Navyalilwe umu Acul, itauni ilyayela ukutali umu myamba ya Guatemala. Ulupwa lwane aa Ixil, kaliumba akatuntwike umu luko lwa ya Maya. Lino nakulanga navwanganga Icispanish nu lulimi lwa ku ncende kwene ii. Lino navilwe ala umu Guatemala mwaya ukulwisyanya kwa mitundu ukwasenzile imyaka 36. Pa nsita iya aina Ixil aingi yayakomile.

Uwanda umwi ala indi ni myaka 4, tatalenzi uwali ni myaka 7 wacinyanga akalibomu kakusumba ni minwe akizile kapuulika. Nizile impafula pa mulandu nu kupuulika kwene kuko, nomba ica ulanda i cakuti tatalenzi wene wafwile. Lino vii vyacitike, yantwazile kuno yasungilanga ana apafula umu musumba wa Guatemala kuno nasambilile ukubelenga nu kulemba ivilembo vya mpafu. Lino nali kuuku, ntamanyile ningo icalenzile ya mwalimu ukunkanya ukulalanda na ana yauze nupya ana yanji nayo yantalukanga. Lyonsi nalondesyanga ukuti imyezi iili ino twayanga uku ng’anda cila mwaka ifike zuwa pakuti nkaye kuli ya mayo ali ni cikuuku nupya aansakamalanga sana. Icaulanda i cakuti ya mayo yafwile ala indi sile ni myaka 10. Nuvulunganiziwe sana ukufwilwa umuntu wenga sile uwantemilwe sana umu nsi yonsi.

Lino nali ni myaka 11, naswilile uku ng’anda nupya naile intandika ukwikala na ya tatalenzile nu lupwa lwao. Yansakamalanga muli vino nalondekwanga, nomba kutaali uwandanganga icikuuku nanti kundenga nayuvwa ukuti natemwikwa. Insita zimwi, nalililanga kuli Leza inti: “U mulandu ci uno ya mayo yafwila? U mulandu ci uno nayela impafu?” Antu yanenanga ukuti iviipe vyonsi ivyancitikilanga u kulonda kwakwe Leza. Na cico calenzile nalola Leza ukuti waya na ukaitemwe nupya ataya ningo. Icintu conga icalenzile ukuti ntaikulika, i cakuti ntakweti inzila ya kuikulikilamo.

Ukuya impafu kwalenzile nauvwa sana uyi nu kuyuvwa ukuti ntacingililwa. Lino nali umwance, antu yalaalanga nani ku maka. Ntatazile nenepo aliwensi pali vino vyacitikanga, pano nelenganyanga ukuti pasi aliwensi amangazwa. Pa nsita izingi antu yatalandanga nani, nupya nani kwene ntalanzyanyanga nayo. Nayanga sile nenga ale nkuvwa uyi, nupya ntataile aliwensi.

Lino nali ni myaka 13, ya Nte Yakwe Yeova yaili atwalane yantandalile pa nsita ya kupuuza ale indi uku sukulu. Mwalimu wenga uwamanyile uwavya uno nakweti nupya uwanjisileko amano, u wayanenyile ukuti yantandalile. Yanenyile pa ulayo uwaya muli Baibo uwakuti afwe yalatuutululwa nu kuti wanda umwi impafu zilatandika ukulola nupya. (Ezaya 35:5; Yoane 5:28, 29) Natemilwe vino yansambilizye, nomba cantalile ukulanzyanya nayo pano ntaelizye ukulanda na antu. Nomba nanti icakuti ntisileko amano, yanteekelile nupya yatwalilile ukuntandalila pakuti sile yansambilizya ivyaya muli Baibo. Atwalane yaa yapitanga makilomita 10 nu kukwela umwamba pakuti ize yafike kuno nikalanga.

Ya tatalenzi yalondololanga ya Nte yaa ukuti yazwalanga ningo nomba yataakweti impiya izingi. Nomba yalangilile ukuti yanjisileko sana amano nupya yandetelanga nu tumawila utunono. Nayuvwanga ukuti Aina Klistu ya cumi sile aangaipelesya ukucita vivyo.

Nasambilile Baibo ukuomvya impapulo zya mpafu. Nanti icakuti nuvwikisyanga vino nasambililanga, kwayanga vimwi ivyantalilanga ukuzumila. Wakwe, cantalilanga ukuzumila ukuti Leza akansakamala nu kuti antu yauze yanganenako vino Yeova akayuvwa pali nene. Nuvwikisye umulandu uno Yeova wazumilizizya ucuzi pa nsita imwi, nomba cantalile ukulamulola ukuti a Tata uwaya nu kutemwa. *

Panono panono, vino nasambililanga mu Malembo vyangavwile ukusenuka muli vino nalolanga ivintu. Wakwe, nasambilile ukuti Yeova akauvwa sana uluse ndi cakuti antu yakucuula. Lino antu yakwe yayacuzyanga, Leza walanzile ukuti: “Natindola kukalala kuno aina Eguputo yakucita pa antu yane. . . Manyile kunyunguluka kwao konsi.” (Kufuma 3:7) Lino natandike ukulola imiyele yakwe Yeova isuma, calenzile njipeele kuli aliwe. Mu 1998 nabatiziwe nu kuya Inte Yakwe Yeova.

Lino papisile umwaka ukufuma pano nabatiziwilwe, nazanyilwe ukwi sukulu lya mpafu ilyayelile mupipi nu musumba wa Escuintla. Eluda umwi umu cilongano wamanyile intazi zino nakwatanga pakuti sile inje umu kulongana lino nikalanga uku Acul. Pakuti inje mu kulongana, napitanga umu mwamba uno atwalane aizanga mu kunsambilizya Baibo yapitangamo, nupya cantalilanga sana ukupita intamfu itali. Pakuti intazi ii isile, eluda wazanyile ulupwa lumwi lwakwe ya Nte umu Escuintla ulwaipeelisye ukulansunga pa ng’anda pa mwao nu kungazwa ukuya mu kulongana. Kufika na ndakai yakansakamala kwati nene lupwa lwao.

Ningalanda ivintu ivingi vino amu cilongano yancitila ivikalanga ukuti yaya nu kutemwa kwa cumi. Vyonsi vii vyalenga nsininkizye ukuti vino nene Nte Yakwe Yeova, naya pa Ina Klistu ya cumi.—Yoane 13:34, 35.

Ndakai lyene nsiyuvwa uwa sile sile nupya nakwata upaalilo. Ndakai lyene umi wane wakwata upiliulo. Pa mulandu wakuti nkaomba umulimo wa nsita yonsi wakwe ya Nte Yakwe Yeova uwa kusambilizya antu Baibo, nkaika amano ku kusambilizya antu icumi icaya muli Baibo ukucila ukwika mano kuli vino nalemala. Nupya nakwata ni syuko lya kuombako ueluda nu kulandako malyasi ya Baibo umu vilongano. Nupya nkalandako na malyasi ya Baibo apa Maukongano ya citungu ukukazanwa antu aingi.

Mu 2010, namazile Sukulu Lya Mulimo Lyakwe ya Eluda na Aomvi Aakatumikila (lino ndakai yakaama ukuti Sukulu Lyakwe ya Kakosoola ya Wene) ilyayelile umu El Salvador. Isukulu lii lyalenzile naomba ningo imilimo ino napeezilwe umu cilongano. Vino nasambilile ukwi sukulu lii vyalenzile nayuvwa ukuti nacindama nu kuti Yeova Leza aangalenga umuntu aliwensi ukulinga ukuomba umulimo wakwe, wantemwa.

Yesu watile: “Mukupeela mwaya upolelelo ukulu cuze kuluta mukupokelela!” (Milimo 20:35) Ndakai ningalanda ukuti naya ni nsansa, nupya nanti icakuti ntelenganyanga ukuti ningaazwako yauze, ndakai nkayuvwa ukuti ningazwako yauze.