Jerbal 21:1-40
21 Innem kõmar etal jãn er im jerak jãn ijo meñe ear kanooj eddo bũruem, im kõmar kajjul̦o̦k ñan Kos, im raan eo juon kõmar tõparl̦o̦k Rodes, im jãn ijo kõmar etal wõt ñan Petera.
2 Ke kõmar lo juon wa ej pojakin jerakl̦o̦k ñan Pinisia, kõmar uwe ie im jerak jãn ijo.
3 Kõmar loe ãneo etan Saiprõs jãn ijo ituanmiiñin wa eo, ijoke kõmar el̦l̦ãl̦o̦k wõt jãne ñan Siria im pol̦o̦k ilo Tair, ijo wa eo ear eakto m̦weiuk ie.
4 Innem kõmar pukote ri-kal̦oor ro im lo er, im kõmar pãd ijo ium̦win jimjuon raan. Bõtab kõn an kar jetõb kwõjarjar* kwal̦o̦k ta eo enaaj wal̦o̦k, ri-kal̦oor ro rar kajjioñ ukot an Paul l̦õmn̦ak bwe en jab etal ñan Jerusalem.
5 Im ke ear jem̦l̦o̦k iien am pãd ijo, kõmar jino etal ilo ial̦ eo am l̦o̦k. Bõtab er aolep, ekoba kõrã ro im ajri ro, rar itok ippemtok m̦ae iien kõmar tõpar nabõjin jikin eo. Innem kõmar bukwelõlõ ilo parijet im jar,
6 im kõmar yokyokwe doon. Ãlikin, kõmar uwel̦o̦k ioon wa eo im rar jepl̦aak ñan m̦õko im̦weer.
7 Kõmar jerak jãn Tair im pol̦o̦k Ptolmeis, innem kõmar yokyokwe rũttõmak ro ijo im pãd ippãer ium̦win juon raan.
8 Raan eo tok juon, kõmar em̦m̦akũt jãn ijin im etal ñan Seseria, im kõmar etal ñan m̦weo im̦õn Pilip ri-kwal̦o̦k naan eo, im kõmar jokwe ippãn. L̦ein ej juon iaan em̦m̦aan ro jimjuon,
9 im ewõr emãn nejin jiroñ rejjañin m̦are,* im rej kwal̦o̦k kanaan ko.
10 Ãlikin ammim kar pãd ijo ium̦win elõñ raan, juon ri-kanaan etan Agebõs ear itok jãn Judia.
11 Im ear itok ñan ippem im bõk kañũr eo an Paul im lukwõje neen im pein make kake im ba: “Eñin men eo jetõb kwõjarjar* ej ba, ‘Ri-Ju ro ilo Jerusalem renaaj lukwõje em̦m̦aan eo an kañũr in ilo ejja wãween in wõt, im renaaj lel̦o̦ke ñan ium̦win pein ri-aelõñ ko.’”
12 Ke kõmar roñ men in, kõm kab armej ro ijo kõmar jim̦or akwel̦ap ñan Paul bwe en jab wanlõñl̦o̦k ñan Jerusalem.
13 Ak Paul ear ba: “Etke kom̦ij jañ im kajjioñ kõm̦m̦an bwe in m̦õjn̦o̦l̦o̦k?* Ij ba ñan kom̦ bwe ijjab baj pojak wõt ñan kalbuuj, ak ibar pojakin mej ilo Jerusalem kõn wõt etan Irooj Jesus.”
14 Ke ear jab ukot an l̦õmn̦ak, kõmar jab bar akwel̦ap,* ak kõmar ba: “Ankilaan Jeova* en wal̦o̦k.”
15 Jet raan tokãlik, kõmar kõppojak ñan am etal, innem kõmar jino jibadekl̦o̦k Jerusalem.
16 Jet iaan ri-kal̦oor ro jãn Seseria rar itok ippemtok im bõkl̦o̦k kõm ñan ippãn Mnesõn bwe kõmin pãd ilo m̦weo im̦õn ãinwõt ri-lol̦o̦k ro an. Em̦m̦aan in ej jãn Saiprõs im ej juon iaan ri-kal̦oor ro jãn kar m̦okta.
17 Ke kõmar tõparl̦o̦k Jerusalem, rũttõmak ro rar lukkuun karwaineneik kõm.
18 Bõtab raan eo tok juon, Paul ear itok ippemtok ñan ippãn Jemes, im aolep em̦m̦aan ro rej lale eklejia rar bar pãd ijo.
19 Innem ear yokyokwe er im jino tipdikil̦o̦k aolep men ko Anij ear kõm̦m̦ani ibwiljin ri-aelõñ ko ilo an kar kõjerbal e.
20 Ke rar roñ men in, rar jino aer nõbar Anij, bõtab rar ba ñane: “Jeim im jatim Paul, kwõjel̦ã bwe elõñ to̦ujin ri-Ju ro rar erom rũttõmak, im aolepeer el̦ap aer kijejeto ilo Kien eo.
21 Bõtab rar roñ an armej ba bwe kwõj katakin aolep ri-Ju ro ibwiljin ri-aelõñ ko bwe ren jum̦aiki Kien Moses, kwõj ba ñan er bwe ajri ro nejier ren jab m̦wijm̦wij ak l̦oore m̦anit ko jet.
22 Jenaaj et kiiõ? Ejjel̦o̦k pere ke renaaj roñ bwe em̦õj am̦ moottok.
23 Kwõn kõm̦m̦ane men in kõmij ba ñan kwe: Ewõr emãn em̦m̦aan ijin em̦õj aer kõm̦m̦ane juon aer kallim̦ur.
24 Kwõn bõk em̦m̦aan rein ippam̦ im kom̦win karreoik kom̦ ekkar ñan m̦antin kabuñ, im kwõn bõk eddon aikuj ko aer, bwe ren m̦wijbar. Ilo wãween in, aolep renaaj jel̦ã bwe ejjab m̦ool naan ko rar roñ kaki kõn kwe, im bwe kwõj juon eo ej etetal ilo jim̦we im ej l̦oore Kien eo.
25 Ak ikijjeen rũttõmak ro jãn aelõñ ko jet, jaar jejel̦o̦k kõn pepe eo jaar kõm̦m̦ane ñan kwal̦o̦k ñan er bwe rej aikuj kõjparok er jãn men ko em̦õj katok kaki ñan ekjab ko, jãn bõtõktõk, jãn menninmour ko em̦õj lukwõj bũrueer,* im jãn l̦õñ.”*
26 Raan eo tok juon, Paul ear ãñin em̦m̦aan ro im ereañ aolep rar karreoik er ekkar ñan Kien Moses. Innem ear ilo̦k ñan tampel̦ eo ñan kwal̦o̦k ñããt eo enaaj jem̦l̦o̦k raanin aer karreoik er ekkar ñan Kien Moses bwe kajjojo iaaer en ajel̦o̦k menin katok ko aer.
27 Innem ke ear pojakin jem̦l̦o̦k raan ko jimjuon, ri-Ju ro jãn Eijia* rar lo Paul ilo tampel̦ eo im rar kairuj aolep armej ro, innem rar jibwe
28 im lam̦õj im ba: “Em̦m̦aan in Israel ran̦, kom̦win jipañ! L̦eo in ej katakin aolep armej ilo jikin otemjej bwe ren jum̦aik armej ro ad im Kien* eo ad im jikin in ad. Ejjab men in wõt ak em̦õj an ebbõktok ri-Grik ñan lowaan tampel̦ in im kattoone jikin in eokkwõjarjar.”
29 Rar ba men in kõnke m̦oktal̦o̦k rar loe ri-Epesõs eo Tropimõs ilo Jerusalem ippãn Paul, im rar l̦õmn̦ak bwe Paul ear bõktoke ñan tampel̦ eo.
30 Innem aolep armej in jikin eo rar iruj im rar ettõrl̦o̦k ñan ippãn Paul im ipere ñan nabõjin tampel̦ eo, im kar kajju kiil kõjãm ko.
31 Ke rar kajjioñ in m̦ane ñan mej, ri-tõlin jarin tarin̦ae eo ear roñ bwe epoktak aolepen Jerusalem.
32 Kõn men in, ear kajju ebbõk rũttarin̦ae im bõk kapen ro aer im ettõrl̦o̦k ñan ijo ippãer. Ke armej ro rar lo ri-tõlin jarin tarin̦ae eo im rũttarin̦ae ro, ear bõjrak aer m̦an Paul.
33 Innem ri-tõl eo an jarin tarin̦ae eo ear itok ñan ippãer im bõke Paul bwe en kalbuuji im ear ba ren lukwõje kõn ruo jeen, im ear kajjitõk wõn e im ta eo ear kõm̦m̦ane.
34 Bõtab jet iaan armej ro rar lam̦õj im kwal̦o̦k juon mel̦el̦e, ak ro jet rebar ba juon men. Kõn an l̦ap poktak eo, ri-tõl eo ejaje ta lukkuun apañ eo, innem ear ba bwe ren bõkl̦o̦k Paul ñan ijo jikin rũttarin̦ae ro.
35 Bõtab ke Paul ear tõparl̦o̦k jikinuwe eo, rũttarin̦ae ro rar aikuj kotake kõn an armej ro itõn m̦ane,
36 kõnke jarlepju eo el̦akkar l̦oore er im lam̦õj im ba: “M̦an l̦õn̦e!”
37 Ke rar bõkl̦o̦ke ñan ijo jikin rũttarin̦ae ro, Paul ear ba ñan ri-tõlin jarin tarin̦ae eo: “Emãlim ke ñan aõ kõnono ippam̦?” Ri-tõl eo ear ba: “Kwõjel̦ã ke kajin Grik?
38 Ta ejjab kwe ri-Ijipt eo ear kairuj armej bwe ren jum̦ae kien jejjo iien ko remootl̦o̦k im tõl 4,000 ri-kowadoñ* ñan ãne jem̦aden ke?”
39 Ak Paul ear ba: “Ilo m̦ool, ña ij juon ri-Ju jãn Tarsus ilo Silisia, im ijo ij itok jãne ejjab juon jikin bajjek. Kõn men in, ij akwel̦ap ñan eok bwe kwõn kõtl̦o̦k aõ kõnnaan ñan armej ran̦.”
40 Innem ãlikin an kamãlimi, Paul ear jutak ilo jikinuwe eo im ear kõkal̦l̦e* kõn pein ñan armej ro. Ke ear bõjrak aer keroro, ear kõnnaanl̦o̦k ñan er ilo kajin Hibru im ba:
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Kajin Grik, “bõjin.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kam̦õjn̦o̦ikl̦o̦k bũruõ.”
^ Kajin Grik, “kõmar ikõñ.”
^ Lale “Jeova” ilo Kõmel̦el̦e Ko.
^ Ak “em̦õj m̦ani bõtab rar jab kato̦o̦rl̦o̦k bõtõktõkier.”
^ Naan eo ilo kajin Grik ej por·nei′a. Lale “L̦õñ” ilo Kõmel̦el̦e Ko.
^ Lale “Eijia” ilo Kõmel̦el̦e Ko.
^ Ej jitõñl̦o̦k ñan Kien Moses.
^ Ak “em̦m̦aan ro rej le bakbõk.”
^ Ak “jeknõl̦.”
