Ihapari Comaana Cantikhiye ni Matewus 5:1-48
-
MWAHA WAATAPHULENLYAAWE YESU UMWAAKONI (1-48)
5 Waawonnyaawe atthwaayo, Yesu ahowela umwaakoni. Wonkoma wawe, eetthuci yahowa mpaka nipuro naaryaawe.
2 Vano, uyo ahanca uwiitthuciha eeraka:
3 “Ahocaaliya ale ancuwela wiira ahaana yacuwelaka malakihero a Nluku, kontha Umwene wa Nluku owiirimu, ukhanle waawaya.
4 “Ahocaaliya ale anonla, kontha anaahala umaalihiya.
5 “Ahocaaliya atthu owiiyeviha, kontha ayo anaahala waakhela iparakha yookhala watuninyani mpaka.
6 “Ahocaaliya ale unaacivela woona yeetteliyaka isariya, kontha anaahala ukhala ilapo inhala weetteliya isariya ca Nluku.
7 “Ahocaaliya ale anaalevelela akhunanaya, kontha naayova anaahala uleveleliya.
8 “Ahocaaliya ale ahirina wanrimani waya ni mmoopuweleloni waya citthu coohinamaana, kontha ayo anaahala umoona* Nluku.
9 “Ahocaaliya ale unaacivela ukhala ninnema naakhunanaya, kontha anaahala wiihaniya asaana a Nluku.
10 “Ahocaaliya ale anlupatthiya nlattu woweettela isariya, kontha Umwene wa Nluku ukhanle waawaya.
11 “Nhocaaliya nyuuva mwaruwanakaciyaka ni mwahuvihaciyaka naatthu, ni yawootheryakani khula itthu yoohinamaana nlattu waawaka.
12 Ntteeliye nrima ni ntthape cinene, ukhala wiira Nluku naahala wuutthuvelani cinene; kontha commo phaalupatthiyaaya ale yaalalyaa moolumo a Nluku khalayi.
13 “Va watuninyani va, nyuuva mwaatthiva nnolikanaca ni maakha. Masi maakha yahiyaka uciva waya, tipani nokhitiri uturusela uciva wayanwo? Ayo khankhalana-tho ifayita, uhikhanle paasi urihiya, ni atthu anaahala unyakelaca.
14 “Va watuninyani wooripela vaa, nyuuva mwatthiva nnolikanaca ninthuko. Khawankhitiryaa wiipithihiya isittatti iri waculu mwaako.
15 Atthu yaparihelaka nthuko khankhuneela niitthuttu, masi aneesa wameecani wiira waamwaleele atthu otheene owapuwani.
16 Inanna imocaaru, nwoonihere apinaatamu meettelweenyu omaana, wiira yoone citthu comaana cimpankeenyu ni wiira yaattitthimihe Apaapeenyu ari wiirimu.
17 “Nhuupuwele wiira kaawile umalamaliha Malamulo a Moceesi, awula citthu ceetthucihaaya maporofeeta.* Akaawile umalamaliha, masi kaawile wiirannyeeha citthu cotheene.
18 Nkupali wiira khawanhala urika irimu ni ituninya umalamala, masi khunhala ukhitirya umalamala ileetra yankaani awula itraasu yankaani Yomalamulo, woohirannya citthu cotheene.
19 Phimaana, ule hineewelela ala malamulwaala atthu akhwaawe anoonaaya uhikhalana ifayitaayo, ni nowiitthuciha atthu akhwaawe ciicammo uhiiwelela, khanhala ukela Muumweneni wo wiirimu. Masi, ule neewelela ayo malamulwaayo ni nowiitthuciha akhwaawe wiiwelela, naahala ukela Muumweneni wo wiirimu.
20 Masi mi kinwiirelani, mwaahikhalaneke waamini venci waapwaha anamantikha ni mafariseu,* nyuuva khannohala ukela Muumweneni wo wiirimu.
21 “Nyuuva nnaacuwela itthu yaahimeriyaaya atthu okhalayi, ayo yeereliye co: ‘Nhiive, ule nohala wiiva naahala uhukhumwiya utiripunaali yosariya.’
22 Masi mi kinwiirelani co: Ule nohala uhihiyerera unviruwela munnaawe, atthuna pooti uhaleelaka ukumi woohimala; ni ule nohala unveehakaca munnaawe, naahala uhukhumwiya itiripunaali yuulupale; vano ule nohala umwiirela munnaawe co: ‘Ntirikhi noohiphureliya itthu!’ naahala uvonyeriya Ncehena.*
23 “Phimaana, mwakusaka itthuvweenyu wiira mwavaherere wakhilompeni,* vano nnaryeene wonwo nuwuupuwela wiira munneenyu hooviruwelani,
24 nhiye itthuvweenywiiyo nipuro niryaaya ikhilompiiyo ni nrwee mwammalamalihe nanrokottole nrineenyu ni munneenyu. Vano nturuwe wiira mwaavahe itthuvweeyo.
25 Ookhumelelakani nanrokottole nintthu, mummalihace nanrokottolyooyo uyo ntthuuyo hinoopiihani utiripunaali, wiira huukasarini wa suwiisi, ni wiira suwiisyuuyo hinrume kwaarta ookhatteya wuutthukelani.
26 Kinoohimeeryani ikhweeli, mwatthukeliyaka vale, khannohala ukhuma nkhatteyammo mpaka uliva isinku yoomalela.*
27 Nheewa ile yantikhiye khalayi: ‘Nheette uluva.’
28 Masi mi kinwiirelani co: Ule nokhanyerera unweheeha nthiyana mpaka unsammwa, heetta uluva mmoopuweleloni wawe nuuyo nthiyanooyo.
29 Phimaana, moona wiira niitho ninyu ninawuutthekihani, nkumihe ni nvonyere uttayi, kontha phataari uhaleela mphantte mmoca worutthwiinyu, uhiya umalamalihiya irutthwiinyu yotheene Ncehena.
30 Ciicammo, moona wiira moonweenyu unawuutthekihani, nthikile ni nvonyere uttayi, kontha phataari uhaleela mphantte mmoca worutthwiinyu, uhiya umalamalihiya* irutthwiinyu yotheene Ncehena.
31 “Uhiya commo, uhantikhiya co: ‘Ule nohala waamwalanana amwaarawe, haana aavahaka itukumentu inhimya wiira haamwalanana.’
32 Masi, mi kinwiirelani co: Ule nohala waamwalanana amwaarawe uhikhanle nlattu ayova wooraruwa, pooti uwiiriha weetta uluva, ni ule naathela athiyana amwalananiye iyo inanneeyo, naweetta uluva.*
33 Ciicammo nnaacuwela itthu yaahimeriyaaya atthu okhalayi: ‘Nhikhuluvelihe upanka itthu masi woohirannyeeha itthu ikhuluvelihileenyu. Nhaana mwiiraneehaka khula itthu nnonkhuluveliheenyu Yehova.’
34 Masi mi, kinwiirelani: Nhilaphe. Ni nhilaphe nromolaka irimu, kontha iyo ikhanle ikhattera ya Nluku;
35 ciicammo nhilaphe nromolaka ituninya, kontha nno phi nipuro Nluku neesaawe inyaa cawe; ni hataa nhilaphe nromolaka u Yerusalemu,* kontha iyo ikhanle isittatti ya Mwene muulupale.*
36 Nhilaphe nromolaka ukumiinyu, kontha nyuuva khannokhitiri ukhaliha ikharariinyu yootteela awula yooriipa.
37 Mweeraka wiira ‘nnaahala upanka itthu’, paasi mpanke iyo itthwiiyo. Mweeraka wiira ‘khannohala upanka itthu’, paasi nhipanke iyo itthwiiyo. Kontha moolumaka citthu cahoocivenleni wuuluma, nnontakiha Sotwani.
38 “Nheewa ile yantikhiye khalayi: ‘Ule nohala umpwesa nkhunanawe niitho nuuyo haana apwesiyaka, ni ule nohala unkhula ukhunanawe niino nuuyo haana akhuliyaka.’
39 Masi, mi kinwiirelani co: Nhimwaattakanane ntthu oohinamaana, masi ule nohala wuuvahani ilathuma moono wonlopwana, munhiye ciicammo wuuvahani moono wonthiyana.
40 Ni ntthu apheela wuurwaanani utiripunaali wiira awaakheni ikuwo iwanreenyu vate, munhiyere ciicammo ikuweenyu yonhina.
41 Ni ntthu rina ukhulupale ookhanyererihakani umpankela itthu, mumpankele nvikanihaka mananna cuulepenlyaaweni.
42 Ntthu oolepelani itthu munvahe ni ule nopheela wuukopelani, nhinkhottele.
43 “Nyuuva mwaatthiva nnaacuwela itthu inhimyaaya eetthucihiinyu: ‘Munfente nkhunaninyu, ni mwaathanye ale ampheela wuupankani itthu yoohiloka.’
44 Masi, mi kinwiirelani co: Nhihiyerere waafenta ale ampheela wuupankani itthu yoohiloka, mwaalompele ale ahinoowacerani saana.
45 Mwapankaka commo, nyuuva nnaahala uthoonyera wiira nnaatakihaa Apaapeenyu ari wiirimu, ukhala wiira ayo anawaakumihera ncuwa atthu ooreera nrima ni oonanara nrima, ni ukhala wiira ayo anawaawaanela ipula atthu aneettela isariya ni ale ahineettela isariya.
46 Mwaafentaka paahi atthu anoofentani, nnohala waakhela iparakhani? Keera iyo phiitthu impankaaya anamaliviha nsokho?*
47 Ni, mwawiiwananaka paahi asipatthaniinyu, nnopankani ihimpankaaya atthu akhwaawe? Keera iyo phiitthu ampankaaya ale ahikhanle asarayeli?
48 Phimaana, nyuuva nhaana nthoonyeraka nifento neekhweeli, khampa Apaapeenyu owiirimu cinthoonyeraaya.
Notas
^ Awula: “anaahala ucuwela sana-saana makhalelo a Nluku.”
^ Va, anaaciya moolumo a Nluku yantikhilyaawe Moceesi ni maporofeeta akhwaawe.
^ Mafariseu yaari ikhurupu yaayuuta, yaavaresesa ittiini cinene ni yeettela khula itthu yaahimyaaya Malamulo a Nluku, ni ciicammo yoncerera moopuwelelwaaya.
^ Awula: “nsurukhweenyu wotheene.”
^ Niikereeku: “uvonyeriya.”
^ Yerusalemu ooniya ukhala isittaatti yowaarya.
^ Awula: “isittatti ya Yehova.”
^ Ale yaaliviha nsokho wookuvernu yo Rooma, yanthanyiya naayuuta akhunanaya.
