Mo finn ne dan Székesfehérvár (Hongrie), enn lavil ki ena enn listwar plis ki 1000 an. Malerezman, mo ankor rapel bann sikatris ki Deziem Lager Mondial finn lese laba.

Mo bann gran-paran ti elve mwa kan mo ti bien tipti. Mo ankor rapel zot, sirtou mo granmer Elisabeth. Li finn ed mwa pou ena enn lafwa solid an Bondie. Depi laz trwa-z-an, toule swar mo ti pe repet avek li lapriyer ki boukou dimounn apel Notre Père. Malgre sa, se zis kan mo ti pre pou gagn 30 an ki mo’nn konpran sinifikasion sa lapriyer-la.

Kan mo ti tipti se mo bann gran-paran ki finn okip mwa parski mo bann paran ti pe travay lanwit-lizour. Zot ti pe ramas kas pou aste enn lakaz. Toule deziem Samdi dimwa, lafami an-antie ti zwenn pou enn repa. Mo ti bien kontan sa bann moman ki nou ti pase ansam la.

An 1958, rev mo bann paran finn realize; zot ti reisi aste enn lakaz pou nou trwa. Finalman, mo ti kapav al res avek mo bann paran​—mo ti extra kontan! Malerezman, sis mwa apre, sa lazwa-la finn anvole. Mo papa finn mor avek enn kanser.

Mo ti bien soufer. Mo rapel mo ti pe priye: “Bondie, mo ti sipliye twa pou sap mo papa. Mo bizin li. Kifer to pa’nn reponn mo bann lapriyer?” Mo ti bien anvi kone kot mo papa ti ete. Mo ti demann momem: ‘Eski li’nn al dan lesiel? Ouswa eski li’nn aret existe pou touletan?’ Mo ti zalou bann lezot zanfan ki ti ankor ena zot papa.

Pandan plizir lane, mo ti al simitier preske toulezour. Mo ti azenou devan tom mo papa ek mo ti priye: “Silteple, Bondie, mo anvi kone kot mo papa ete.” Mo ti osi priye pou ki Li ed mwa konpran kifer nou existe.

Kan mo ti ena 13 an mo finn desid pou aprann Alman. Mo ti panse ki si mo lir bann liv literatir Alman, mo  pou gagn repons mo bann kestion. An 1967, mo ti koumans etidie dan lavil Iéna, ki ti form parti dan Les Allemagne sa lepok-la. Mo ti bien kontan pou lir bann liv ki bann filozof Alman ti ekrir, sirtou bann liv ki ti koz lor kifer nou existe. Mem si mo ti trouv sertin lide interesan, mo pa ti tro satisfe avek bann repons ki mo’nn gagne. Mo ti kontign priye pou gagn repons.

An 1970, mo finn retourn Hongrie kot mo finn zwenn mo fitir madam, Rose. Sa lepok-la, Hongrie ti enn pei Kominist. Apre ki nou’nn marye, Rose ek mwa, nou’nn sove pou al l’Autriche. Nou ti ena lobzektif pou al res l’Australie dan Sydney, kot mo tonton ti reste.

Bien vit mo finn gagn enn travay dan l’Autriche. Enn zour enn kamarad travay ti dir mwa ki mo pou kapav gagn repons mo bann kestion dan Labib. Li ti donn mwa plizir liv ki ti koz lor Labib. Mo pa’nn tarde pou lir sa bann liv-la ek mo ti anvi aprann plis. Alor, mo’nn ekrir bann Temwin Zeova ki ti pibliye sa bann liv-la ek mo ti demann zot pou gagn lezot liv.

Zour nou premie laniverser maryaz, enn zenn Temwin Zeova ti vizit nou. Li ti amenn bann piblikasion ki mo ti demande ek kan li finn propoz mwa enn letid Labib, mo finn aksepte. Mo ti bien anvi aprann, akoz sa nou ti etidie de fwa par semenn​—letid ti dir apepre kat-r-er tan!

Mo ti bien kontan seki bann Temwin Zeova ti ansegn mwa dan Labib. Kan zot finn montre mwa nom Bondie, Zeova, dan mo prop Labib an Ongrwa, mo pa ti’le krwar. Pandan 27 an ki mo finn al legliz, zame mo pa finn tann bannla mansionn nom Bondie, pa mem enn sel fwa! Mo ti inpresione par bann repons kler ek lozik ki Labib ti done. Par exanp, mo ti aprann ki bann mor, zot pa konsian, koumadir zot dan enn somey profon. (Ekleziast 9:5, 10; Zan 11:11-15) Mo finn osi aprann promes ki Labib fer, ki enn zour pou ena enn lemond nouvo kot ‘pa pou ena lamor.’ (Revelasion 21:3, 4) Mo ena lespwar pou retrouv mo papa, parski dan sa lemond nouvo la, “pou ena rezireksion.”​—Zistwar Bann Apot 24:15.

Plitar Rose osi finn bien kontan pou etidie Labib ansam avek mwa. Bien vit, nou finn fer bann progre, dan zis de mwa nou ti fini nou liv! Nou ti asiste tou bann renion dan Lasal bann Temwin Zeova. Nou ti inpresione ar lamour, korperasion ek linite ki ena parmi bann Temwin Zeova.​—Zan 13:34, 35.

An 1976, Rose ek mwa finn gagn permi pou al res l’Australie. Deswit nou finn rod bann Temwin Zeova. Zot finn met nou bien alez. An 1978, nou’nn vinn bann Temwin Zeova.

Finalman mo’nn reisi gagn repons bann kestion ki mo ti pe rode depi bien lontan. Kan mo finn apros mwa avek Zeova, mo finn gagn pli bon Papa ki mo ti kapav panse. (Zak 4:8) Lespwar ki mo ena pou retrouv mo papa kan li pou resisite dan lemond nouvo ena boukou valer pou mwa.​—Zan 5:28, 29.

An 1989, Rose ek mwa finn desid pou retourn Hongrie pou ki nou kapav partaz nou bann krwayans avek nou bann kamarad, nou bann fami ek osi avek bann dimounn ki nou zwenn. Nou finn gagn privilez pou ansegn plizir santenn dimounn lor Labib. Plis ki 70 ladan finn zwenn ar nou pou servi Zeova, parmi ena mo mama.

Pandan 17 an mo finn priye pou gagn repons mo bann kestion. Trant-nef-an finn pase, ek mo ankor pe priye​—me asterla mo kapav dir: “Mersi, mo Papa ki dan lesiel, to’nn reponn bann lapriyer ki mo ti fer dan mo lanfans.”