1. A mauyo ci yano tungiimika umu mulimo wakwe Yeova?

 VINO sweswe ina Klistu acumi, twatemwa sana Yeova. Nupya tukalondesya ukumuombela ukulingana na pano tungapezya. Lelo pakuti twaombela Yeova ukulingana na pano tungapezya, tulinzile ukwimika mauyo umu mulimo wakwe, wakwe uyo wa kuya ni miyele isuma, kusambilila imilimo imwi, alino na vino tungazwilizya yauze. *

2. U mulandu ci uno tulinzile ukwimikila mauyo umu mulimo wakwe Leza nu kwezya na maka ukuyafikilizya?

² U mulandu ci uno tukalondela ukulaombela ningo Yeova? Umulandu ukalamba u wakuti, tukalonda ukulazanzya Tata witu uwa kwi yulu. Yeova akaya ni nsansa nga walola vino tukumuombela ukuomvya vino twacenjelamo alino na maka itu. Nupya tukalondesya ukulalunduluka muli ukapepa pakuti twaazwilizya sana aina na ya nkazi. (1 Tesa. 4:9, 10) Usi mulandu ni myaka iyatipitapo ukufuma pano twasambilile icumi, swensi kwene tulinzile ukutwalilila ukulunduluka muli ukapepa. Lekini tulole vino tungacita vivyo.

3. Kulingana na vino 1 Timoti 4:12-16 ikalanda, i vyani vino umutumwa Paulo wakomelizye Timoti ukucita?

³ Lino umutumwa Paulo walembiile Timoti kalata ya kutandikilapo, ala Timoti a eluda mpiti. Nomba Paulo wamukomelizye ukulalunduluka. (Belengini 1 Timoti 4:12-16.) Nga mwelenganya pa mazwi yano Paulo walembiile Timoti, mungalola ukuti wakomelezyanga Timoti ukulalunduluka mu nzila ziili kuli kuti, ukuya ni miyele isuma wakwe, ukutemwa,  utailo, nu kusanguluka nupya wamukomelizye ukulalunduluka umu kubelengela antu yauze, ku konkomezya, nu kusambilizya. Tumasambilila pali Timoti pakuti tulole vino ukwimika mauyo yano tungakwanisya ukufikilizya kungatwavwa ukulaombela ningo Yeova. Nupya tumasambilila na pali vyuze vino tungacita pakuti twaombesya mu mulimo wa kusimikila.

4. Kulingana na Filipi 2:19-22, i vyani vyalenzile ukuti Yeova aomvya sana Timoti umu mulimo wakwe?

⁴ I vyani vyalenzile ukuti Yeova aomvya sana Timoti umu mulimo wakwe? I miyele isuma ino wakweti. (Belengini Filipi 2:19-22.) Kulingana na vino Paulo walondolwile Timoti, tungalola ukuti Timoti wali umuicefye, uwa cisinka, waombesyanga, nupya wali uwa kutailwa. Watemilwe aina Klistu nupya waikangako sana amano. Na cii calenzile ukuti Paulo atemwe Timoti nupya atasitookanga ukumupeela imilimo ikome. (1 Kol. 4:17) Umu nzila ili imwi kwene, nga tuli ni miyele ino Yeova watemwa, akatutemwa nupya akatandika ukulatuomvya sana umu cilongano.—Masa. 25:9; 138:6.

5. (a) Mungamanya uli imiyele ino mulinzile ukuzifyako? (b) Ukulingana na vino icikope cikulangilila, uzye nkazi akulangilila uli ukuti akulonda ukufikilizya uyo wakwe uwa kuya sana ni cikuuku kuli yauze?

⁵ Mwasoolola imiyele ino mulinzile ukuzifyako. Mwapepa kuli Leza pakuti amwazwe ukumanya imiyele ino mulinzile ukuzifyako. Mwasoolola imiyele imwi ino mulinzile ukuzifyako. Wakwe, uzye mukulondekwa ukulalanga sana icikuuku kuli yauze nanti ukulatungilila sana aina na ya nkazi? Uzye mukulondekwa ukuya sana amutende nu kulaeleela yauze? Cingazipa ndi cakuti muzyako umuzo wino mwataila pakuti amwazwe ukumanya vino mungacita pakuti mwalanga sana imiyele iyo.—Mapi. 27:6.

6. Mungacita uli pakuti mufikilizye uyo winu uwa kuya ni miyele isuma?

⁶ Mwaombela pa kufikilizya uyo winu. Mungacita uli vivyo? Inzila yonga u kumanya sana imiyele kwene ino mukulonda ukuzifyako. Tuti limwi mukulonda ukuzifyako imiyele ya kweleela yauze. Mungatandikilapo ukubelenga nu kwelenganyako pali yamwi alembwa muli Baibo aitemelwanga ukweleela yauze na aateleelanga yauze. Elenganyini pali Yesu uwaitemelwanga ukweleela yauze. (Luka 7:47, 48) Nupya atikanga amano kuli  vino yaluvyanyanga, lelo wikanga amano uku visuma vino yacitanga. Nomba Afaliseo yene aaliko umu manda yakwe Yesu yapusiineko nupya ‘yalolanga yauze ukuti yatacindama.’ (Luka 18:9) Pa cisila ca kwelenganya pa malyasi yaa, mwayuzya mweineco ukuti: ‘I vyani vino nkaelenganya pali yauze? I miyele ci ino yakwata ino nkaikako amano?’ Ndi cakuti cikamutalila ukweleela umwi, mukeezyeko ukulemba imiyele isuma ino umuntu wiyo wakwata. Alino mukayuzye ukuti: ‘Uzye Yesu akalola uli umuntu wii? Uzye angamweleela?’ Kucita vii kungatwavwa ukusenuka muli vino tukaelenganya. Pa kutandika limwi cingaatutalila ukweleela uwatatuluvyanya. Nomba nga twaombesya tulaaitemelwa ukweleela yauze.

7. Ukulingana na vino Mapinda 22:29 ikalanda, uzye Yeova akaomvya uli antu aamanyikisya imilimo ndakai?

⁷ Uyo uze uno mungimika, u kusambilila milimo iingalenga ukuti muomviwe umwi iuvi lyakwe Yeova. Elenganyini pa yaomvi uwingi akulondekwa ukuomba umulimo wa kukuula Mabetele, Vikuulwa Vya Ukongano, na Mang’anda ya Wene. Aingi aakaomba imilimo iyo yasambilila ivya kuomba uku ina na ya nkazi aamanyikisya ivya kuomba imilimo iyo. Wakwe vino icikope cikulangilila, aina na ya nkazi yakasambilila ivya kuomba imilimo ikalondekwa pa kuzifya ivikuulwa vya Maukongano na Mang’anda ya Wene. Umu nzila kwene ii alino ni nzila zyuze, amuno Yeova Leza, “Umwene wa manda pe,” na Klistu Yesu “Kateeka wakwe ya kateeka,” yakaombela imilimo ingi ukuomvya aomvi amanyikisya imilimo. (1 Tim. 1:17; 6:15; belengini Mapinda 22:29.) Tukalonda ukuombesya nu kuomvya imilimo ino twamanya uku kucindikilamo Yeova, asi kuicindamika foo.—Yoa. 8:54.

8. Mungamanya uli umulimo uno mungasambilila uungamwazwa ukuombela Yeova?

⁸ Mwasoolola umulimo uno mungasambilila. U mulimo ci uno mungasambilila? Munguzya ya eluda aa mu cilongano cinu nanti umwangalizi wa ciputulwa pakuti yamunene umulimo uno yakulola ukuti mungasambilila. Katulangilile tuti, yaminena ukuti mulinzile ukuzifyako imilandile ni misambilizizye inu, mulinzile ukuyuzya pakuti yaminene muno mulinzile ukuzifya. Lyene mulinzile ukuombesya pakuti muombele muno yamunena. Mungacita uli vivyo?

9. Mungacita uli pakuti mufikilizye uyo wa kusambilila umulimo umwi?

⁹ Mwaombela pa kufikilizya uyo. Tuti limwi mukulonda ukuombela pa kuya kasambilizya musuma. Mulinzile ukulaisambilizya sana umu kabuku kakuti Mwaombesya Pakuti Mwawelenga nu Kusambilizya Ningo. Nga mwapeelwa imbali pa kulongana kwa mukasi ka mulungu, munguzyako umwina umwi aakalanda ningo amalyasi pakuti akutike ukwi lyasi linu nu kumwazwa ukulola muno mungazifyako. Nupya mwapekanya imbali ino mwapeelwa pakuti antu yalola ukuti mukaombesya nupya mwemwe aakutailwa.—Mapi. 21:5; 2 Kol. 8:22.

10. Langililini vino tungasambilila umulimo umwi.

¹⁰ Mungacita uli ndi cakuti mukulonda ukusambilila umulimo umwi uno cikamutalila ukuomba? Mutalinzile ukutoovoka! Umwina uwi zina lyakuti Garry camutalilanga ukubelenga. Akaiusya vino uvwanga insonyi pali vino camutalilanga ukubelenga lino yali umu kulongana. Lelo watwalilile ukwezya ukuzifizyako imibelengele. Nupya pa mulandu wakuti uvwilanga ukusunda kuno aina yamupeelanga nu kwaya umu mpapulo zitu, calenga ukuti ndakai aalanda malyasi ya pa cilongano, pa maukongano ya ciputulwa, na aa citungu!

11. I cani cingalenga ukuti tupeelwe imilimo na yuze umu mulimo wakwe Yeova, wakwe vino cali kuli Timoti?

 ¹¹ Uzye Timoti wizile aya a kalanda musuma nanti kasambilizya musuma? Baibo italandapo. Nomba ukwaula nu kutwisika, Timoti wizile atandika ukuomba ningo sana imilimo ino wapeezilwe pa mulandu wakuti walondiile vino Paulo wamusunzile. (2 Tim. 3:10) Mu nzila ili imwi kwene, ndi cakuti twasambilila imilimo imwi, cilalenga ukuti twaomba imilimo iingi umu mulimo wakwe Yeova.

12. Uzye yauze yamwazwilizya uli?

¹² Swensi kwene tukaipakizya pa milimo ino yauze yakaomba. Wakwe, nga tuli umu cipatala, tukauvwa ningo sana ndi cakuti ya eluda aaya umu Makomiti Aakulanzyanyizizyamo ni Vipatala (HLC) nanti umu Maumba Aakutandalila Aalwale (PVG) yiza umu kutupempula. Tukauvwa ningo sana ndi cakuti eluda umwi wapatulako insita iya kukutika kuli sweswe nu kututeekezya. Nupya nga tukulondekwa uwazwilizyo pa mitungulwile iisambililo lya Baibo, tukatemwa sana ndi cakuti umwina nanti nkazi uwataomba upainiya pa myaka iingi wazumila ukuya umu kutungulula isambililo pamwi naswe nu kutwazwako muno tungazifya. Aina yaa na ya nkazi yakaya ni nsansa lino yakutwazwa. Nupya naswe kwene tungaya ni nsansa ndi cakuti tukuitemelwa ukwazwa aina na ya nkazi. Yesu walanzile ukuti: “Mu kupeela mwaya insansa izingi ukucila izyaya umu kupokelela.” (Mili. 20:35) Ndi cakuti mukulonda ukulaombela sana Yeova umu milimo yii ni milimo yuze, i cani icilamwazwa ukufikilizya uyo uwo?

13. Lino tukwimika uyo, i vyani vino tulinzile ukwiusya?

¹³ Mutaimika uyo uno mutamanyile ningo. Wakwe, limwi mungelenganya ukuti, ‘Nkulonda ukulaombesya umu cilongano.’ Nomba cingamutalila ukufikilizya uyo uwo, nupya limwi mutanga mumanye nu kumanya ndi cakuti imufikilizya uyo uwo nanti foo. Fwandi mwaimika uyo uwa mukulungatika. Limwi mungalemba nu uyo uwo na vino mukulola ukuti vilamwazwa ukuufikilizya.

14. U mulandu ci uno tulinzile ukuya aiteyanye ukusenuka lino tukwimika mauyo?

¹⁴ Nupya tulinzile ukuya aiteyanye ukusenuka lino tukwimika mauyo. U mulandu ci? Pano ivintu vimwi ivikatucitikila tutakwatapo  amaka. Katulangilile: Mutumwa Paulo wazwilizyeko ukupanga icilongano icipya umu musumba wa Tesalonika. Nupya ukwaula nu kutwisika walondesyanga ukwikala umu musumba uwa pakuti aazwilizye aina Klistu apya. Lelo aakanyanga yalwisizye mpaka iyazinga Paulo umu musumba. (Mili. 17:1-5, 10) Paulo aikala kukwa, nga wisile aina yakwe umu uzanzo. Lelo nanti ciye vivyo, atatiile ukuyazwa. Paulo watwalilile ukucita sile vino angakwanisya. Nupya lino papisile insita watumile Timoti pakuti akaazwe aina Klistu aa ku Tesalonika ukuya nu utailo ukome. (1 Tesa. 3:1-3) Aina Tesalonika yali sana ni nsansa pa mulandu wakuti Timoti waipeelisye ukuya umu kuombela konsi kuno walondekwanga.

15. Uzye mauyo itu yangasenuka uli ndi cakuti vintu vyasenuka? Langililini.

¹⁵ Tungasambililako kuli vino vyacitikiile Paulo umu Tesalonika. Limwi tungalinga ukuomba umulimo umwi, nomba ivintu nga vyasenuka cingalenga ukuti tutapeelwa umulimo uwo. (Kasa. 9:11) Ndi cakuti vya musango uwo vyamucitikila, mungimika uyo uze uno mungakwanisya ukufikilizya. Vikwene ivyacitikiile atwalane yamwi, ya Ted na ya Hiedi. Yatiile ukuombela pa Betele pa mulandu nu kulwalilila. Lelo pa mulandu wakuti yatemilwe Yeova, yalonzile inzila zyuze izingayazwa ukulaombesya umu mulimo wa kusimikila. Inkoleelo, yatandike upainiya wa nsita yonsi. Lyene lino papisile insita, izile iyasontwa ukuya ya painiya aiyele, nupya ya Ted yasambiliziwe ukuya yakaazwa uku mwangalizi wa ciputulwa. Nomba lino yakuzile, yatile ukulaazwilizya umu ciputulwa. Ya Ted na ya Hiedi yilwike ukuti yataali nu kutwalilila ukuomba umulimo uwa pa mulandu nu kukota. Lelo nanti cakuti yuvwile uyi, yamanyile ukuti yangaombela Yeova imilimo yuze. Ya Ted yalanzile iyati, “Twasambilile ukuti tungaombela Yeova umu milimo ipusanepusane.”

16. I vyani vino tungasambilila pali Galatiya 6:4?

¹⁶ Tutanga tulesye vyonsi ivikatucitikila umu umi. Fwandi tutalinzile ukulaelenganya ukuti imilimo ino tukaomba i yalenga tuye acindame kuli Yeova, nupya tutalinzile ukulalinganya imilimo ino twapeelwa kuli ino yauze yakaomba ino swemo tutakwata. Ya Hiedi yalondolwile ukuti, “Mutanga muye ni nsansa ndi cakuti mukulinganya umi winu uku umi wa yantu yauze.” (Belengini Galatiya 6:4.) Fwandi cacindama ukulola inzila zino tungazwilamo yauze nu kuombela Yeova. *

17. Mungacita uli pakuti mulinge ukupeelwa imilimo umu mulimo wakwe Yeova?

 ¹⁷ Mungapeelwa imilimo ingi umu mulimo wakwe Yeova ndi cakuti mukwangupazya umi nu kukanakongola na patalinzile. Mwaimika mauyo yano mungafikilizya mu nsita inono aangamwazwa ukwizafikilizya mauyo akalamba. Wakwe, ndi cakuti uyo winu ukalamba u kutandika upainiya wa nsita yonsi, limwi mungasoololapo ukutandika ukuomba upainiya wa nsita inono cila mwezi. Nupya ndi cakuti uyo winu u kuya umuomvi aakatumikila, mungatandikilapo ukulaombesya umu mulimo wa kusimikila nu kupempula alwale na akoloci na aakombe aaya umu cilongano cinu. Vino mungasambilila lino mukuomba imilimo iyo vingamwazwa ukuti mukapeelwe imilimo na yuze uku nkoleelo. Fwandi mwaombesya umu mulimo onsi uno mwapeelwa.—Loma 12:11.

18. Wakwe vino tukulola pa cikope, i vyani vino tungasambilila kuli nkazi Beverley?

¹⁸ Kukota kutanga kulesye umuntu ukwimika mauyo aakuombela Yeova. Elenganyini pali nkazi Beverley uwa myaka 75. Walwiile indwala iipisye iyalenzile nu kuti camutalila ukupita. Nomba walondesyanga ukuombako kampeni iya kwama antu uku Ciusyo. Fwandi wimike mauyo ya mukulungatika. Nupya lino wafikilizye amauyo yayo, wali sana ni nsansa. Pa mulandu nu kuombesya kwakwe nkazi wii, calenzile ukuti na yauze yatandike ukuombesya umu mulimo wa kusimikila. Yeova akataizya sana pali vino aina yaa na ya nkazi aakote yakaomba usi mulandu ni intazi zino yakapitamo izikalenga ukuti yataomba wakwe vino yakulonda.—Masa. 71:17, 18.

19. A mauyo ci yamwi yano tungimika umu mulimo wakwe Leza?

¹⁹ Mwaimika mauyo yano mungakwanisya ukufikilizya. Mwaya ni miyele ingazanzya Yeova. Mwasambilila imilimo ingalenga Leza amiomvya sana umwi iuvi lyakwe. Mwalola inzila zino mungazwilamo aina ya nkazi. * Wakwe Timoti, Yeova nga wamwazwa cilalenga ukuti ‘antu yonsi yalola vino mukulunduluka.’—1 Tim. 4:15.