Non. Dan enn fason bien kler, Labib dir ki Bondie ti kree bann dimounn, ek osi bann zanimo ek bann plant sakenn dapre so “lespes” ouswa “varyete.” a (Zenez 1:12, 21, 25, 27; Revelasion 4:11, NTKM) Li dir ki nou bann imin, nou bann desandan Adan ek Ev, nou bann premie paran. (Zenez 3:20; 4:1) Labib pa dir ki Bondie finn servi levolision pou kree bann diferan form lavi. Me selman, seki Labib dir pa al kont bann remark ki bann siantifik fer lor bann diferan varyete ki ena dan sak lespes.

•  Ki sertin dimounn panse?

•  Eski levolision li an-akor avek seki Labib dir?

•  Ki nou kapav dir lor kapasite ki bann plant ek bann zanimo ena pou adapte?

 Bann dimounn ki krwar ki Bondie finn servi levolision pou kree lavi, ena bann diferan lide lor kouma Bondie finn fer sa. Dapre Encyclopædia Britannica, sertin dimounn panse “ki Bondie finn servi seleksion natirel b pou ki Li kapav kontrol lanatir.”

 Levolision kapav osi inplik sa bann lide-la:

•   Tou bann kitsoz ki vivan sorti depi enn sel anset ki’nn existe depi bien lontan.

•   Enn form lavi kapav evolie ek vinn enn lot form lavi ki bien diferan.

•   Dan enn sertin fason, se Bondie ki deryer sa.

 Teori levolision donn lide ki seki’nn ekrir dan Zenez pa exakt san poursan. Parkont, Zezi ti koz lor liv Zenez kouma enn kitsoz ki’nn vremem arive dan Listwar. (Zenez 1:26, 27; 2:18-24; Matie 19:4-6, NTKM) Labib dir ki avan ki Zezi vinn lor later, li ti pe viv dan lesiel avek Bondie ek ki li ti ed Bondie pou ki ‘tou kitsoz existe.’ (Zan 1:3, NTKM) Alor, lide ki Bondie finn servi levolision pou ki ena bann diferan form lavi pa an-akor avek seki Labib ansegne.

 Labib pa dir ki kantite varyete kapav ena dan enn lespes. Ek li pa al kont lide ki kapav ena bann lezot varyete amezir ki bann zanimo ek bann plant miltipliye ouswa adapte ar zot nouvo lanvironnman. Mem si sertin dimounn konsider sa kouma enn levolision, pena okenn nouvo form lavi ki’nn kree atraver sa.