Mu Julai 2022, antu iyasakamala pali vino antu aingi ya kufwa pa mulandu nu kupikwa uku kucitika umu nsi:

•   “Kukomwa kwa muntu umwi uwa ku Japan uwamanyikwe sana umu vikanza vya miteekele [uwali Pulaimu Minista Shinzo Abe] kwalenzile ukuti antu aakaikala umu Japan yaye sana ni ntete kumwi sile na antu yauze aasi ya mu mpanga ii, ni calenzile ukuti antu aingi yaye ni intete a pa mulandu wakuti umu mpanga iya Japan musicitika sana unkalwe nupya mwaya masunde aakalesya ukupika antu.”—Julai 10, 2022, The Japan Times.

•   “Antu aa mu Denmark yuvwile intete lino umonsi akaomvya imfuti wakomile antu yatatu umu cikuulwa ca Copenhagen muno yakakazizya ivintu.”—Julai 4, 2022, Reuters.

•   “Uku South Africa: antu 15 yafwile pa cisila icakuti aonsi akaomvya imfuti yatandika ukupika antu umu cikuulwa muno yakakazizya uwengwa umwi tauni lya Soweto.”—Julai 10, 2022, The Guardian.

•   “Antu ukucila pali 220 yayapisile nu kufwa lino kwali olide iya manda 4 uku mpanga iya U.S.”—Julai 5, 2022, CBS News.

 Uzye kwaya ivyalenga tusininkizye ukuti unkalwe ulafumiziwapo? Uzye Baibo Yalandapo Uli?

 Baibo ikalondolola amanda yano tufisilepo ukuti a “manda akusyalikizya,” insita ino antu yali nu unkalwe nupya aakakate. (2 Timoti 3:1, 3) Unkalwe uwa musango uwo ukalenga antu yaikala ntete ntete. (Luka 21:11) Lelo muli Baibo, mwaya ulayo wakuti unkalwe ulasila nupya “umu mpanga ya antu yakwe Leza mulaya umutende nu kucingililwa, na antu yakwe nayo kwene yatalalola nanti cimwi ica kuyasakamika.”—Ezaya 32:18, NWT. Uzye unkalwe ulafumiziwapo uli?

 Leza alafumyapo antu aipe nu konona ivyanzo vyonsi.

•   “Alino antu aipe yene Leza alayafumya umu mpanga.”—Mapinda 2:22.

•   “[Leza] akalesya inkondo pano nsi yonsi. Akakontola amalapwa, avunola masumo nu kusumbila visyangu apa moto mpaka ivipya.”—Masamu 46:9.

 Leza alafumyapo ivikalenga kuye unkalwe nu kusambilizya antu ivya kuya nu mutende.

•   “Apa Mwamba wamuzilo patalaya nupya ivya uluku uluku, nanti ivya ononyi, apa mulandu wakuti impanga ilazuula mwenemo amano akumanya Yawe, ndi vino yemba wazula mwenemo amanzi.”—Ezaya 11:9.

•   Na ndakai kwene, Leza akusambilizya antu ivya kuta ukuya nu unkalwe nu kuleka ukuomvya ivyanzo, pakuti yangasula “malupanga yao kuti yaye amase, nga na masumo yao kuti yaye mipeni yakutungwilila.”—Mika 4:3.

 Pakuti musambilile na vyuze pali vino Baibo yatulaya ukuti umu nsi mulaya umutende, belengini icipande icakuti “Uzye Cingacitika Ukwikala Ukwaula Ica Kutiinya?”

 Pakuti mumanye vino cilaya pakuti unkalwe ukafumiziwepo amanda pe, belengini icipande icakuti “Pano Nsi Palaya Umutende Manda Pe!”