Ezaya 13:1-22
13 Icilolwa cino Ezaya mwana Amozi waweni umwali ivyali nu kucitikila Babiloni aeci:
2 Imikilini asilika icimanyililo apa mwamba apataaya mawe.
Yapundililini nu kuyakapizya,Pakuti ize umu milyango ya yantu acindame.
3 Impeela isunde uku yantu yano nasoolola.
Inama asilika yane kuti amuno ndangile ukali,Yayo aakasansamuka cilumba cilumba.
4 Uvwini! Kuli iumba lya yantu aali mu myamba;Likuvwika kwati aantu aingi sana!
Uvwini icongo ca mawene,Icongo ca nko izyatizikolongana pamwi!
Yeova wa maumba akukolonganika asilika aakuya umu nkondo.
5 Yeova akwiza ni vyanzo vya ukali wakwe,Kufuma uku mpanga iya kutali,Kufuma uku mpela ya mayulu,Kuti alete uwononesi umu nsi yonsi.
6 Lilini pano uwanda wakwe Yeova uli umupiipi!
Uliza wa wononesi kufuma uku wa Maka Yonsi.
7 Ali mulandu uno makasa yonsi yalatembokela,Nupya umuntu wensi alatoovoka pa mulandu ni ntete.
8 Antu iyasakamikwa.
Yakucululuka nu kuwaikwa,Wa mwanaci aali pa kupaapa.
Yakulolekesyanya ntete nteteNi vinso vyao vikuloleka ulanda ulanda.
9 Uwanda wakwe Yeova ukwiza,Ukwiza nu ukali ni cipyu cikalamba,Ku kulenga impanga ukuya ica kuseka,Nu kulovya ayembu aikalamo.
10 Pano intanda zya mu mayulu na maumba muno zyayaVitalaaka;Ilanzi lilaya ilitifi lino lilatunka,Nu mwezi utalakozya uluswepo.
11 Ndapingula antu ya mu nsi pa mulandu ni viipe vino yakacita,Na aipe pa mulandu na vino yakaluvyanya.
Ndapezya aaya ni cilumba,Nu kufulula aakacuzya auze.
12 Ndalenga antu ukucepa ukucila goldi umwengululwe ningo,Nupya yalacepa ukucila goldi uwa ku Ofili.
13 Nene ne Yeova wa maumba ndalenga mayulu ukuzakaza,Nupya pa wanda wa ukali wane ndasunkanya insi pano iikalaPa mulandu ni cipyu cane.
14 Cila muntu alaswilila uku yantu yakwe,Cila muntu alutukila uku mpanga yakwe;Wakwe mpombo wino yakuzinganya nupya wa viteekwa ivitakweti uwa kuvikolonganika.
15 Wensi aalazanwa alatotwa ni sumo,Na wensi aalalemwa alakomwa nu lupanga.
16 Alwani yao yalaputola ana yao ala yakulola nako,Nu kupokolola ivintu vya mu mang’anda yao,Alino nu kulaala na aci yao uku maka.
17 Nkuyatumila Aina Medya,Aakalola siuva ukuti uwa sile sileNupya aatatemwa goldi.
18 Yalalasa alumendo na maulapwa;Yataluvwa uluseNanti ukuya ni cikuuku uku yana yao.
19 Nupya Babiloni wino aali ucindami wa mawene,Umusumba uyembe uno Aina Kalideya yakauvwilapo icilumbaAlaya wakwe vino imisumba ya Sodoma na Gomola yaali lino Leza wayononyile.
20 Atalikalwamo,Nupya kusi aalatala aikalemo umu nkulo zyonsi.
Kusi Umwina Alabya aalasimpamo itenti lyakwe,Nupya kusi ya kacema aalacemelamo iviteekwa vyao.
21 Viumbwa vya mu lwanga i vilalaalamo;Mu mang’anda yao mulazuula ivipululu.
Imbuni zilaikala mumu kwene,Imbuzi zya mpanga* zilaatolokamo.
22 Ya nkusa yalikala umu masano yao asuma,Insita yakwe yatipalama
Amanda yakwe yatalavula.”
Mafutunoti
^ Nanti limwi, “Iviwa ivikaloleka wa mbuzi.”
