1. 1. SATANA CIWA. Malaika uwapondwike kuli kuti satana, aliwe akalenga ukuti kuye ulupato. Leza alonona Satana na antu yonsi aakapata auze wakwe vino Satana akacita.—Masamu 37:38; Loma 16:20.

2. 2. INSI YAKWE SATANA IIPE UMWAYA ULUPATO. Leza walaya ukuti alafumyapo antu yonsi aaya nu lupato, ukwikako na aaya umu tuungwe utwa miteekele aakacita mafisakanwa alino na intunguluzi zya mu mipepele izikatungilila ulupato. Nupya Leza alafumyapo na antu aakacita mabizinesi aaya na ukaitemwe, aakacita mafisakanwa, alino nu kucenjezya yauze.—2 Petulo 3:13.

3. 3. KUKANAMALILIKA. Baibo ikalondolola ukuti antu yonsi yapyana ukukanamalilika, kuli kuti ilingi tukaelenganya iviipe, ukuyuvwa uyi, alino nu kucita iviipe. (Loma 5:12) Vimwi vino tukacita insita izingi pa mulandu wakuti tutamalilika, u kutwalilila ukusokela yauze alino nu kulangizya vino twayapata muli vino tukalanda na vino tukacita. Leza alatwazwa ukuta ukucita ivintu vivyo iviipe, lyene ulupato lulafumiziwapo manda pe.—Ezaya 54:13.

1. 1. KUTALAYA ULUFYENGO. Insi ilateekwa nu Wene Wakwe Leza, kuli kuti Uwene uwaya ukwi yulu uwaya nu mulinganya nupya ulatwalilila ukuyako manda pe. (Danieli 2:44) Kutalaya ulufyengo nu kukanaikaanya. Leza alafumyapo ulufyengo lonsi ulwayako ndakai.—Luka 18:7.

2. 2. ANTU YONSI YALAYA NU MUTENDE. Kusi aliwensi alacula pa mulandu nu unkalwe nanti inkondo. (Masamu 46:9) Antu yonsi yalaikala umutende nupya yalaipakizya.—Masamu 72:7.

3. 3. ANTU YONSI YALAYA AMALILIKE NUPYA YALAIKALA MANDA PE. Antu yonsi yalatemwa sana antu yauze. (Mateo 22:39) Kusi aliwensi alacula pa mulandu ni vili vyonsi, ukwikako sile nu mu melenganyo. (Ezaya 65:17) Pa nsita iya lino ulupato lonsi lulafumiziwapo, antu yalaipakizya umutende umalilike.—Masamu 37:11.

Uzye mukalondesya ukwikala umu nsi ya musango uwo? Na ndakai kwene, antu aingi yakasambilila vino yangacita pakuti yate ukuya nu lupato ukupitila umu kuomvya ivisinte ivya muli Baibo. (Masamu 37:8) Nupya vivyo kwene ali vino ya Nte Yakwe Yeova umu nsi yonsi yakacita. Nanti cakuti yakwata intambi ni nkulilo izipusanepusane, yatemwana sana nupya yalemana kwati ulupwa longa.—Ezaya 2:2-4.

Ya Nte Yakwe Yeova yangatemwa ukumunenako vino yasambilila pali vino mungacita ndi cakuti yamufyenga nanti yakumucuzya. Vino yangamusambilizya vingamwazwa ukuta ukuya nu lupato nu kutandika ukuya nu kutemwa. Mungasambilila ivya kulanga ukutemwa uku yantu yonsi ukwikako sile na kuli yayo aasimutaizya nanti aya nu lupato. Na cii, cingalenga ukuti mwaya ni nsansa nu kuya na ucuza usuma na yauze. Ni cicindamisye icakuti, mungasambilila vino mungacita pakuti mukayeko lino Uwene Wakwe Leza ulafumyapo ulupato lonsi.—Masamu 37:29.