Kaumba witu wakwata amano kuluta swe yantu. Akatusakamala pano a Tata uwatutemwa. Nupya, atatuumvile kuti twaitungulula. (Yeremiya 10:23) Ndi vino umwana akalondeka ukutungululwa na akwasi, avino nafwe kwene tufwile ukutungululwa na Leza. (Ezaya 48:17, 18) Leza watupeela masunde akututungulula. Masunde yayo yaya muli Baibolo.—Welengini 2 Timoti 3:16.

Masunde yakwe Yeova yakatwazwa ukwikala ningo ndakayi. Kapya, yakatwazwa nu kumanya vino tungacita pa kuti ukunkoleelo tukikale amanda pe. Tulinzile twalondela vino Leza akututungulula pano aaliwe watuumvile.—Welengini Masamu 19:7, 11; Umbwilo 4:11.

Kwaya ivisambilizyo vimwi muli Baibolo ivikatwavwa ukumanya vino Leza akalonda kuti twacita lino ivintu ivipusanepusane vikucitika. Lyene kwaya na masunde; yene yakatunena sile ivya kucita ni visi vya kucita. (Malango 22:8) Nga tukulonda ukuvwikisya muno cisambilizyo cino Baibolo ikutunena cilozile, tufwile kuomvya umutwe. (Mapinda 2:10-12) Cisambilizyo conga cino tukasambilila muli Baibolo ica kuti uumi u wiila uwafuma kuli Leza. Ndi twamanya icisambilizyo kwene cii, tungamanya fweineco vino tungacita pa kuti tuicingilile lino tuli apa ncito, pa ng’anda, na lino tuli pa lwendo.—Welengini Milimo 17:28.

Yesu walanzile pa masunde yaili ukuti ali yakalamba pali yonsi. Isunde lya kutampilapo likatwavwa ukumanya cino umuntu wayela apa mpanga ya pa nsi. Cino umuntu  wayelapo, a pakuti amanye Leza, nu kumutemwa, alino nu kumuombela umu cumi. Isunde lii, lifwile ukuya pa nkolelo lyonsi lino tukulonda ukucita cimwi. (Mapinda 3:6) Yonsi akalondela isunde lii, yakaaya yacuza yakwe Leza; nakapya yakaaya ni nsansa. Alino ukunkoleelo yalikala amanda pe.—Welengini Mateo 22:36-38.

Isunde lyakwe ciili lingatwavwa ukulauvwana na anji. (1 Kolinto 13:4-7) Pa kuti cimanyike ukuti tukulondela isunde lii, tufwile ukulakolanya Leza muli vino tukaikala na antu.—Welengini Mateo 7:12; 22:39, 40.

Masunde yakwe Leza yakaazwa antu vino yangatemwana nu kulauvwana mu lupwa. (Kolose 3:12-14) Nakupya, Izwi lyakwe Leza likacingilila indupwa, pano likasambilizya nu kuti aatwalana yatalinzile ukutaana.—Welengini Utandiko 2:24.

Ndi tukuvwila ivyalembwa muli Baibolo, tungaicingilila mu vintu ivingi. Ndi tuli nu ufumacumi, kapya nga tukaombesya, tungazana zuwa incito, pano aakaingizya incito yakalonda antu a musango uu. (Mapinda 10:4, 26; Ayebulai 13:18) Izwi lyakwe Leza likatusambilizya nu kuti, ndi tukweti vintu ivitulingiine, tutalondelapo na vyunze. Kapya likatusambilizya nu kuti twaika amano kuli ucuza witu na Leza kuluta uku vintu vyuze.—Welengini Mateo 6:24, 25, 33; 1 Timoti 6:8-10.

Ndi tukuvwila masunde aaya muli Baibolo, tungaya nu uumi usuma. (Mapinda 14:30; 22:24, 25) Nga tukulondela isunde lyakwe Leza ilya kuti tutakoleka, tungaicingilila uku malwala akakoma antu nu ku mazanzo aakacitika pa mulandu wa kukoleka. (Mapinda 23:20) Kwene, Yeova atalesya ukumwa uwengwa, nomba akati twamwa umu kulinga. (Masamu 104:15; 1 Kolinto 6:10) Masunde yakwe Leza yakatwavwa, pano yakatusambilizya vino tungaicingilila mu micitile nu mu melenganyo itu. (Masamu 119:97-100) Nomba nanti amasunde yakwe Leza yangatwazwa vii mu wikazi witu, usi uli mulandu uno Aina Klistu a cumi yakauvwila amasunde yaa. Yakauvwila masunde pano yacindika Yeova.—Welengini Mateo 5:14-16.