Usesemo 1. Ivilundumusi

“Kulaya vilundumusi ivikalamba.”​—LUKA 21:11.

● Winnie, uwa mwaka onga ni myezi 4 yamufumizye mu vintu ivyamwilikizye uku Haiti. Iumba lya yantu akaomba ku mulawasa yamanyisyanga antu pa uzanzo uwacitike lino yamuvwile ala akulila kalowelela. Wapuswike uku cilundumusi nomba avyazi yakwe yene yafwile.

UZYE IVISINKA VIKALANGILILA CANI? Lino icilundumusi icikalamba icapimilwe kufika kuli 7.0 cacitike uku Haiti umu Januwale 2010, cakomile antu kucila pali 300,000. Nupya yauze 1.3 milyoni yasiile ukwaula mang’anda. Nanti i cakuti icilundumusi icacitike ku Haiti cali icikulu sana, asi ali cino cacitike sile. Apiipi ni vilundumusi 18 ivikalamba vyacitike umu nsi yonsi pakasi kakwe Epuleo 2009 na Epuleo 2010.

I VYANI VINO ANTU AINGI YAKALANDA? Yakati kusicitika ivilundumusi ivingi; pa mulandu wa vya kupangapanga ivyayako ndakai, swemo twamanya ivingi pa vilundumusi ukucila antu aliko mpiti.

UZYE VIKWENE VINO YAKALANDA I VYA CUMI? Elenganyini pali cii: Baibo italanda pa mpendwa ya vilundumusi ivilacitika umu manda ya kusyalikizya. Lelo ikalanda ukuti “ivilundumusi ivikalamba” vilaacitika “umu ncende zimwi zimwi,” nupya vyaya pa vimanyililo vya nsita ino tufisilepo.—Mako 13:8; Luka 21:11.

UZYE MUKWELENGANYAPO ULI? Uzye tukulola ivilundumusi ivikalamba wakwe vino Baibo yasoowile?

Tutanga tuti ivilundumusi sile ali usininkizyo wakuti tukwikala umu manda ya kusyalikizya. Lelo vyaya pa usesemo onga uukufikiliziwa. Lolini usesemo wakwe ciili.

[Amazwi umu vilembo vikulu]

“Swe muno twasambilila vyakwe [sayansi] tukavyama ukuti ivilundumusi ivikalamba. Lelo yonsi asyala yakavyama ukuti uzanzo uwipiisye.”​—YA KEN HUDNUT, U.S. GEOLOGICAL SURVEY.

[Kutaizya Atuzumilizye Ukuomvya Icikope]

© William Daniels/Panos Vikope