Enn maryaz pa kapav ere si bann konzwin ena dout ek pa fer konfians zot kamarad. Kouma to kapav evit zalou pou nanye?

Dan sa lartik-la, nou pou gete

•  Ki ete zalouzi?

•  Ki kitsoz fer enn kikenn zalou pou nanye?

•  Kouma to kapav kontrol to zalouzi?

•  Si to konzwin zalou

•  Bann kestion ki bann koup kapav poz zotmem

 Ki ete zalouzi?

 Mo “zalouzi” kapav vedir diferan kitsoz. Dan sa lartik-la, nou pou gete seki nou resanti kan nou panse ki enn kikenn ena santiman pou nou konzwin ouswa ki nou konzwin interese avek enn lot dimounn. Nou kapav panse ki nou maryaz an danze. Ek si to dan sa sitiasion-la, li normal ki to pou zalou. Apre tou, maryaz se relasion pli pros ki existe ant de dimounn, ek enn koup bizin fer zot best pou protez zot maryaz.

 Prinsip Labib: “Zot nepli de, me enn sel laser. . . . Fode pa ki zom separ seki Bondie finn met ansam.”​—Matie 19:6.

 “Si to santi ki to maryaz menase, zalouzi kapav azir kouma enn detekter lafime, li fer twa kone ki ena enn danze ek li pous twa pou pran bann aksion.”​—Benjamin.

 Kan enn kikenn zalou pou nanye, li dout so konzwin san ki li ena okenn prev. Si nou vremem kontan nou konzwin nou pa pou zalou pou nanye. (1 Korintien 13:4, 7) Dr. Robert L. Leahy dir: “Kan enn kikenn zalou pou nanye li detrir relasion ki li anvi proteze.” a

 Ki kitsoz fer enn kikenn zalou pou nanye?

 Kitfwa to ena tandans pou zalou pou nanye parski dan lepase to konzwin inn trayir twa. Ouswa maryaz to bann paran inn kase akoz ladilter ek to per ki ariv mem zafer dan to maryaz.

 “Mo papa ti tronp mo mama kan mo ti ankor zenn ek akoz sa li difisil pou fer konfians lezot. Sa ti telman afekte mwa ki parfwa li difisil pou fer konfians mo misie.”​—Melissa.

 Enn lot rezon: Kan to pa santi twa an sekirite dan to maryaz, to kapav panse ki lezot pe rod kas to maryaz. To kapav konvink tomem ki ninport kan to konzwin kapav kit twa ek al avek enn lot.

 “Mo misie so kamarad ti demann li pou fer garson-doner dan so maryaz. Savedir li ti bizin marse ek danse avek enn fidoner ek mo pa ti dakor avek sa. Li ti bizin dir non.”​—Naomi.

 Bann koutim maryaz pa parey dan tou pei me bann Kretien bizin swiv bann prinsip Labib. Eski Naomi ti ena rezon pou azir koumsa? Kan li’nn pran letan pou pans lor la li’nn trouve ki li pa ti ena okenn rezon pou zalou. Li dir: “Mo pa ti santi mwa an sekirite dan sa moman-la, mo ti panse ki mo misie pou konpar mwa avek lezot madam, me tousala ti dan mo latet.”

 Pou ninport ki rezon to ena sa santiman-la, si to zalou pou nanye, sa kapav fer twa akiz to konzwin ki li infidel. Lerla sa kalite santiman la kapav detrir to maryaz ek fer twa gagn problem lasante.

 Prinsip Labib: “Zalouzi li enn maladi ki manz lezo.”​—Proverb 14:30.

 Kouma to kapav kontrol to zalouzi?

 Ranforsi to konfians. Olie ki to dout to konzwin reflesi lor bann kitsoz ki li finn fer pou gagn to konfians.

 “Mo pans lor bann bon kalite mo misie. Kan li azir bien anver enn kikenn se pa ki li ena enn move lintansion, se parski li gagn traka sa dimounn-la. Mo bizin rapel momem ki mo maryaz, li pa parey kouma maryaz mo bann paran.”​—Melissa.

 Pa doute. Dr. Leahy, inn ekrir: “Souvan nou panse ki seki ena dan nou latet, li vre. Nou telman sir lor la, ki sa li vinn enn prev. Me sa pa vedir ki seki nou krwar ek seki nou resanti, li vre ek li enn prev.” b

 “Kan enn sitiasion pe arive ek ki to pe imazinn bann kitsoz ki pa vre lerla sa kapav kre enn problem dan to maryaz.”​—Nadine.

 Koz lor seki pe trakas twa. Explik to konzwin pou ki rezon to pe zalou, koumsa zot kapav deside ki pou fer ek trouv bann solision rezonab pou ki toulede santi zot bien ek an sekirite dan zot maryaz.

 “Kan to gagn sa bann konversasion-la, pa panse ki to konzwin anvi bles twa, kitfwa li osi pe esey fer bann kitsoz dan enn bon fason. Pa dout li. Kitfwa to tro sansib ouswa to atann plis. Kapav osi to konzwin pa pe realize ki li pa pe donn twa latansion ki to bizin.”​—Ciara.

 Prinsip Labib: “Ki sakenn kontign rod lintere lezot, me pa so prop lintere.”​—1 Korintien 10:24.