UWAKATI wo maberewu yaakhala ilapo yo Isarayeli, mwaakha waapacera mweeri wo Setembro awula Outubro, ukati wookutta ni wo waala mmamattani waya.

Atthu yaalikela mahuku o khula mweeri yattharihaka mahuku yaavira woonnyaaka mweeri wiirimu (mahuku 29 awula 30); ni yaalikela myeeri co khula mwaakha yattharihaka ncuwa. Masi mwaakha unaalikeliya nittharihiyaka ncuwa unaakhalana mahuku menci uvikana mwaakha unaalikeliya uttharihiyaka woonnya wo mweeri. Phimaana, ayo yahaana yaalikelaka myeeri ni myaakha ni nnya inanna piilinnya, masi woohivirikaniha. Wiira akhitiri uhivirikaniha, ayo yaanawuncerera mahuku awula mweeri mmoca uhinaaya upacera mwaakha nkhwaawe. Ayo manannaayo, myeeri cowaaliya ni cowuuruliya icoolya caakhala cimocaaru khula mwaakha.

Uwakati wa Moceesi, Nluku ahowiirela apoovwaawe wiira mwaakha waalamuliya upacera mweeri wo Abibe awula Nisã. (Nkw. 12:2; 13:4) Uyo mweeryuuyo yaanaapankiya isukuhuulu yaatthapelela ukati woohephiya icevada.—Nkw. 23:15, 16.

Namasoma Emil Schürer nlivuruni wawe heera wiira “khawaarika ucuwela wakhala wiira wahaana wunceriyaka mweeri mmoca awula mena. Isukuhuulu yo Paasikuwa yaatthapeleliya nihuku 14 mweeri wo Nisã, wiimaleloni iyiita ni ile ineehaniya equinócio inavinre. Equinócio maanaaya wiira nno nihukunno iwoora cinvira ncuwa ninakhumale cinaalikana niiwoora cinvira ncuwa ninakenle. Atthu okhalayi yoonaka wiira mwaakha uhanle vakaani umala, ayo yaanawaalikela mahuku wiira acuwele nihuku naahala utthapeleliya Paasikuwa o mwaakha waahalaaya ukela. Yoonelelaka wiira uyo mwaakhooyo nihuku no Paasikuwa naahala uphiya ihineerannya equinócio, ayo yaanawuncerera mweeri mmoca ahinakela mwaakha nkhwaawe.”

Iyo phi itthu Masaahiti a Yehova inwehaceraaya wiira acuwele nihuku no wuupuwelela ukhwa wa Yesu Kristu. Ayo anoopuwelela wiimaleloni iyiita, nihuku 14 mweeri wo Nisã wokalentaariyu aayuuta. Maloko o Masaahiti a Yehova ntuninyani motheene anaahimyeeriya khalayiiru nihukuni ninhala wuupuweleliya ukhwa wa Yesu. *

Masi asarayeli yaacuwela cani nihuku nimpaceraaya mweeri ni nihuku nimmalelaaya? Mahukwaala, hiiva khunnirika ucuwela. Hiiva pooti untthukula kalentaariyu ntelefoneni wihu ni woona. Masi khalayi, iyo yaari itthu yoorika.

Uwakati wa Nowee waacanryaaya maaci ntuninyani motheene, myeeri cotheene caarina mahuku 30 paasi. (Upha. 7:11, 24; 8:3, 4) Masi uvira waya uyo ukatyuuyo, myeeri cikhwaawe cahohiya ukhalana mahuku 30. Nhina kalentaariyu aayuuta, myeeri caapacera woonnyaaka mweeri wo naanaano wiirimu. Phimaana, khula mweeri waakhalana mahuku 29 awula 30.

Nkwaha mmoca, Davidi ni Jonataa yahooluma ukati waahalaaya upacera mweeri wo naanaano. Ayo yenre co: “Meelo nikhanle nihuku no mweeri wo naanaano.” (1 Sam. 20:5, 18) Iyo itthwiiyo inthoonyera wiira uwakati wa Davidi, myeeri caanawaalikeliya khalayiiru. Masi apoovu o Isarayeli yaacuwela cani nihuku naapaceraaya mweeri wo naanaano? Itthu innikavihera ucuwela ikhanle ilivuru ineehaniya Míxena yaarina malamulo ni ikano ca ayuuta. Iyo ilivurwiiyo inaanithoonyera wiira ayuuta uhokolyaa waya u Babilooniya, itiripunaali yuulupale ya ayuuta phaalakela nihuku noohala upacera khula mweeri. Myeeri 7 yaakhalanaaya isukuhuulu, ayo yaanaathukumana nihuku 30 no khula mweeri ni yaanaavaanela nihuku naahalaaya upacera mweeri nkiina waahala ukela. Masi yaawehacera cani iyo itthwiiyo?

Yahaavo alopwana yeemela mapuro ottuttu u Yerusalemu wiira awehe irimu. Yoonaka wiira uhoonnya mweeri wo naanaano, woohipicapica yaanaarwaa waahimyeera ahooleli itiripunaali ya ayuuta. Ayo yoonaka wiira khweeli wahoonnya mweeri wo phiyaaru, yaanawaahimyeera apoovu wiira uhancera mweeri nkiina. Vano wakhalaka wiira wiirimu yaari mahutte menci ni ayo alopwanaayo khayaakhitiri woona mweeri, isiyani yaapankiya? Yeerannyaaka iyo itthwiiyo, ahooleli otiripunaali yaanaalakela  wiira uyo mweeryuuyo waarina mahuku 30, ni waanaahala wancera mweeri nkiina yaviraka ayo mahukwaayo.

Ilivuru Míxena inaahimya mananna ahooleli otiripunaali caahimyeeraaya apoovu wiira uhancera mweeri nkiina. Ayo yaanaapaha mooro wamwaakoni Oliveera waattamenle u Yerusalemu. Ilapo yo Isarayeli yotheene waanaapahiyaka mooro yapheelaka uhimyeeriya ihapari apoovu. Ukati nkhwaawe, yaanaarumiya alopwana wiira avire yahimyaaka ihapari. Ala manannaala, atthu otheene o Yerusalemu ni olapo yotheene yo Isarayeli yaanaacuwela wiira uhopacera mweeri nkiina. Phimaana, otheene caya yaanaatthapelela isukuhuulu nihuku nimocaaru.

Ikwaaturu yo ula mwahoola atthunaka inaahala wuukaviherani ucuwela myeeri cokalentaariyu aayuuta, isukuhuulu caya, ukati waalaaya ni waaheephaaya icoolya caya.