Revelesõn 11:1-19
11 Im ke ear letok ñan ña juon kããn menin eddek ãinwõt al̦al̦ aetok,* ear ba: “Kwõn jutak im joñe tampel̦ eo an Anij, im lokatok eo im ro rej kabuñ ie.
2 Ijoke kwõn jab joñe mel̦an eo inabõjin tampel̦ eo, kõnke kar lel̦o̦ke ñan ri-aelõñ ko, im renaaj jujuuri im kapedakilkili jikin eo eokkwõjarjar* ium̦win 42 allõñ.
3 Inaaj kõm̦m̦an bwe ri-kõnnaan ro aõ ruo ren kõn̦ak nuknuk ko el̦ap ideer im kanaan ium̦win 1,260 raan.”
4 Rein rej ro im wõjke olive ko ruo im jurõn l̦aam̦ ko ruo rej kõkkar kaki, im erro ej jutak im̦aan Irooj eo an lal̦ in.
5 El̦aññe jabdewõt ekõn̦aan ko̦kkure erro, kijeek enaaj diwõjl̦o̦k jãn lo̦ñier im tile ri-kõjdat ro aer. Aet, el̦aññe jabdewõt ekõn̦aan ko̦kkure erro, enaaj mej ilo wãween in.
6 Ewõr aerro maroñ ñan kilõke lañ bwe en jab wõt ilo raan ko erro ej kanaan, im ewõr aerro maroñ ioon dãn ko ñan ukoti ñan bõtõktõk, im ñan ko̦kkure lal̦ kõn aolep kain menin kaeñtaan ekkar ñan joñan aerro kõn̦aan.
7 Im ke ej m̦õj aerro kanaan, menninmour eo eawiia ej wanlõñtak jãn abyss* eo enaaj tarin̦aeik er im anjo̦ ioer im m̦an er.
8 Im ãnbwinnier enaaj pãd ilo ial̦leplep in jikin eo el̦ap, eo ej Sodom im Ijipt ilo kõkkar, ijo kar bareinwõt m̦ane Irooj eo aer ie ilo jurõn al̦al̦.
9 Im jet jãn ibwiljin armej ro, bwij ko, kajin* ko, im aelõñ ko, renaaj kalimjek ãnbwin kein ium̦win jilu jimattan raan, im reban kõtl̦o̦k bwe ãnbwin kein ren babu ilo lõb.
10 Im ro rej jokwe ioon lal̦ rej lañlõñ im m̦õn̦õn̦õ kõnke erro mej im renaaj ajej menin lel̦o̦k ñan doon, kõnke ri-kanaan rein ruo rar kaeñtaan ro rej jokwe ioon lal̦.
11 Ãlikin jilu jimattan raan, Anij ear lel̦o̦k kajoorin* mour ñan erro, innem erro ear jutak, im ro rar lo erro rar kanooj in lõl̦ño̦ñ.
12 Im erro ear roñ juon ainikien el̦ap jãn lañ ej ba: “Komiro wanlõñtak.” Innem erro ear wanlõñl̦o̦k ñan lañ ilo juon kõdo̦, im ri-kõjdat ro aer rar lo erro.*
13 Ilo awa eo wõt, ear wal̦o̦k juon m̦akũtkũt lal̦ el̦ap, im juon m̦õttan joñoul in jikin eo ear jeepepl̦o̦k; im 7,000 armej rar mej jãn an m̦akũtkũt lal̦, im aolepen armej ro jet rar kanooj mijak im rar lel̦o̦k nõbar ñan Anij in lañ.
14 Jerata eo kein karuo emootl̦o̦k. Roñjake m̦õk! Jerata eo kein kajilu ej itok wõt ilo m̦õkaj.
15 Enjel̦ eo kein kajimjuon ear ukwi jilel eo ippãn. Innem ear wõr ainikien ko rel̦l̦ap ilañ rej ba: “Aelõñ eo an lal̦ ear oktak im Aelõñ* an ad Irooj im an eo Ear kããlõte bwe en Christ, im enaaj tõl ãinwõt juon kiiñ ñan indeeo im indeeo.”
16 Im elder ro 24 rej jijet ioon tũroon ko aer im̦aan Anij, rar buñpedo im kabuñ ñan Anij,
17 im rar ba: “Jeova* Anij, kõmij kam̦m̦oolole eok, kwe eo Ekajoor Bõtata, eo ej kiiõ im eo ej m̦okta, kõnke kwaar kwal̦o̦k kajoor eo am̦ el̦ap im jino tõl ãinwõt juon kiiñ.
18 Bõtab ri-aelõñ ko rar illu, im kwaar kwal̦o̦k am̦ illu, im ear jejjet iien eo ñan ekajete ro remej, im ñan kõjeraam̦m̦an ri-kanaan ro rej am̦ ri-karejar ekoba ro rekkwõjarjar im ro rej mijak etam̦, ro rettã im ro reutiej jim̦or, im bareinwõt ñan am̦ ko̦kkure ro rej ko̦kkure lal̦ in.”
19 Im tampel̦ eo* an Anij ilañ ear pel̦l̦o̦k im iar loe tõptõp in bujen eo ie. Im ear ejjaromrom, im ear wal̦o̦k ainikien ko, jourur, m̦akũtkũt lal̦, im ear l̦ap an wõt kõn aij.
Footnotes
^ Ak “juon al̦al̦ kein joñjoñ.”
^ Mel̦el̦ein, Jerusalem eo Ekããl.
^ Mel̦el̦ein, “juon ro̦ñ elukkuun m̦wilal̦.” Lale “Abyss” ilo Kõmel̦el̦e Ko.
^ Kajin Grik, “lo.”
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Ak “ear jab bõjrak aer reilo̦k.”
^ Ak “Kien.” Lale “Aelõñ eo an Anij” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Mel̦el̦ein, Jikin eo Eokkwõjarjar Otem Kwõjarjar ilo tampel̦ eo.
