Ihapari comaana cinhimya wiira atthu anrwaa ukhala watuniyani mpaka, cirii mbiiblyani. (Isaalimu 37:29) Ibiiblya irinaa ilivuru 66 cooyevaca. Nluku aathanlale apinaatamu 40 ontthunela wiira yantikhe Ibiiblya. Ilivuru thanu cowancera cantikhiye ni Moises, caantikhiyeru cihovira myaakha 3.500. Ilivuru yoomalela yantikhiye ni apostolu Joau, yaantikhiyeru cihovira myaakha 1.900. Muupuwelelo ari mbiiblyani akhanlee apani? Nluku ahoolumana anamantikha obiiblya ni nnepaawe wootteela. (2 Samuweli 23:2) Ayo yantikhale muupuwelelo a Nluku, kahi awaya. Phimaana, Yehova phi mwaneene Ibiiblya.​—Usome 2 Timotiyu 3:16; 2 Peturu 1:20, 21.

Nincuwelela Ibiiblya ukhala ya Nluku nlattu woohimya cohoolo ni ikhweeli, woohivonyannyaa. Khaavo pinaatamu mpanka iyo. (Josuwe 23:14) Nluku okuru coothene phinkhitiri uhimya yohoolo ya apinaatamu woohivonya.​—Usome Isaiya 42:9; 46:10.

Hiivano naanaweherera wiira ilivuru ya Nluku inakhanle yohilikananiya, ni Ibiiblya phiryaaya. Ipiliyawucene co Ibiiblya cihokawiya niiluuka cookhalaka imiliyawucene. Ihookhalaru ilivuru yokhalayi, iyo iri wamoca ni citthu cikina cinhimiya nsiyensiyani. Ciicammo, anamantikhaaya ookhalaka 40 khaavo mmothiha nkhunanawe. * Ibiiblya inaathoonya ukhalana nifento na Nluku, ni ihana ikuru yolokihera makhalelo aatthu. Nnya ikhweeli nnya cinawaapankiha atthu imiliyawucene ukupali wiira Ibiiblya ikhanlee Nuulumo na Nluku.​—Usome 1 Atesalonika 2:13.

Ibiiblya inooluma venci ihapari comaana cinthoonyera cirii wanrimani wa Nluku coopheela waapankela apinaatamu uhoolo. Ibiiblya inaahimyaca ihantisi yaapinaatamu oopacera, inanna ciwaalyaaya ihaleelaka ukhala wapeephoni ni inaahimyaca ciicammo cinhalaaya ulokihaciya Ipeephoni.​—Usome Apokalipise 21:4, 5.

Nuulumo na Nluku nihaana ciicammo malamulo, mattharelelo ni ikano. Kahi nnyo paahi, mbiiblyani iholepiya ihantisi inthoonyihera mananna Nluku cinaawaceraawe apinaatamu—ihantisi inoonihera makhalelwaawe. Coo, Ibiiblya pooti wuukavihera uncuwela Nluku. Ila inaahimya mananna ookhitiri weeva ukhala mpatthanyaawe.​—Usome Isaalimu 19:7, 11; Tiyaku 2:23; 4:8.

Ila ibroxurela inaarwaa wuukavihera wiiweeha Ibiiblya. Ila wowitthuciha intthara mananna Yesu yaapankaawe woowiithuciha atthu. Ula aapacera uromola itextu ni phihimyaka itthu “intaphulelaaya cowantikhiya.”​—Unsome Luka 24:27, 45.

Cirii citthu vakani citepale ureera cinlikanana ihapari comaana cinnivahaawe Nluku. Cihookhalaru commo ahaavo atthu ahinhela wanrimani cila ihapari cila, akina anaathanya. Masi weeva uhihiye ukupali nlattu waayo. Nwehereronaa noopheela uphwanya ukumi woohimala unhala woonela maanaaya waancuwelaka Nluku.​—Unsome Joau 17:3.