Ica cumi, Ciwa akuno waya. Ali “kateeka wa nsi yii,” nupya wali a malaika uwizile apondokela Leza. (Yoani 14:30; Efeso 6:11, 12) Baibo ikalondolola imiyele ino Ciwa wakwata ukuomvya mazina alino nu ulondolozi uu:

•   Satana, icikapiliula ukuti “Kakaanya.”—Yobo 1:6.

•   Ciwa, icikapiliula ukuti “Kazewanya.”—Kusokolola 12:9.

•   Inzoka, icikapiliula nu kuti “Kaponzya.”—2 Kolinto 11:3.

•   Katunka.—Mateo 4:3.

•   Kabepa.—Yoani 8:44.

Ciwa asi muntu nanti imiyele iipe

 Antu yamwi yakaelenganya ukuti Satana Ciwa u muntu nanti imiyele iipe iyaya umu myenzo itu. Lelo, muli Baibo mwaya vino Leza yalanzyanyanga na Satana. Leza waya umumalilike, fwandi tutanga tuti walandanga uku Ciwa icaya umu mwenzo wakwe. (Malango 32:4; Yobo 2:1-6) Nupya, Satana wezizye ukutunka Yesu wino aatatala wacitapo uluyembu. (Mateo 4:8-10; 1 Yoani 3:5) Fwandi Baibo ikalangilila ukuti umu cumi Ciwa akuno waya, asi sile cimwi icaya umu mwenzo wa muntu nanti icintu ca kwelenganya sile.

 Uzye tulinzile ukuzunguka nga twamanya ukuti antu yamwi yazumila ukuti kutaya Ciwa? Awe foo, pano Baibo ikalondolola ukuti Satana akaomvya inzila izipusanepusane apa kucita vino akulonda. (2 Tesalonika 2:9, 10) Inzila yonga ino akaomvya sana u kulenga antu ukuzumila ukuti atayako.—2 Kolinto 4:4.

  Ufi: Lusifa ali zina lyuze lyakwe Ciwa.

 Cisinka: Izwi lya Ciebele lino yasenula umu Mabaibo ukuti “Lusifa,” likapiliula ukuti “namukokolo.” (Ezaya 14:12) Baibo ikalangilila ukuti izina lii likalozya kuli ya kateeka, nanti aene ya ina Babiloni yano Leza wali nu konona pa mulandu ni cilumba cao. (Ezaya 14:4, 13-20) Izwi lyakuti “namukokolo” yaliomvizye pa kutumfya ya kateeka aina Babiloni lino yacimviwe.

  Ufi: Leza akaomvya Satana pa kupingula antu.

 Cisinka: Ciwa umulwani wakwe Leza asi umuomvi wakwe. Satana akapeela antu aakaombela Leza imilandu ya ufi nu kuyacuzya.—1 Petulo 5:8; Kusokolola 12:10.