Nhina mwaha uvinre, niheetthuca citthu caahimilyaawe Yesu wiira caanaahala wiirannya. Nnyo citthunnyo, cinawoonihera sana-saana wiira Umwene wa Nluku uhotikitheriya wiirimu ni Yesu Kristu hikhalihiye Mwene.

Ibiiblya inaahimya wiira ukati Yesu waahalaawe wancera ulamulela, uyo anhala umoomola wiirimu Sotwani ni maciinnyaawe. Nna co, Sotwani ri wakhiviru ni watuninyani, phimaana cinaatepa ukhumelela citthu cootakhala ikhumelo mwaakha wo 1914.—Apokalipise 12:7, 9.

Makhalelo owatuninyani hataa yarikarikacaka, Yesu, ule khanle Mwene o Umwene wa Nluku, neera apankaka itthu wiira aakavihere atthu ntuninyani motheene. Nlattu wonteko waahimilyaawe wiira waanaahala uvariya, ukhanle witthuciha Ibiiblya, atthu enci aneera yeetthucaka ni yeettelaka mattharelelo ombiiblyani muukumini waya. (Isaiya 2:2-4) Atthu enci aheetthuca mananna oowehera ratta nteko, ookhalana itthoko yomaana ni mananna oowehera ratta mihakhu wiira ahikhale ipottha co mihakhu. Citthu cineetthucaaya ayo atthwaayo, cinawaakavihera ukhala ootteeliya nenna va ni ukhala atthu anaapheelaawe Nluku wiira yakhale watuninyani ukati Umwennyaawe unhalaaya wancera ulamulela watuninyani.

Yesu neera alamulelaka wiirimu, masi nanlelo ituninya inlamuleliya naapinaatamu. Phimaana, Nluku homwiirela Yesu co: “Ulamulele iriyari ya awanannyaa.” (Isaalimu 110:2) Woohipica, Yesu naahala waatankanya awanannyaawe otheene ni naahala uwoopola ale antthuna umwiiwelela Nluku ninrimaaya wotheene.

Waphiyaka uyo ukatyuuyo, Umwene wa Nluku unaahala:

• Umalamaliha ittiini cowootha. Ittiini cineetthuciha pusya myaha ca Nluku, cinootha ni cinwoopopihaca atthu cinaahala umalamalihiya. Ibiiblya inlikanihera nnyo ittiininnyo ni nthiyana ootepa uraruwa. Utankanyiya waya nnyo ittiininnyo unhala uwa woohicuwannyaaca.—Apokalipise 17:15, 16.

• Umalamaliha ikuvernu caapinaatamu. Umwene wa Nluku unaahala umalamaliha ikuvernu cotheene caapinaatamu.—Apokalipise 19:15, 17, 18.

• Waatankanya atthu ootakhala nrima. Vano isiyani inhala uwiirannyeela ale alakenle upanka citthu coohinamaana ni ahintthuna umwiiwelela Nluku? Ibiiblya ineera: “Atakhali, anaahala utankanyiya watuninyani.”—Miruku 2:22.

• Ummalamaliha Sotwani ni maciinnyaawe. Sotwani ni maciinnyaawe khanhala ‘waathepya-tho atthu omaloko otheene.’—Apokalipise 20:3, 10.

Ceerannyaaka nnyo citthunnyo, ifayitani cinhalaaya uphwanya ale ammwiiwelela Nluku?

Utaki Yesu unhalaawe ulamulela ituninya, uyo naahala upanka citthu cahaahalaaya ikuvernu ikhwaawe ukhitiri upanka. Uyo nohala ulamulela wamoca naatthu 144.000 oothanliya watuninyani. (Apokalipise 5:9, 10; 14:1, 3) Uyo naahala upanka wiira yiirannye watuninyani ile impheelaawe Nluku. Isiyani Umwene wa Nluku inhalaaya waapankela ale anhala ukhala watuninyani?

• Umaliha iretta, wuuluvala ni ukhwa. “Ni khaavo nhala ukhala eeraka: ‘Kinaawerennya’” ni “khunhala ukhala-tho ukhwa.”—Isaiya 33:24; Apokalipise 21:4.

• Uwaana nnema ni mpuha weekhweeli. “Nnema naasaaniinyu ninaahala winciva” ni “khula ntthu nkowiitthunwa mmwirihina wawe co mihokorokho, woohikhala nhala uwoopopiha.”—Isaiya 54:13; Mikeya 4:4.

• Waavaha apinaatamu nteko wootteeliha nrima. “Yaathanlalyaaka anaarwa ulawa nteko wo mmatatani waya. Khanhala uvara nteko mwinci mahala.”—Isaiya 65:22, 23.

• Ulokihaca itthaya mapuro ahononeelyaaya. “Nipuro nihinkhaliya ni itthaya yowuuma cinaahala utteeliya, muuthakoni unaahala utteeliya cinene ni cinaahala uphuwela ittuva toko isafarawu.”—Isaiya 35:1.

• Uwiitthuciha atthu upanka ile impheelaawe Nluku wiira yaphwanye ukumi woohimala. “Ukumi woohimala phuula, ahaana yuucuwelaka weeva ukhanle Nluku mmoca eekhweeli, ni ule unveleelihalyaa, Yesu Kristu.”—Joau 17:3.

Nluku nopheela wiira nyuuva mwaphwanye nnya itthuvonnya. (Isaiya 48:18) Mwaha unhala uttharana nuula, unaahala uttonkaca citthu cinlamuliyeenyu upanka nenna co wiira mwaphwanye nnyo iparakhannyo.