Jerbal 14:1-28
14 Ke rar pãd Aikoniõm, rar del̦o̦ñ ilo im̦õn kabuñ eo an ri-Ju ro, im joñan an lukkuun em̦m̦an aerro kõmel̦el̦e, elõñ ri-Ju im ri-Grik rar erom rũttõmak.
2 Bõtab ri-Ju ro me rar jab tõmak rar kareel armej ro ilo jikin eo im kõm̦m̦an bwe ren jum̦aik Paul im Barnebas.
3 Kõn men in, eto aerro kar pãd ijin im kõnono ilo peran ikijjeen maroñ eo jãn Jeova,* eo ear kõmaroñ erro bwe ren kõm̦m̦an menin kabwilõñlõñ im kõkal̦l̦e ko ñan kam̦ool bwe ennaan eo rej kwal̦o̦ke ej ennaan eo kõn jouj eo an el̦ap.
4 Bõtab jarlepju in armej ro ilo jikin eo rar jepel ñan ruo kumi, jet rar errã ippãn ri-Ju ro im ro jet rar errã ippãn rijjilõk ro.
5 Ke armej in aelõñ ko im ri-Ju ro ekoba ri-tõl ro aer rar kajjioñ in kõm̦m̦ani men ko renana ñan Paul im Barnebas im kad erro,
6 kar kõnnaanek erro kõn men in, innem erro kar ko ñan jikin ko ilo Laikeonia etaer Listra im Derbe, im ñan bukwõn ko iturier.
7 Innem rar etal im kwal̦o̦k kõn ennaan eo em̦m̦an ilo jikin kein.
8 Ilo Listra, ekar wõr juon em̦m̦aan ejorrããn neen ej jijet, ear ãindein jãn ke ear l̦otak im ejjañin kar etetal.
9 Em̦m̦aan in ear roñjake an Paul kõnnaan. Paul ear reilo̦k im lukkuun lale l̦o̦k, im ke ear kile bwe l̦ein ear tõmak bwe emaroñ mour jãn nañinmej eo an,
10 ear kõl̦l̦aaj ainikien im ba: “Kwõn jutak.” Innem em̦õkaj an em̦m̦aan eo jutak im jino etetal.
11 Ke jarlepju eo ear lo men in Paul ear kõm̦m̦ane, rar kõl̦l̦aaj ainikieer im kõnnaan ilo kajin Laikeonia im ba: “Em̦õj an anij ko erom armej im wanlal̦tak ñan ippãd!”
12 Innem rar jino kũri Barnebas im ba Zeus, ak Paul rar kũri im ba Hermes, kõnke e eo ear rũkkõnono ñan erro.
13 Im bũrij eo an Zeus, me tampel̦ eo an epãd iturin jikin del̦o̦ñtok eo an jikin eo, ear ebbõktok kau kom̦aan im wũt pãlpel* ñan kõjãm ko ilo wõrwõr eo, im e kab jarlepju eo rar kõn̦aan katok ñan erro.
14 Ak ke rijjilõk Barnebas im rijjilõk Paul rar roñ men in, rar kekõl nuknuk ko aerro im ettõrl̦o̦k ñan ippãn jarlepju eo im lam̦õj im ba:
15 “Em̦m̦aan ran̦, etke kom̦ij kõm̦m̦ani men kein? Kõm bar armej ãinwõt kom̦ im ejjel̦o̦k oktak m̦õjn̦o̦ ko am jãn kom̦. Kõmij kwal̦o̦k kõn ennaan eo em̦m̦an ñan kom̦ bwe kom̦win ilo̦k jãn men kan̦e ejjel̦o̦k tokjãer im oktak ñan Anij eo emour, E eo ear kõm̦anm̦an lañ im lal̦ im lo̦jet im aolep men ko ie.
16 Ilo epepen ko m̦oktal̦o̦k, ear kõtl̦o̦k an aolep ri-aelõñ ko kõm̦m̦an ekkar ñan aer kõn̦aan.
17 Ijoke ear kwal̦o̦k kõn E make ikijjeen an kõm̦m̦ani men kein rem̦m̦an, ear lewaj wõt jãn lañ, leen keinikkan ilo iien aer kalle, im ear lewaj kijemi ekkan im koobrak bũruomi kõn lem̦õn̦õn̦õ.”
18 Meñe erro kar ba aolep men kein, ak armej ro rebaj wõt wõnm̦aanl̦o̦k im katok ñan erro.
19 Bõtab jet ri-Ju rar itok jãn Antiok im Aikoniõm im rar kareel jarlepju eo, innem rar kade Paul im ipere nabõjl̦o̦k jãn jikin eo kõn aer l̦õmn̦ak bwe emej.
20 Ke ri-kal̦oor ro rar jutak ijo im kaapool̦e, ear jerkak im bar del̦o̦ñl̦o̦k ilo jikin eo. Raan eo tok juon, erro Barnebas kar etal ñan Derbe.
21 Ãlikin aerro kwal̦o̦k kõn ennaan eo em̦m̦an ilo jikin in im jipañ elõñ armej ñan erom ri-kal̦oor, erro kar bar ro̦o̦l ñan Listra, Aikoniõm, im Antiok.
22 Innem rar kõkajoor ri-kal̦oor ro im rõjañ er bwe ren dãpij wõt aer tõmak, rar ba: “Jej aikuj jelm̦aiki* elõñ menin kaeñtaan ko bwe jen maroñ del̦o̦ñ ilo Aelõñ eo an Anij.”*
23 Bareinwõt erro kar kããlõt jet em̦m̦aan bwe ren loloodjake eklejia kein kajjojo. Innem erro kar jar im jitlo̦k im likũt er ium̦win kõjparok eo an Jeova,* eo rar tõmak ilo e.
24 Innem erro kar etal ilujen Pisidia l̦o̦k ñan Pampilia,
25 im ãlikin aer kwal̦o̦k kõn ennaan eo ilo Perga, rar wanlal̦l̦o̦k wõt ñan Attelia.
26 Im jãn ijo, rar jerakl̦o̦k ñan Antiok, ijo Anij ear kwal̦o̦k jouj eo an el̦ap ñan erro ilo an kar lel̦o̦k ñan erro jerbal eo ej kab m̦õj aerro kadedeikl̦o̦k.
27 Ke rar tõparl̦o̦k ijo, rar ko̦kweilo̦ktok aolep ro ilo eklejia eo im kwal̦o̦k kõn aolep men ko Anij ear kõjerbal erro ñan kõm̦m̦ani, im kõn an kar kõpel̦l̦o̦k ial̦ ñan ri-aelõñ ko bwe ren maroñ tõmak.
28 Innem ear to aerro pãd ippãn ri-kal̦oor rein.
Footnotes
^ Lale “Jeova” ilo Kõmel̦el̦e Ko.
^ Ak “wũtin bar.”
^ Ak “deblo̦ke.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
