Mu kuikanya mwaya nu kucita vii

• Ukuteeka umwenzo

• Kukanaya ni cipyu

• Kuomba imilimo ino upeezilwe nanti i cakuti utaitemilwe

• Ukwika auzo pa nkoleelo muli vyonsi

Ana amanya ningo ivyakuikanya ilingi yakacimvya intazi, nanti icakuti limwi ukucita vivyo kungalenga yuvwe ningo. Nomba ndi cakuti ana yatamanya ningo ivya kuikaanya ilingi

• yakaya sana nu lwete

• yakaya sana ni cikonko

• yakapeepa, ukumwa uwengwa nanti kuomvya milembo iikavulunganya uwongo

• yasisoolola ningo vino yafwile ukulya

Aasambilila sana yazana ukuti ana amanya ningo ivyakuikanya ilingi yakakula ningo nupya yasilwalilila, ukusakamikwa sana pa mpiya, alino yakaya acingililwe insita yonsi. Vii vino yazana, vyalenzile ukuti Angela Duckworth kasambilizya wapa Yunivesiti iyaku Pennsylvania alande ukuti: “Kuikaanya i cintu cicindame sana.”

Sambililini ukulanda ati awe nu kucita vivyo kwene.

CISINTE CA MULI BAIBO: “Lelo lino mukuzumila mazwi inu muvwange muti, ‘Ee’ nanti lino mukukana muti, ‘Awe.”—Mateo 5:37.

Ana anono yangatandika ukulila sana nanti kucuzya pakuti sile avyazi yayapeele vino yakulonda limwi na lino yali pa yantu. Ndi cakuti avyazi yayapeela vino yakulonda ana yalatwalilila ukucita sile vivyo kwene lyonsi lino yakulonda vimwi.

Nomba, ndi cakuti umuvyazi walanda ati awe nupya wakanilila sile ukumupeela, umwana alasambilila ukuti asi vyonsi vino tukalonda umu umi vino tungapeelwa. Ya David Walsh yalemvile yati: “Antu amanya ningo ivyakuikanya yakaya sana ni nsansa. Ndi cakuti tukusambilizya ana itu ukuti antu yalayapeela vyonsi vino yakulonda muno nsi ala tusikucita ningo.” *

Ndi cakuti musikupeela mwana winu vyonsi vino akulonda cilalenga ukuti amanye ningo ivya kuikanya,  wako ndi cakuti yakumupatikizya ukuomvya milembo iikavulunganya uwongo, ukucita uzelele, nanti ukucita ivili vyonsi ivingalenga ivintu ukumwipila.

Mwaazwa ana inu ukumanya visuma nanti viipe ivingacitika ndi yacita vimwi.

CISINTE CA MULI BAIBO: “Muntu akazombola kulingana na vino wakomela.”—Galatiya 6:7.

Mwana winu afwile ukumanya ukuti muli vyonsi vino akucita mwaya ivikafumamo, nu kuti mu kukanaikaanya mungafuma ivintu iviipe. Wako ndi cakuti, umwana winu akasooka zuwa ndi yamuluvyanya, auze yonsi yalatandika kumutaluka. Nomba, ngi cakuti wasambilila ukuikaanya lino vimwi vyacitika—nanti ukuloleela ukuluta ukusoka zuwa—antu yalamutemwa sana. Mwaavwa umwaninu ukumanya ukuti ndi cakuti akuikanya alaya nu umi usuma.

Mwasambilizya umwaninu ukulaika mano uku vintu vyampomvu.

CISINTE CA MULI BAIBO: “Mwamanya kusolola ivili visuma.”—Filipi 1:10.

Ukuikanya kukatwazwa ukukanacita ivintu iviipe, alino nu kucita ivintu vino tutakulolanda ukuomba nomba vino tulinzile kuomba. Cacindama ukusambilizya umwana winu ukumanya ivintu vyampomvu alino nu kulaika vivyo kwene pa nkoleelo umu umi wakwe. Wako, alinzile kukoleezya ukuzana omuweki kuluta ivyakuizanzya.

Mwaya icilangililo cisuma ku yana.

CISINTE CA MULI BAIBO: “Nati mupeela cilangililo, kuti namwe kwene mwacita ndi vino nali namucitila.”—Yoane 13:15.

Umwana winu alaalola vino mukacita ndi cakuti yamwi yamusosya. Mwalaanga umwaninu ukuti umu kuikanya mukafuma ivisuma. Wakwe, ndi cakuti umwana wamuluvyanya cimwi, uzye mukasoka zuwa nanti mukateeka umwenzo?