dan Bondié. John pa ti envie implik li dan la religion, mais li ti remarké ki Christine li, so nouveau religion ti important pou li. Li dire: “Mo ti trouvé ki sa ti rann li heureux. Li ti gagne enn pli grand la force moral ek mo ti kapav compte lor li, ek sa finn aide moi dan plusieurs situation difficile.”

Jamais Christine finn force so mari pou accepté so bann croyance. So missié dire: “Christine ti realisé dan commencement-mem ki li ti pli bon ki pa koz religion ar moi, ek avek patience li’nn laisse moi aprann dapré mo prop vitesse ek dan mo fason.” Kan Christine ti trouve enn lartik dan La Tour de Garde ou-soit Réveillez-vous ! ki koz lor enn sujet ki li ti koné pou interesse John, couma lor science ou-soit la nature, li ti montré sa John ek ti dire: “Mo pensé ki to pou content lire sa.”

Avek le temps, John finn prend retraite ek ti commence faire bann ti travail jardinier. Parski li ti ena plus le temps, li ti commence reflechi lor bann question important concernant la vie. Li ti demann-li-mem: ‘Eski bann humain inn existé par hasard, ou-soit finn crée zot dan enn but?’ Enn jour enn frere avek ki John ti pé kozé ti demann li: “Ou pa ti pou content etudié?” John dire: “Asterla ki mo ti’nn commence croire dan Bondié, mo ti accepté so proposition.”

Heureusement, Christine jamais pa’nn perdi l’espoir! Apré ki li’nn prié pendant 20 an pou ki so mari kapav accepté la verité, enfin John ti baptisé. Azordi, avek zele, zot pé servi Jéhovah ensam. John dire: “Deux kitsoz ki finn surtout touche moi, c’est bonté ek gentillesse bann Témoins. Ek kan ou marié avek enn Témoin de Jéhovah, ou ena enn conjoint ki fidele, lor ki ou kapav compté, ek ki ena l’esprit sacrifice.” Christine inn mette en pratik bann parole ki ena dan 1 Pierre 3:1, ek sa inn marché!

Ki nou kapav dire concernant bann etudiant la Bible ki pou enn raison ou-soit enn lot perdi l’interet ki zot ti ena au commencement? Le Roi Salomon ti ecrire: “Dan gramatin, seme to bann la grain ek ziska a-soir pa laisse to la main reposé; parski to pa koné ki coté sa pou reussi, ici ou-soit la, ou-soit si toulé-deux pou bon pareil.” (Eccl. 11:6) Parfois la grain la verité prend beaucoup l’année avant ki li germé. Malgré sa, a la fin, enn dimoune kapav realisé ki li important pou vinn proche ar Bondié. (Jacq. 4:8) Oui, kitfois enn jour ou kapav gagne enn joli surprise.

Anou prend l’exemple Alice, ki ti quitte l’Inde pou al reste l’Angleterre. En 1974, li ti commence etudié la Bible. Li ti koz Hindi mais ti envie ameliore so Anglais. So l’etude ti contigné pendant deux-trois l’année, ek Alice ti assisté enn-deux reunion dan enn congregation Anglais. Li ti koné ki seki li ti pé etudié ti la verité, mais li ti considere sa couma enn passe-temps. En plus, seki ti pli important pou li c’est gagne beaucoup kass ek li ti content al dan bann fête. Finalement, Alice ti arrete etudié.

Preské 30 an apré, Alice ti envoye enn lettre Stella, ki ti pé faire so l’etude. Li ti ecrire: “Mo sur ki to pou bien content pou aprann ki sa kikenn avek ki to ti pé etudié la Bible en 1974-la finn prend bapteme pendant dernier l’assemblée district. To finn joué enn role bien important dan mo la vie. To finn plante la grain la verité dan mo leker, ek mem si sa lepok-la mo pa ti paré pou voué mo la vie ar Bondié, mo finn garde sa la grain-la dan mo l’esprit ek dan mo leker.”

Ki finn arrivé? Alice expliké ki li ti bien deprimé kan so missié ti mort en 1997. Li ti prié Bondié. Dan l’espace dix minute, deux Témoins ki koz Punjabi ti vinn tape so la porte ek ti donne li tract Quel espoir y a-t-il pour nos chers disparus ? Alice ti senti ki Bondié ti reponn so la priere ek li ti decidé pou reprend contact avek bann Témoins de Jéhovah. Mais kot-sa li ti pou zwenn zot? Li ti trouve enn vié carnet kot ti ena l’adresse enn congregation Punjabi ki Stella ti donne li. Alice ti al sa la Salle du Royaume-la ek bann frere ek soeur ki koz Punjabi ti bien accueillir li. Alice dire: “Mem kan mo ti retourne kot moi, mo ti encore pé ressenti l’amour ki bann frere ek soeur ti manifesté envers moi ek sa ti soulage moi ek mo ti moins deprimé.”

Li ti commence assisté bann reunion regulierement ek li ti recommence so l’etude la Bible. Li ti aussi aprann pou koz ek pou lire bien Punjabi. En 2003, li ti prend bapteme. Li ti termine lettre ki li ti ecrire Stella coumsa: “Inn gagne 29 an depuis ki to’nn plante sa bann la grain-la [dan mo leker]; mo remercié toi beaucoup pou sa ek pou bon l’exemple ki to’nn laisse moi pou suive.”

“Inn gagne 29 an depuis ki to’nn plante sa bann la grain-la [dan mo leker]; mo remercié toi beaucoup pou sa ek pou bon l’exemple ki to’nn laisse moi pou suive.”​—Alice

Ki ou kapav aprann ar sa bann l’exemple-la? Kitfois sa kapav prend plus le temps ki ou pensé, mais kan enn dimoune faim lor plan spirituel, li sincere ek humble, Jéhovah pou permette ki la verité grandi dan so leker. Rappel seki Jésus ti dire dan enn l’exemple: “Bann la grain-la germé ek grandi, sans ki [planteur-la] koné couma. Par li-mem avek le temps la terre rapporte bann fruit doucement-doucement: d’abord enn brin l’herbe, apré enn zepi, enfin, bann la grain ki’nn formé net dan zepi-la.” (Marc 4:27, 28) Sa qualité croissance-la arrivé tigit-tigit ek “par li-mem.” Avredir, chaque proclamateur Royaume Bondié pa koné couma sa passé. Alors, contigne semé en abondance. Kitfois ou pou recolté en abondance.

Ek pa blié ki la priere bien important. Georgina ek Christine ti contigne prié Jéhovah. Si ou contigne “perseveré dan la priere” ek jamais perdi l’espoir, “apré plusieurs jour,” kitfois ou kapav retrouve “di-pain” ki ou ti envoyé lor de l’eau, setadir bann bon resultat ou dur travail.​—Rom. 12:12; Eccl. 11:1.