Kouma Zezi Ti Ete?
Seki Labib dir
Personn pa kone exakteman kouma Zezi ti ete fizikman, parski Labib pa koz lor la. Sa montre ki so laparans pa ti inportan. Me Labib donn nou sertin detay ki kapav ed nou pou kone kouma Zezi kitfwa ti ete.
So laparans: Zezi ti enn Zwif, alor sirman li ti ena bann tre Zwif parey kouma so mama. (Ebre 7:14, NTKM) Li paret ki li pa ti ena okenn tre partikilie ki ti rann li diferan ar lezot. Enn fwa, li ti sorti Galile pou al Zerizalem ek personn pa ti rekonet li. (Zan 7:10, 11, NTKM) Mem kan li ti avek so bann disip, li pa ti fasil pou fer diferans ant li ek so bann disip. Akoz sa, kan enn lafoul dimounn ti vini pou aret Zezi, Zida ti bizin montre sa lafoul-la kisannla Zezi.—Matie 26:47-49, NTKM.
Longer seve: Li paret ki Zezi pa ti ena long seve, parski Labib dir ki “li enn laont ki zom gard long seve.”—1 Korintien 11:14, NTKM.
Labarb: Zezi ti ena labarb. Li ti swiv lalwa bann Zwif, ki dir ki fode pa ki bann zom ‘tay zot labarb sirlekote.’ (Levitik 19:27; Galat 4:4, NTKM) Anplis, parmi bann profesi ki ena dan Labib ek ki koz lor Zezi, ena enn profesi ki koz lor so bann soufrans ek so labarb.—Izai 50:6.
Lekor: Dapre seki Labib dir, li paret ki Zezi ti enn zom for. Li ti mars boukou kilomet pou pres ar bann dimounn. (Matie 9:35, NTKM) De fwa li ti pirifie tanp Zwif. Li ti devir anba lao latab bann marsan ek li ti servi enn fwet pou pous zot ek zot bann zanimo andeor tanp. (Lik 19:45, 46, NTKM; Zan 2:14, 15, NTKM) Dapre ansiklopedi McClintock and Strong, ‘tou seki nou lir konsernan Zezi dan bann levanzil montre ki li ti enn zom for ek ki li ti ena enn bon lasante.’—Volim IV, paz 884.
Lexpresion so figir: Zezi ti enn kikenn ki dou ek ki ena konpasion ek sirman so figir ti reflet sa bann kalite-la. (Matie 11:28, 29, NTKM) Tou sort kalite dimounn ti rod rekonfort ek led ar li. (Lik 5:12, 13, NTKM; 7:37, 38, NTKM).Mem bann zanfan ti santi zot alez avek li.—Matie 19:13-15; Mark 9:35-37, NTKM.
Seki bann dimounn panse lor Zezi
Seki bann dimounn panse: Sertin dimounn panse ki Zezi kitfwa ti enn desandan Afriken, parski liv Revelasion konpar so seve ar lalenn ek so lipie ar “bronz bien poli dan four.”—Revelasion 1:14, 15, The New Jerusalem Bible.
Realite: Liv Revelasion servi boukou sinbol. (Revelasion 1:1) Li servi enn langaz sinbolik pou koz lor seve ek lipie Zezi ek sa reprezant bann kalite ki Zezi ti ena apre so rezireksion. Li pa pe koz lor Zezi so laparans kan li ti lor later. Kan Revelasion 1:14 koz lor Zezi so latet ek so seve ki ti blan parey kouma lalenn blan, li pe koz lor kouler, pa lor laspe. Sa montre ki li ena boukou sazes parski li’nn viv pandan bien lontan. (Revelasion 3:14) Alor sa verse-la pa pe konpar Zezi so seve ar koton ni ar lanez.
Zezi “so lipie ti briye parey kouma bronz bien poli dan four.” (Revelasion 1:15, NTKM) Anplis, so figir “ti briye parey kouma soley midi.” (Revelasion 1:16, NTKM) Pena okenn ras ki ena enn kouler lapo kouma sa bann deskripsion-la, alor sa vizion-la li sinbolik. Li koz lor Zezi ki’nn resisite ek ki “res dan enn lalimier ki personn pa kapav aprose.”—1 Timote 6:16, NTKM.
Seki bann dimounn panse: Zezi ti feb ek ti frel-frel.
Realite: Zezi ti enn zom bien for. Par exanp, avek kouraz li ti prezant limem devan enn lafoul ki ti vinn aret li. (Zan 18:4-8, NTKM) Kitfwa osi, Zezi ti bien kosto parski li ti travay kouma enn sarpantie ek li ti servi bann zouti ki enn sarpantie servi.—Mark 6:3, NTKM.
Me alor, kifer Zezi ti bizin led pou sarye so poto soufrans? Ek kifer li’nn mor avan bann lezot dimounn ki ti kondane anmemtan ki li? (Lik 23:26; Zan 19:31-33) Zis avan so lamor, Zezi ti bien feb fizikman. Enn nwit li pa’nn dormi parski li ti dan enn gran langwas. (Lik 22:42-44, NTKM) Pandan lanwit, bann Zwif ti maltret li ek landemin gramatin bann Romin ti tortir li. (Matie 26:67, 68, NTKM; Zan 19:1-3, NTKM) Akoz tousala, Zezi inn mor pli vit.
Seki bann dimounn panse: Zezi ti touletan tris ek mosad-mosad.
Realite: Zezi ti reflet bann kalite so papa dan enn fason parfe. Kan Labib koz lor Zeova, li dir ki Li enn “Bondie ere.” (1 Timote 1:11; Zan 14:9, NTKM) An realite, kan Zezi ti ansegn bann dimounn, li ti montre zot kouma zot kapav ere. (Matie 5:3-9, NTKM; Lik 11:28, NTKM) Tousala montre nou ki Zezi ti enn kikenn zwaye ek sa ti paret lor so figir
Ena Osi
ESSENTIAL BIBLE TEACHINGS
Kouma Nou Kapav Sir ki Labib Dir Laverite?
Si se Bondie ki finn fer ekrir Labib, alor li bizin diferan ar ninport ki liv ki finn ekrir.
KISANNLA NOU ETE?
Demann enn Vizit
Gagn repons enn kestion dan Labib, ouswa aprann plis lor bann Temwin Zeova.