Jerbal 19:1-41
19 Ke Apollõs ear pãd ilo Korint, Paul ear itoitak ibul̦õn jikin ko ilo Eijia* im ear tõkeakl̦o̦k ilo Epesõs. Ekar lo jet ri-kal̦oor ijin
2 im ear kajjitõk ippãer: “Kom̦ar ke bõk jetõb kwõjarjar* ke kom̦ar erom rũttõmak?” Rar uwaak im ba: “Kõmij jañin kar roñ kõn jetõb kwõjarjar.”*
3 Im ear ba: “Kain peptaij rot eo kar peptaiji kom̦ kake?” Rar uwaak im ba: “Peptaij eo an Jon.”
4 Im Paul ear ba: “An Jon kar peptaiji armej ro ej kõkal̦l̦en ukel̦o̦k, im ear jiroñ er bwe ren tõmak ilo armej eo enaaj itok ãlikin, armej in ej Jesus.”
5 Ke rar roñ men in, rar peptaij ilo etan Irooj Jesus.
6 Innem ke Paul ear likũt pein ioer, jetõb kwõjarjar* ear itok ioer im rar jino kõnnaan ilo kajin ko jet im jino kanaan.
7 Oraer aolep ej 12 em̦m̦aan.
8 Ium̦win jilu allõñ, Paul ear etal ñan im̦õn kabuñ eo im ear kõnnaan ñan armej ro ilo peran im kwal̦o̦k katak ko im kajjioñ kõmel̦el̦eik er kõn Aelõñ eo an Anij* ñan kareel er.
9 Bõtab ke jet rar kapen wõt bũrueer im m̦akoko in tõmak im kwal̦o̦k naan ko renana im̦aan mejãn jarlepju eo kõn Ial̦ Eo, Paul ear etal jãn er im ear bõk ri-kal̦oor ro ippãn, im kajjojo raan ear kõm̦m̦an katak ilo im̦õn jikuul̦ eo an Turannõs.
10 Ear kõm̦m̦ane men in ium̦win ruo iiõ. Kõn men in, aolep armej ro rej jokwe ilo jikin ko ilo Eijia rar roñ ennaan eo kõn Irooj, ri-Ju im ri-Grik jim̦or.
11 Im ear jab bõjrak an Anij kwal̦o̦k menin kabwilõñlõñ ko rel̦l̦ap ilo an kar kõjerbal Paul,
12 joñan armej ro rar bõk añkijep ko im m̦õttan ko me rar uñũr ãnbwinnin, im rar bõkl̦o̦ki ñan ippãn ro renañinmej, im ear jako aer nañinmej im jetõb ko rettoon rar diwõjl̦o̦k jãn er.
13 Bõtab jet iaan ri-Ju ro me rar itoitak im kadiwõjl̦o̦k jetõb ko rettoon rar bar kajjioñ kõjerbal etan Irooj Jesus ñan armej ro ewõr jetõb ettoon ippãer. Rekõn ba: “Ij jiroñ eok ilo etan Jesus, eo Paul ej kwal̦o̦k kake, bwe kwõn diwõjl̦o̦k.”
14 Ekar wõr jimjuon em̦m̦aan nejin juon bũrij eutiej an ri-Ju ro etan Siva im rar kõm̦m̦ane men in.
15 Bõtab juon jetõb ettoon ear ba ñan er: “Ijel̦ã kajjien Jesus im ibar jel̦ã kajjien Paul, ak wõn kom̦?”
16 Innem em̦m̦aan eo me jetõb ettoon eo epãd ippãn ear ettõrl̦o̦k ñan ippãer im ire ippãer kajjojo, im ear kajoor jãn er. Kõn men in, rar ko jãn m̦weo ak rekeelwaan* im rekinejnej.
17 Ennaan eo kõn men in ear ajeededl̦o̦k ñan aolep armej, ñan ri-Ju im ri-Grik ro rej jokwe ilo Epesõs. Innem er aolep rar mijak im etan Irooj Jesus ear buñbuñl̦o̦k wõt.
18 Elõñ iaan ro rar erom rũttõmak rar itok im kwal̦o̦k im̦aan mejãn aolep kõn jerawiwi ko aer im kõm̦m̦an ko aer.
19 Innem elõñ iaan ro rekõn anijnij rar bõktok bokin anijnij ko aer im tũli im̦aan mejãn aolep. Im ke rar kobaiki joñan aorõkin aolepen bok ko, rar lo bwe on̦ãer aolep ej tarrin 50,000 m̦õttan jããn jelba.
20 Ãindein, naan eo an Jeova* ear ajeededl̦o̦k wõt im kajoorl̦o̦k wõt.
21 Ãlikin an kar men kein wal̦o̦k, Paul ear jek ilo bũruon* bwe ñe em̦õj an etal ilujenl̦o̦k Masedonia im Akeia, enaaj etal ñan Jerusalem. Ear ba: “Ñe em̦õj aõ etal ñan ijen̦, ij aikuj bar etal ñan Rom.”
22 Innem ear jilkinl̦o̦k Timote im Erastõs, ruo iaan rijjipañ ro an, ñan Masedonia, ak ear pãdwõt im jol̦o̦k jidik iien ilo jikin ko ilo Eijia.
23 Ilo tõre in, ekar wal̦o̦k juon poktak el̦ap ikijjeen ro uwaan Ial̦ Eo.
24 Ear wõr juon em̦m̦aan etan Demitriõs, juon eo ej kõm̦m̦an tampel̦ jiddik an Artemis jãn jelba, im jerbal eo an l̦ein ekõn bõktok el̦ap tõprak ñan ri-jerbal ro jet m̦õttan.
25 Ear ko̦kweilo̦ktok er im ro jet rej bar jerbal rot in, im ear ba: “Em̦m̦aan ran̦, kom̦ kanooj in jel̦ã bwe el̦ap an jerbal in ad bõktok jeraam̦m̦an ñan kõj.
26 Kom̦ar loe im roñ kõn an kar Paul kareel elõñ armej im ukot l̦õmn̦ak ko aer ilo an ba bwe anij ko kõm̦m̦anin pein armej rejjab lukkuun anij. Ear jab baj kõm̦m̦ane wõt men in ilo Epesõs ak ear bar kõm̦m̦ane ilo enañin aolep jikin ko ilo Eijia.
27 Innem ikkõl ñe armej renaaj jino kõnanaiki jerbal in ad, im ejjab men in wõt, ak renaaj kajejtokjãn tampel̦ eo an Artemis, anij* eo ad el̦ap. Bareinwõt, anij in me armej ro ilo aolep jikin ko ilo Eijia im ilo lal̦ in rej kabuñ ñane enaaj oktak im jako an utiej im aiboojoj.”
28 Ke em̦m̦aan ro rar roñ men in, rar kanooj illu im rar jino lam̦õj im ba: “Eutiej Artemis, anij eo an ri-Epesõs!”
29 Innem armej in jikin eo rar lukkuun pok, im rar aolep ettõrl̦o̦k ñan ilowaan im̦õn iukkure eo ak rej iperl̦o̦ke Geiõs im Aristarkõs ippãerl̦o̦k. L̦õm̦arein rej ri-Masedonia im rej ri-itoitak ro m̦õttan Paul.
30 Ilo m̦ool, Paul ear kõn̦aan del̦o̦ñl̦o̦k ñan ippãn armej ro, bõtab ri-kal̦oor ro rar jab kõtl̦o̦ke.
31 Bareinwõt, jet iaan ri-utiej ro me rar jouj ñan Paul im rej bõk eddon kwõjkwõj ko im iien iukkure ko rar ijjilõkl̦o̦k ennaan ñane im akwel̦ap bwe en jab likũt mour eo an ilo kauwõtata ilo an del̦o̦ñl̦o̦k ilo im̦õn iukkure eo.
32 Jet iaan armej ro rar lam̦õj im kwal̦o̦k jet mel̦el̦e im ro jet rar bar lam̦õj kõn jet mel̦el̦e reoktakl̦o̦k, unin ej kõnke jarlepju in armej ro rar pok im enañin aolepeer rar jaje unin aer kar kobatok ippãn doon.
33 Innem rar bõktok Alexander jãn ibwiljin jarlepju eo kõn an ri-Ju ro iuunil̦o̦k ñan im̦aan, im Alexander ear kõkal̦l̦el̦o̦k* kõn pein ñan armej ro bwe ren bõjrak aer kõnnaan kõnke ear kõn̦aan kõmel̦el̦eik er.
34 Bõtab ke armej ro rar kile bwe l̦ein ej juon ri-Ju, rar aolep lam̦õj ippãn doon ium̦win enañin ruo awa im ba: “Eutiej Artemis, anij eo an ri-Epesõs!”
35 Ãliktata, ri-jeje eo an jikin eo ear kõm̦m̦an bwe armej ro ren ikõñ, innem ear ba: “Em̦m̦aan in Epesõs ran̦, ewõr ke armej en̦ ejjab jel̦ã ke jikin in an ri-Epesõs ej lale tampel̦ eo an anij l̦apl̦ap Artemis im ekjab eo ear wõtlo̦k jãn lañ?
36 Ejjel̦o̦k juon emaroñ kariab men in. Kõn men in, kom̦win aenõm̦m̦an im jab m̦õkaj in kõm̦m̦ane jabdewõt men.
37 Kom̦ar bõktok em̦m̦aan rein ñan ijin ak rejjab ko̦o̦t jãn tampel̦ ko im rejjab kõnono n̦ae anij in ad.
38 Kõn men in, el̦aññe ewõr an Demitriõs im ri-jerbal ro m̦õttan abn̦õn̦õ n̦ae jabdewõt, eokwe ewõr raanin ekajet im ewõr kom̦ja, ren bõkl̦o̦k abn̦õn̦õ kein aer ñan ijen̦.
39 Bõtab el̦aññe ebar wõr ami abn̦õn̦õ ijello̦kun men in, eokwe jej aikuj in pepe kake ilo juon iien kweilo̦k ekkar ñan kien.
40 Elukkuun kauwõtata men eo ear wal̦o̦k rainin kõnke remaroñ l̦õmn̦ak bwe jej jum̦ae kien, kab ke ejjel̦o̦k pedpedin ad kar kõm̦m̦an iruj.”
41 Ãlikin an kar ba men in, ear karo̦o̦l armej ro.
Footnotes
^ Lale “Eijia” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Naan eo ilo kajin Grik emaroñ mel̦el̦ein ñe juon ej lowa wõt, ejjab mel̦el̦ein bwe ejjel̦o̦k aer nuknuk.
^ Lale “Jeova” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Anij in ej juon kõrã.
^ Ak “jeknõl̦l̦o̦k.”
