Bann kamarad kominike pou devlop enn bon lamitie. Bondie osi demann nou pou koz avek Li, ek koumsa nou kapav devlop enn bon lamitie avek Li. Li dir: “To pou apel mwa ek to pou vinn priye mwa, ek mo pou ekout twa.” (Zeremi 29:12) Amezir ou koz avek Bondie, ou pou ‘apros ou ar li ek li pou vinn pros ar ou.’ (Zak 4:8) Labib rasir nou: “Zeova pre ar tou bann ki priye Li pou gagn so led.” (Psom 145:18, NW.) Plis nou priye Bondie, plis nou lamitie avek Li pou grandi.

Zezi ti dir: “Kisannla parmi zot, ki si so garson dimann dipin, li donn li enn ros; si li dimann pwason, pou donn li enn serpan? . . . Zot kone kouma donn bon kado zot zanfan, alor ki kantite bon kiksoz anplis zot Papa ki dan lesiel pou donn zot kan zot dimann li.” (Matie 7:9-11) Bondie demann ou pou priye Li parski “li pran [ou] swin” ek Li anvi ed ou. (1 Pier 5:7) Li mem demann ou pou dir Li ou bann problem. Labib dir: “Napa bizin zot trakase ditou, me dan ninport ki sitiasion, avek enn leker rekonesan, ofer zot lapriyer ek siplikasion Bondie.”​—Filipien 4:6.

Bann exper ki etidie konportman bann imin inn trouve ki pou plizir milyon dimounn, lapriyer se enn kitsoz inportan. Parmi ena mem bann ki pa krwar dan Bondie ouswa ki dout so lexistans. a Sa konfirme ki bann dimounn bizin Bondie dan zot lavi. Zezi ti dir: “Ere bann ki rekonet ki zot bizin direksion Bondie dan zot lavi.” (Matie 5:3, NW.) Enn fason pou gagn sa direksion-la, se kan nou priye Bondie regilierman.

Si nou priye Bondie, kouma sa kapav ed nou?