Ezaya 1:1-31
1 Cilolwa cino Ezaya mwana Amozi waweni ukulozya kuli Yuda na Yelusalemu mu manda yakwe ya mwene ya mu Yuda, kuli kuti Uziya, Yotamu, Ahazi, na Hezekiya aeci:
2 Uvwini mwe ya mwi yulu, nupya kutikini mwe ya muno nsi,Pano Yeova watalanda ati:
“Ana yane yano naakuzyaIyampondokela.
3 Cipambasi akamanya umwineco,Na punda akamanya kuno umwineco akamupeelela ivyakulya;Lelo Aina Izlaeli yatamanya nene,Antu yane yasiiluka.”
4 Kalanda uku luko uluyembu,Antu aaya sana nu luyembu,Ana ya yantu aipe, ana akowele!
Yaleka ukulondela Yeova;Yasicindika Uwa Muzilo wakwe IzlaeliYene yamufutatila.
5 Imili inu itakweti apa kuma, u mulandu ci uno imutwalilila na ucipondoka?
Mitwe inu yonsi iilwale,Nupya imyenzo inu yonsi iitonte sana.
6 Kufuma uku lwazo ukufika uku mutwe kusi icipuma.
Kuli ivilonda ivicisike, vikwezuluke ni vilepukeVitazifiwapo, kunyepelelwa nanti ukwitilwapo mafuta.
7 Impanga inu yasyala umwaula cimwi.
Misumba inu yapya.
Antu ya ku mpanga zyuze yakonona impanga inu ala mukulola nako.
Vintu vyonsi vyononwa wakwe vino cikaya ndi cakuti alwani yazanza.
8 Mwanaci wa Zioni wasyala wa mutanda wa mu calo ca myangazi,Wa ka ng’anda ka mu calo ca viimbi,Nupya wa musumba uwatiuzingulukwa na alwani.
9 Ndi cakuti Yeova wa maumba yakwe ya malaika atatusiilamo yamwi aakupusuka,Nga twaya wakwe SodomaNupya nga twakolana na Gomola.
10 Uvwini mazwi yakwe Yeova mwe ntunguluzi zya mu Sodoma.
Ikini mano uku masunde yakwe Leza witu mwe yantu ya mu Gomola.
11 Yeova walanda wati: “Uzye malambo aingi yano mukampeela aacani?”
“Natonta na malambo ya koca yakwe ya suuku inu na mafuta ya nyama zino mwasunga ningo,Nupya ntatemwa uwazi wakwe ya cipambasi na wakwe tu suuku nu wa mbuzi.
12 Ndi cakuti mwiza pa nkoleelo yane,A weni aakamunena ukwiza,Nu kulyatola pa misolo yane?
13 Tiini ukuleta upe wa vyakulya uwa sile sile.
Ivinunkile vinu nkavilola ukuti ivya winyi.
Mukazevya umwezi upya, kusunga isabata, nu kukwata maukonganoLelo ntanga ntwalilile ukulola kuno mukukwata maukongano lino pa nsita ili imwi kwene mukucita ivya maleele.
14 Napata imitebeto ino mukazevya pa mwezi upya ni mitebeto yuze.
Vyaya icisendo kuli nene;Intonta navyo.
15 Ndi cakuti mwakonzolola makasa inu,Nkafisa manso.
Nanti cakuti mukapepa mapepo aingi,Nsikutika;Mu minwe inu mwazula uwazi.
16 Fulalini, isangululini;Fumyini iviipe pa nkoleelo yane;Tiini ukucita iviipe.
17 Sambililini ukucita ivisuma, mwaya aamulinganya,Mwalungika aakacuzya auze,Mwacingilila insambu zya yana ya nsiwa,Nupya mwavwangilako ya mukamfwilwa.”
18 Yeova walanda wati: “Izini tulanzyanye nupya nimamwazwa ukuzifya ucuza winu nani.
Nanti cakuti imembu zinu zyaenza,Zilaswepa wa usu wa mvula;Nanti cakuti zyaenza wa nsalu iyenzu,Zilaswepa wakwe pamba.
19 Ndi cakuti mwaitemelwa ukukutika,Mulalya ivyakulya ivisuma ivya mu mpanga.
20 Lelo ndi cakuti mwakana nupya mwapondoka,Mulakomwa uku lupanga,Pano nene ne Yeova indanda.”
21 Musumba uwali na ucisinka wasanguka cizelele!
Mwali umulinganya;Mwali nu ulungami,Nomba lyene muli sile inkomi.
22 Siuva wako waya kwati asi mwengululwe,Uwengwa wako wasaakana na manzi.
23 Ya cilolo yako yakoma imyenzo nupya yakaombela pamwi na aapuupu.
Yonsi kwene yatemwa mafisakanwa nupya yakalondelela ivya upe.
Yataaya nu mulinganya uku mwana wa nsiwa,Nupya yasikutika uku mulandu wakwe mukamfwilwa.
24 Fwandi Umwene wa cumi, Yeova wa maumba,Leza wa Maka Uwa Ina Izlaeli, walanda wati:
“Ndaifumya pa yalwani yane,Nupya ndalandula uku yalwani yane.
25 Ndaleta ikasa lyane pali wewe,Ndengulula ivikwi vyako,*Nupya ndafumyapo ivikwi vyako vyonsi.
26 Ndawezya ya kapingula yako wakwe vino cali pa kutandikaNi mpandamano zyako wakwe vino cali pa kutampa.
Pa cisila ulaamwa ukuti musumba wa ulungami, umuzi wa cumi.
27 Zioni alapusuka pa mulandu nu mulinganya,Na antu yakwe aalawela yalapusuka pa mulandu nu ulungami.
28 Ya cipondoka na ayembu yalononwa capamwi,Nupya yayo aakasya Yeova nayo kwene yalononwa.
29 Muluvwa insonyi pa mulandu ni miti ikalamba ino mwatemwaNupya mulazewana pa mulandu ni vyalo* vino mwasoolola.
30 Pano mulaya wa muti ukalamba uume mafwa,Nupya wa calo icaulamo manzi.
31 Umonsi umukome alaya wa mwando utonte,Nupya vino akapanga vilaya wa kamoto;Vyonsi kwene vilapyela pamwi,Kusi alavizimya.”
Mafutunoti
^ Kuli kuti ivikwi ivikasyala nga yakwengulula ivyela.
^ Imiti ni vyalo yaviomvyanga pa kupepa ivilubi.
