Elenganya ukuti vii vikucitika: Lino Julia walola umu cilola, walola ukuti wataina. Lyene watandika ukuivwanzya, wati “Ndinzile sile ukuwezyako umwili.” Nanti icakuti ya cuza yakwe alino na avyazi yakwe yakamunena ukuti “walinga sile umwili.”

Watandika ukwelenganya ukuti amaezyanga ukucita ivili vyonsi ivingalenga ukuti cilawanda afumyako “ma kg 2.3.” Welenganya ukuti alinzile sile ukukanalya amanda yamwi . . .

Ndi cakuti naawe watandika kuyuvwa wakwe vino Julia akayuvwa, i vyani vino ungacita?

Citaipa ukusumbako sana amano kuli vino ukaloleka. Na Baibo ikalanda sana pa onsi na anaci alolekanga ningo, pali yayo pali na Sala, Lakeli, Abigelo, Yosefu na Davidi. Baibo ikati Abishagi wali “umuyembe wakwe cimwi.”—1 Yamwene 1:4.

Lelo, acance aingi iikako sana mano uku milolekele yao. Na cii cingalenga kuye intanzi izingi. Elenganya pali vino aakalondelezya amalyasi yalanzile:

• Yatile, twazanyile ukuti akazyana 58 pesenti yakailizyanya ukuti yanyomesya alino fwandi ali 17 pesenti sile aliyo yanyoma sana.

• Yauze nayo yatile cazanyilwe ukuti yanamayo 45 pesenti yapepukisya nomba yene ala yelenganyanga ukuti yanyoma sana.

• Pakuti acance aingi yawezyeko imili, yamwi yakata ukulya pakuti sile yonde na cii cingalenga umuntu alwale.

 Ndi cakuti walola ukuti umwili wako waluwana pa mulandu wa kukanalya, nenako yamwi yakwazwe. Utandikilepo ukunena avyazi nanti umuntu aliwensi uwikolo wino wataila sana. Baibo ikati: “Cuza, umukundwe insita ili yonsi. Uwina nao uwacani fwandi ndi cakuti asi wakuculila pamwi?”—Mapinda 17:17.

Vino umuntu akacita nu kwelenganya ivikalenga antu yamutemwe nanti foo. Leka tulande pa mwana wa Mwene Davidi Abusalomu. Baibo ikati:

“Kutali umuntu nanti wenga . . . wino yangalingana na Abusalomu ku kuyemba. Wene atakweti akaulema nanti kamwi.”— 2 Samueli 14:25.

Nomba nanti ciye vivyo umulumendo wii wali sana ni cilumba nupya walondesyanga ukucita sile vino akulonda umweneco alino ataali ni cisinka. Lelo Baibo italandapo ivingi pali Abusalomu; yalanda sile ukuti wali umonsi atakweti insonyi muli vino wacitanga nupya wakweti ulupato ulungalenga akome nu muntu.

Baibo ingatwazwa, acino ikatupandako amano ukuti:

“Zwalini untu upya.”—Kolose 3:10, NWT.

“Mutalinzile ukuomvya vimwi vyakunzi pakuti muiyemvye . . . , lelo ukuyemba kwinu kulinzile kuya ukwa mukasi kinu.”—1 Petulo 3:3, 4.

Kwene citaipa ukulonda ukuloleka ningo, nomba ukuya ni miyele isuma kwacindama ukuluta ukuloleka ningo. Ungikala amanda aingi ndi cakuti uli ni miyele isuma sana ukucila vino ungikala ndi cakuti uli na amaka nanti wewe muyembe. Umukazyana umwi uwizina lyakuti Phylicia watiile: “Antu aingi yangakukumbwa lili kwene sile lino yakulola, nomba ndi waya ni miyele isuma ali ino antu yalaakwiusizyapo sana.”

Uzye ukauvwa uyi pali vino ukaloleka?

Uzye watala welenganyapo pa kupakala mafuta yamwi yano limwi ukulola ukuti ndi wayaomvya yalalenga waloleka ningo nanti sile ukwalula imilile yako pakuti utina sana?

I vyani vino ungalula pali vino ukaloleka ndi cakuti wali nu kwalula? (Sila ponsi pano ukulola ukuti avino ungalula.)

• ICIMO

• UKUNYOMA

• INYELE

• IMILOLEKELE YA MWILI

• ICINSO

• IMILOLEKELE YA NKANDA

Ndi cakuti iwasuka ee umu mauzyo yaili akutandikilako nupya watusila pa vintu vitatu nanti ukucilapo pali vino ungatemwa ukwalula pa milolekele yako pi uzyo lyakwe citatu, tala elenganya pali vii: Antu aingi cuze yasikulola ukwipa wakwe vino wemwineco ukailola. Canguka sana ukucita ivintu vimwi vino ukulola wemwineco ukuti vingalenga waloleka ningo alino nu kusakamala sana pa milolekele yako.—1 Samueli 16:7.