1 Korint 10:1-33
10 Ro jeiũ im jatũ, ikõn̦aan bwe kom̦win jel̦ã bwe aolep ro jim̦m̦aad rar pãd ium̦win kõdo̦ eo im er aolep rar kijoone lom̦al̦o eo,
2 im aolepeer rar peptaij ke rar l̦oore Moses ilo tõre eo rar pãd ium̦win kõdo̦ eo im kijoone lom̦al̦o eo.
3 Rar aolep m̦õñã ejja m̦õñã eo wõt jãn Anij,
4 im er aolep rar ilimi ejja dãn eo wõt jãn Anij. Rekõn idaak jãn dekã eo jãn Anij me ear l̦oor er, im dekã eo ej mel̦el̦ein* Christ.
5 Bõtab enañin aolepeer rar jab kabuñbũruon Anij, im rar mej ilo ãne jem̦aden.
6 Men kein rej joñak ñan kõj bwe jen jab kõn̦aan men ko renaaj ko̦kkure kõj, ãinwõt aer kar kõn̦aan.
7 Kom̦win jab oktak im erom ri-kabuñ ñan ekjab, ãinwõt kar jet iaaer. Em̦õj je: “Armej ro rar jijet im m̦õñã im idaak, im rar jutak im lem̦õn̦õn̦õ.”
8 Bareinwõt, jen jab mourin l̦õñ,* ãinwõt an jet iaaer kar l̦õñ.* Kõn wõt aer kar kõm̦m̦ane men in, 23,000 iaaer rar mej ilo juon wõt raan.
9 Jen jab mãlejjoñe Jeova,* ãinwõt an jet iaaer kar mãlejjoñe, innem jedpãnit ko rar itok im m̦an er.
10 Jen jab ellotaan, ãinwõt an jet iaaer kar ellotaan, innem ri-ko̦kkure* eo ear m̦an er.
11 Men kein rar wal̦o̦k ñan er rej ãinwõt joñak ñan kõj, im kar jei ñan kakkõl kõj, ro rej mour ilo jem̦l̦o̦kin jukjukun pãd in.
12 Kõn men in, eo ej l̦õmn̦ak bwe ej jutak pen en kanooj kõjparok bwe en jab buñ.
13 Menin kapo ko kom̦ij iiooni rej bar wal̦o̦k ñan aolep armej. Bõtab Anij etiljek, im ejjãmin kõtl̦o̦k bwe en wal̦o̦k menin kapo ko ñan kom̦ el̦apl̦o̦k jãn joñan eo kom̦ maroñe, ijoke ñe ewal̦o̦k menin kapo, enaaj kõm̦m̦an ial̦an ami jo̦o̦r im jipañ kom̦ bwe kom̦win kijenmej.
14 Kõn men in, kom̦ ro rejitõnbõro ippa, kom̦win ko jãn kabuñ ñan ekjab.
15 Ij kõnono ñan kom̦ ro relol̦o̦kjen̦, kom̦win make etale im lale el̦aññe ejim̦we mel̦el̦e kein aõ.
16 Ñe jej idaak jãn cup in kõjeraam̦m̦an eo jej jare, ta jejjab kobal̦o̦k ilo ãnbwinnin Christ ke? Ñe jej m̦õñã jãn bũreet eo jej kõrrãjete ñan elõñ m̦õttan, ta jejjab kobal̦o̦k ilo ãnbwinnin Christ ke?
17 Ewõr juon wõt bũreet, im meñe jelõñ, bõtab jej juon wõt ãnbwin, kõnke jej aolep m̦õñã jãn juon wõt bũreet.
18 L̦õmn̦ak m̦õk kõn ri-Israel ro: Ta, ro rej m̦õñã jãn menin katok ko rejjab bar bõk kun̦aaer im kabuñ ñan Anij ilo lokatok eo ke?
19 Innem ta in ij kajjioñ ba? Mel̦el̦ein ke bwe ewõr tokjãn men ko rej ajil̦o̦k ñan juon ekjab ak bwe ewõr tokjãn ekjab?
20 Ejjab. Men eo ij ba in ej bwe men ko ri-aelõñ ko rej katok kaki, rej katok kaki ñan jetõb ko rettoon* im jab ñan Anij, im ijjab kõn̦aan bwe kom̦win kobal̦o̦k ippãn jetõb ko rettoon.
21 Kwõjjab maroñ idaak jãn cup eo an Jeova* im bareinwõt jãn cup eo an jetõb ko rettoon, im kwõjjab maroñ m̦õñã jãn “tebõl̦ eo an Jeova”* im bareinwõt jãn tebõl̦ eo an jetõb ko rettoon.
22 Ta ‘jej kajjioñ kõm̦m̦an bwe Jeova* en ebbanban ke’? Ta jekajoorl̦o̦k jãne ke?
23 Emãlim ñan kõm̦m̦ane aolep men, bõtab ejjab aolep men rem̦m̦an. Emãlim ñan kõm̦m̦ane aolep men, bõtab ejjab aolep men rej menin kõkajoor.
24 Kõj kajjojo jen wõnm̦aanl̦o̦k wõt im kõm̦m̦ani men ko renaaj bõktok tokjãn ko ñan ro jet, im jab ñan kõj make.
25 Kom̦win m̦õñã jabdewõt men rej wiakake ilo jikin wia kanniõk ko, im ejjab menin aikuj ñan kõm̦m̦an kajjitõk bwe en em̦m̦an ami bõklõkõt,
26 kõnke “an Jeova* lal̦ in im men otemjej ie.”
27 El̦aññe juon eo ejjab pãd ilo tõmak ej kũrl̦o̦k kom̦ im kom̦ kõn̦aan etal, kom̦win m̦õñã jabdewõt men ko rej likũt im̦aami, im ejjab menin aikuj ñan kõm̦m̦an kajjitõk bwe en em̦m̦an ami bõklõkõt.
28 Bõtab el̦aññe juon ej ba ñan kom̦, “Kar katok kake men in,” innem kom̦win jab m̦õñã kõn wõt armej eo im kõn wõt bõklõkõt.
29 Ijjab kõnnaan kõn bõklõkõt eo ami make, bõtab ij kõnnaan kõn bõklõkõt eo an armej eo juon. Etke in kõjerbal anemkwõj e aõ el̦aññe bõklõkõt eo an bar juon enaaj ekajete eõ?
30 El̦aññe ij kam̦m̦oolol Anij kõn men eo kijõ, ij aikuj ke wõnm̦aanl̦o̦k wõt im kañe meñe ro jet rej kõnanaik eõ kõn men eo em̦õj aõ kam̦m̦oolol Anij kake?
31 Kõn men in, ñe kom̦ij m̦õñã ak idaak ak kõm̦m̦an jabdewõt men, kom̦win kõm̦m̦an men otemjej ñan aiboojoj eo an Anij.
32 Kom̦win kõjparok bwe kom̦win jab kal̦õkatipi ri-Ju ro im ri-Grik ro im eklejia eo an Anij,
33 ãinwõt aõ kajjioñ kabuñbũruon aolep armej ilo men otemjej ij kõm̦m̦ani. Ijjab l̦õmn̦ak kõn wãween aõ bõk tokjãn, bõtab ij l̦õmn̦ak kõn wãween an elõñ naaj bõk tokjãn, bwe ren maroñ bõk lo̦mo̦o̦r.
Footnotes
^ Ak “dekã eo kar.”
^ Lale “L̦õñ” ilo Kõmel̦el̦e Ko.
^ Lale “L̦õñ” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Men in emaroñ jitõñl̦o̦k ñan enjel̦ an Anij.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
