Yakapingula 6:1-40
6 Nupya kwene Aina Izlaeli yasosizye Yeova, fwandi Yeova wayapeezile umu minwe ya Ina Midyani pa myaka 7.
2 Aina Midyani yacuzyanga Aina Izlaeli. Pa mulandu na Ina Midyani, Aina Izlaeli yapanzile incende zya kufisamamo umu myamba, mu macele, nu mu ncende izitale ukuyamo.
3 Ndi cakuti Aina Izlaeli yakomela imbezu, Aina Midyani, Aina Amaleki na aku ufumondaka yayazanzanga.
4 Yapanganga inkambi nu konona ivyakulya vyonsi kufika nu ku Gaza, nupya yataasyanga ivili vyonsi vino Aina Izlaeli yangalya nanti ukusya imfwele nanti a cipambasi nanti punda.
5 Iizanga aingi sana wakwe makanta ala yali ni viteekwa vyao na matenti yao, iizanga umu konona impanga, nupya yene yatanga yapendwe kumwi ni ngamali zyao.
6 Fwandi Aina Izlaeli izile iyaya apiina sana pa mulandu na Ina Midyani, nupya yaliliile kuli Yeova pakuti ayazwe.
7 Lino Aina Izlaeli yaliliile kuli Yeova ukuti ayazwe pa mulandu na Ina Midyani,
8 Yeova watumiile Aina Izlaeli kasesema uwayanenyile ati: “Yeova Leza wa Ina Izlaeli walanda wati, ‘Namufumizye mu uzya umu Ijipti.
9 Namupuswisye ukufuma umu Ijipti na kuli yonsi amucuzyanga nupya nayazinzile nu kumupeela impanga yao.
10 Nupya namunenyile inti: “Nene Yeova Leza winu. Mutalinzile ukulatiina ya leza ya Ina Amoli aineco ya mpanga ino mukwikalamo.” Lelo mwakanyile ukuvwa.’”
11 Pa cisila malaika wakwe Yeova wizile aikala umwisika lya cimuti cikalamba ca mu Ofula, icali cakwe Yoasyi uwa mu lupwa lwakwe Abi-eza. Gidyoni mwana Yoasyi wapuulilanga ingano mu ca kufenelamo waini pakuti Aina Midyani yatamanya.
12 Malaika wakwe Yeova walolekiile kuli aliwe nu kumunena ati: “Yeova ali naawe we musilika wa maka.”
13 Lyene Gidyoni nawe wamuzizye ati: “Musambazi, ndi cakuti Yeova ali naswe, u mulandu ci uno vii vyonsi ivitucitikila? Ilikwi imilimo yakwe yonsi iya maka ino ivikolwe vitu vyatunenyilepo lino vyalanzile ukuti, ‘Yeova watufumizye umu Ijipti?’ Nomba lyene Yeova watatutazyela nu kutupeela umu minwe ya Ina Midyani.”
14 Yeova walozyanyizye icinso na Gidyoni nu kumunena ati: “Ukweti maka, fwandi pitanga ukapususye Aina Izlaeli uku Ina Midyani. Uzye asi nene nkukutuma?”
15 Gidyoni nawe waswike ati: “Iye we Yeova. Ningapususya uli Ina Izlaeli? Lola! Luko lwane u lwacepesya mu mutundu wakwe Manase, nupya nene nacepesya umu ng’anda yakwe tata.”
16 Lelo Yeova wamunenyile ati: “Pa mulandu wakuti ndaya naawe, ulakoma Aina Midyani kwati yali sile umuntu wenga.”
17 Lyene Gidyoni wanenyile malaika wakwe Leza ati: “Ndi cakuti watunsoolola, ndange icimanyililo icikulangilila ukuti wewe ukulanda nani.
18 Napaapata utafuma pano, leka ndete ica upe nu kwizaciika pa nkoleelo yako.” Fwandi malaika wamunenyile ati: “Nimaikala pakwene mpaka ulete ica upe.”
19 Lyene Gidyoni wapisile nu kuyapekanya kana ka mbuzi nupya wapanzile umukate uwaula icitutumusi ukuomvya makilogilamu 11 yakwe fulaulo. Wisile inyama muli basiketi nu musunyi umu mpoto; nupya wavitwazile kuli aliwe mwisika lya cimuti cikalamba.
20 Lyene malaika wakwe Leza wa cumi wamunenyile ati: “Tola inyama nu mukate uwaula icitutumusi uvike pa ciliwe ciici cikalamba, nupya uwitilepo umusunyi.” Nawe wacisile vivyo kwene.
21 Lyene malaika wakwe Yeova watozile intuwa nu kukumya pa nyama na pa mukate uwaula icitutumusi, nupya umoto wasile pi iwe nu koca inyama nu mukate uwaula icitutumusi. Lyene malaika wakwe Yeova watile ukuloleka.
22 Lyene Gidyoni wilwike ukuti wali a malaika wakwe Yeova.
Nupya lilyo kwene sile Gidyoni walanzile ati: “Iye mwe we Yeova, Mwene wa Papelapela, nalola malaika wakwe Yeova!”
23 Lelo Yeova wamunenyile ati: “Mutende uye naawe. Utuvwa intete; utakufwa.”
24 Fwandi Gidyoni wakuuliile Yeova ulambo paapa kwene, nupya ukaamwa ukuti Yeova-syalomu kufika na ndakai. Ucili waya umu Ofula umu ncende ya lupwa lwakwe Abi-eza.
25 Usiku kwene uuwa Yeova wamunenyile ati; “Tola ka cipambasi kakwe tata wako, ka cipambasi kakwe ciili akali ni myaka 7, nupya uonone ulambo wakwe Baali wakwe tata wako, nu kukoma ulucesi lwa kupepa ululi pa nkoleelo ya ulambo.
26 Ndi cakuti wakuula ulambo kuli Yeova Leza wako ukuomvya mawe nu kuyatantika ningo mu ncende icingililwe, utole ka cipambasi kakwe ciili nu kukapeela ukuya ilambo lya koca pa nkwi zino watuputola ukufuma uku ulucesi lwa kupepa.”
27 Fwandi Gidyoni watozile aomvi yakwe aonsi 10 nu kucita vino Yeova wamunenyile. Lelo pa mulandu wakuti watiinyile sana amu ng’anda yakwe isi na onsi amu musumba, wacisile vivyo usiku.
28 Lino aonsi ya mu musumba yakatwike katondotondo uwanda uwalondelilepo, yaweni ulambo wakwe Baali iononwa nu lucesi lwa kupepa ulwali pa mbali ilukomwa, nupya ka cipambasi walanga ikapeelwa pa ulambo uwakuuzilwe.
29 Yuzyanyizye iyati: “A weni uwatacita cii?” Pa cisila ca kulondelezya yalanzile iyati: “Gidyoni mwana Yoasyi uwatacita cii.”
30 Fwandi aonsi ya mu musumba yanenyile Yoasyi iyati: “Leta umwanako pakuti akomwe, pano ataonona ulambo wakwe Baali nu lucesi lwa kupepa ulwaya umupiipi nu ulambo.”
31 Lyene Yoasyi wanenyile yonsi amukatukile ati: “Uzye mulinzile ukucingilila Baali? Uzye mulinzile ukupususya Baali? Wensi amamucingilila alinzile ukukomwa mu katondo kwene kaa. Ndi cakuti Baali a leza, lekini aicingilile umwineco, pano umwi wataonona ulambo wakwe.”
32 Nupya pa wanda kwene uuwa watemiile Gidyoni izina lyakuti Yelubaali* watiile: “Lekini Baali aicingilile umwineco, pano umwi wataonona ulambo wakwe.”
33 Aina Midyani yonsi, Aina Amaleki na aku ufumondaka yailunzile uku yasilika; nupya yalamvile uluzi nu kuya uku lwanga lwa Yezileele akuno iyaya iyapanga inkambi.
34 Lyene umupasi wakwe Yeova wizile pali Gidyoni, nawe walizizye ipenga, nupya amu lupwa lwakwe Abi-eza yakolongine kuli aliwe.
35 Watumile inkombe izya kuyaama amu mutundu wakwe Manase, nupya nayo kwene yaile iyakolongana kuli aliwe. Watumile ni nkombe zya kuyaama amu mutundu wakwe Asyeli, mutundu wakwe Zebuluni, na amu mutundu wakwe Nafutali, nupya yaile iyamukomaanya.
36 Lyene Gidyoni wanenyile Leza wa cumi ati: “Ndi cakuti umapususya Aina Izlaeli ukuomvya nene, kulingana nu ulayo wako,
37 leka niike mavumbu ya mfwele pa lwano. Ndi cakuti manzi yamaya sile uku mavumbu lelo umusili wene apali mavumbu utwalilile ukuya uume, lyene nimamanya ukuti ulapususya Aina Izlaeli ukuomvya nene kulingana nu ulayo wako.”
38 Nupya vivyo kwene ivyacitike. Lino wakatwike katondotondo uwanda uwalondelilepo nu kufena mavumbu, mwafumile manzi aingi angazula iciviya icikalamba ica manzi.
39 Lelo Gidyoni wanenyile Leza wa cumi ati: “Utansokela, leka nuzye sile icintu na cuze conga. Napaapata leka indole ivimacitika uku mavumbu muku sile nauze onga pakuti nsininkizye ndi cakuti ulaya nani. Leka mavumbu ayano yaye aume, lelo pa musili ponsi paye manzi.”
40 Fwandi vivyo kwene avino Leza wacisile usiku uuwa; mavumbu sile aali aume, lelo pa musili ponsi pali manzi.
Mafutunoti
^ Ilikapiliula ukuti “Lekini Baali Aicingilile.”
