Lager Armagedon fer referans ar dernie lager ki pou ena ant bann gouvernman imin ek Bondie. Sa bann gouvernman-la ek zot bann partizan pe opoz zot ar Bondie ek pe refiz pou obeir Li. (Psom 2:2, Psom an Kreol Morisien, PKM) Pandan lager Armagedon tou bann gouvernman imin pou detrir.​—Daniel 2:44.

 Dan Labib, mo “Armagedon” aparet enn sel fwa dan Revelasion 16:16. Bann profesi ki ena dan liv Revelasion montre ki dan “landrwa ki apel Armagedon,” “bann lerwa lemond antie, pou rasanble . . . pou lager kan gran zour Bondie Toupwisan arive.”​—Revelasion 16:14, Nouvo Testaman Dan Kreol Morisien, NTKM.

 Kisann-la pou lager pandan Armagedon? Zezi Kris pou diriz enn gran larme ki dan lesiel ek zot pou lager kont bann lennmi Bondie. (Revelasion 19:11-16, 19-21, NTKM) Parmi sa bann lennmi-la, ena ki opoz zot ar Bondie ek pa respekte Li.​—Ezekiel 39:7.

 Eski lager Armagedon pou dan Lwes Lazi? Non. Lager Armagedon pou lor later antie.​—Zeremi 25:32-34; Ezekiel 39:17-20.

 Armagedon, ki parfwa ekrir koumsa “Har–Magedon” (Ebre Har Meghiddôn), vedir “Montagn Megido.” Megido ti enn lavil ki ti trouv dan Izrael, dan lepok lontan. Listwar montre ki’nn ena bann gran lager ki’nn arive dan sa landrwa-la. Sertin sa bann lager-la mansione dan Labib. (Ziz 5:19, 20; 2 Lerwa 9:27; 23:29) Me selman, Armagedon pa kapav fer referans ar enn plas pre kot Megido. Ofet, pena okenn gran montagn laba, ek pena ase plas dan laplenn Yizreel pou tou bann ki pou lager kont Bondie. Alor, Armagedon fer referans ar sitiasion ki pou ena dan lemond, kan tou bann gouvernman imin pou lager kont gouvernman Bondie.

 Ki pou arive pandan lager Armagedon? Mem si nou pa kone kouma Bondie pou servi so pwisans, kitfwa Li pou servi bann kitsoz ki Li ti servi dan lepase, kouma lagrel, tranbleman-de-ter, inondasion, dife, zekler, ek bann maladi. (Zob 38:22, 23; Ezekiel 38:19, 22; Abakuk 3:10, 11; Zakari 14:12) Sertin parmi bann lennmi Bondie pou dan konfizion ek zot pou touy zot ant zotmem, me alafin zot pou realize ki se Bondie ki pe lager kont zot.​—Ezekiel 38:21, 23; Zakari 14:13.

 Eski Armagedon se lafin lemond? Armagedon pa pou detrir later, parski Bondie finn donn nou later pou ki nou viv lor la pou touletan. (Psom 37:29, PKM; 96:10, PKM; Ekleziast 1:4) Armagedon pa pou detrir limanite, okontrer li pou sov li. Labib dir ki “enn gran lafoul” bann serviter Bondie pou sirviv.​—Revelasion 7:9, 14, NTKM; Psom 37:34, PKM.

 Dan Labib, mo “lemond” souvan fer referans ar bann ki pa anvi obeir Bondie. (1 Zan 2:15-17) Se dan sa sans-la ki Armagedon pou amenn “lafin-dimonn.”​—Matie 24:3, NTKM.

 Kan pou ena Armagedon? Konsernan moman ‘kot pou ena pli boukou soufrans’ ek ki pou fini avek lager Armagedon, Zezi ti dir: “Ki zour, ki ler, personn pa kone, ni bann anz dan lesiel, ni mem Garson Limanite, zis papa la tousel kone.” (Matie 24:21, 36, NTKM) Parkont, Labib dir ki Armagedon pou arive pandan prezans Zezi, ki invizib, ek ki’nn koumanse depi 1914.​—Matie 24:37-39.