Jerbal 5:1-42
5 Bõtab juon em̦m̦aan etan Anenaiõs im lio pãleen etan Sappaira, rar wiakake bwidej eo aer.
2 Ak l̦ein ear n̦ooje jet iaan tõprak ko im ear bõkl̦o̦k bween jããn ko ñan ippãn rijjilõk ro, im lio pãleen ear jel̦ã kõn men in.
3 Bõtab Piter ear ba ñane: “Anenaiõs, etke Setan ear kaperan eok bwe kwõn riab n̦ae jetõb kwõjarjar* im n̦ooje jet iaan tõprak ko kwaar loi jãn kar bwidej eo?
4 Toon wõt an kar bwidej eo pãd ippam̦, kar baj am̦ wõt, ejjab ke? Im ãlikin am̦ kar wiakake, tõprak eo kar am̦ wõt, ejjab ke? Innem etke kwaar peek ilo bũruom̦ ñan kõm̦m̦an jerbal rot in? Kwaar riab ñan Anij, im jab ñan armej.”
5 Ke Anenaiõs ear roñ naan kein, ear okjak im mej, im aolep armej ro rar roñ kõn men in rar kanooj mijak.
6 Innem likao ro rar jutak im kũtimi kõn m̦õttan nuknuk, im kotake nabõjl̦o̦k im kalibwini.
7 Enañin 3 awa tokãlik, lio pãleen ear del̦o̦ñtok ak ejaje kõn men eo ear wal̦o̦k.
8 Innem Piter ear kajjitõk ippãn: “Kwõn ba ñan ña m̦õk, aolepen tõprak eo in jãn amiro kar wiakake bwidej eo ke?” Ear uwaak im ba: “Aet, aolepen n̦e.”
9 Im Piter ear ba ñane: “Etke komiro kar pepe ñan mãlejjoñe jetõb kwõjarjar* eo an Jeova?* L̦õm̦aro rar kalibwin l̦eo pãleem̦ rej pojakin del̦o̦ñtok ilo kõjãm n̦e im renaaj kotak nabõjl̦o̦k eok.”
10 Innem lio ear kajju okjak n̦a iturin neen Piter im mej. Ke likao ro rar del̦o̦ñtok, rar loe bwe emej, im rar kotake nabõjl̦o̦k im kalibwini iturin l̦eo pãleen.
11 Kõn men in, aolep ro ilo eklejia eo im ro jet me rar roñ kõn men kein rar kanooj mijak.
12 Innem rijjilõk ro rar wõnm̦aanl̦o̦k wõt im kõm̦m̦an elõñ menin kabwilõñlõñ im kõkal̦l̦e ko ibwiljin armej ro, im rekõn aolep kweilo̦k ippãn doon ilo Ettõñaak eo an Solomon.
13 M̦ool bwe ro jet rar jab peran in kobal̦o̦k ippãer, bõtab ear l̦ap an armej ro nõbar ri-kal̦oor ro.
14 Ejjab men in wõt, ak ear lõñl̦o̦k wõt oran ro rar tõmak ilo Irooj, kõrã im em̦m̦aan jim̦or.
15 Armej ro rar bõktok ri-nañinmej ro ñan ial̦leplep ko im kõbabuuki er ioon men ko kinier, kõnke rar kõjatdikdik bwe ñe Piter enaaj etal ijo l̦o̦k, annañin emaroñ jejjetel̦o̦k er bwe ren mour.
16 Bareinwõt, ear jab jem̦l̦o̦k an jarlepju in armej ro jãn jikin ko ipel̦aakin Jerusalem bõktok ri-nañinmej ro im ro jetõb ko rettoon* rar mo̦k n̦a ippãer, im er aolep rar mour.
17 Kõn men in, bũrij l̦apl̦ap eo im aolep ro rej rejetake me rej uwaan Saddusi ro, rar jutak kõn an l̦ap aer ebbanban,
18 im rar jibwe rijjilõk ro im kalbuuji er.
19 Bõtab ilo boñõn eo, enjel̦ eo an Jeova* ear kõpel̦l̦o̦k kõjãm ko ilo jikin kalbuuj eo, im ear kadiwõj er im ba:
20 “Kom̦win etal ñan tampel̦ en̦ im wõnm̦aanl̦o̦k wõt im kwal̦o̦k ñan armej ro kõn ennaan eo kõn mour eo ej itok.”
21 Ãlikin aer roñ men in, rar del̦o̦ñel̦o̦k tampel̦ eo ke ej joraantak im jino katakin armej ro.
Ilo tõre in, bũrij l̦apl̦ap eo im armej ro ippãn rar kũrtok ro uwaan Im̦õn Ekajet eo El̦ap an ri-Ju* im aolep ri-tõl ro an ri-Israel ro, innem rar ijjilõkl̦o̦k ñan jikin kalbuuj eo bwe ren bõktok rijjilõk ro ñan ippãer.
22 Ak ke ri-waj ro rar tõparl̦o̦k im̦õn kalbuuj eo, rar jab lo er. Kõn men in, rar ro̦o̦l im ba ñan er:
23 “Im̦õn kalbuuj en̦ elukkuun l̦ak im ri-waj ran̦ rej jutak inabõjin kõjãm kan̦, ak ke kõmar kõpel̦l̦o̦ke ejjel̦o̦k armej ilowaan.”
24 Ke eo ej bõk eddon tampel̦ eo im bũrij ro reutiej rar roñ men kein, rar l̦o̦kjenaer kõn aer jaje ta eo enaaj wal̦o̦k.
25 Bõtab juon armej ear itok im ba ñan er: “L̦õm̦aro kom̦ar kalbuuji er repãd ilo tampel̦ en̦, rej jutak im katakin armej ie.”
26 Innem eo ej bõk eddon tampel̦ eo ear añin ri-waj ro an bwe ren bõktok rijjilõk ro, bõtab rar jab lãj ñan er kõn aer mijak ñe armej ro rõkade er.
27 Rar bõktok er im kajutak er im̦aan ro uwaan Im̦õn Ekajet eo El̦ap an ri-Ju, im bũrij l̦apl̦ap eo
28 ear ba ñan er: “Kõmar lukkuun jiroñ kom̦ bwe kom̦win jab bar katakin armej ro kõn ãt in, ak lale m̦õk, em̦õj ami koobrak aolepen Jerusalem kõn katak ko ami, im kom̦ij kate kom̦ ñan n̦aruem kõn bõtõktõkin em̦m̦aan in.”
29 Innem Piter im rijjilõk ro jet rar uwaak im ba: “Kõmij aikuj pokake Anij* im jab armej.
30 Anij eo an ro jim̦m̦aad ear kõjerkak Jesus, eo kom̦ar m̦ane im totoiki ilo jurõn al̦al̦.*
31 Anij ear kautieje n̦a ituanbwijmaroñin pein bwe en ri-Tõl eo El̦ap im ri-Lo̦mo̦o̦r, bwe ri-Israel ren maroñ ukel̦o̦k im Anij en jol̦o̦k aer bõd.
32 Kõmij ri-kam̦ool kõn men kein, kõm im jetõb kwõjarjar,* eo Anij ej lel̦o̦ke ñan ro rej pokake e.”*
33 Ke rar roñ men kein, rar lukkuun illu im rar kõn̦aan m̦an rijjilõk ro.
34 Bõtab juon Parisi* etan Gameliel ear jutaktok jãn ibwiljin ro uwaan Im̦õn Ekajet eo El̦ap an ri-Ju im ba bwe ren kadiwõj rijjilõk ro ium̦win jidik iien. L̦ein ear juon ri-kaki in Kien eo im el̦ap an aolep armej ro kautieje.
35 Ear ba ñan er: “Em̦m̦aan in Israel ran̦, kom̦win kanooj in l̦õmn̦ak m̦okta jãn ami kõm̦m̦ane jabdewõt men ñan l̦õm̦arein.
36 Ñan waanjoñak, ilo iien ko remootl̦o̦k, ekar wõr juon em̦m̦aan etan Tudas im ear make ba bwe e juon ri-utiej, im enañin 400 em̦m̦aan rar kobal̦o̦k ippãn. Bõtab jet armej rar m̦an l̦ein, im aolep ro rar l̦oore rar ejjeplõklõk im jako.
37 Ãlikin l̦ein, ilo kar iien bõnbõn eo, ekar bar wõr juon em̦m̦aan jãn Galili etan Judas, im ear kareel elõñ armej bwe ren l̦oore. L̦ein ebar jako, im aolep ro rar l̦oore rar ejjeplõklõk.
38 Kõn wõt wãween kein, ij jiroñ kom̦ bwe kom̦win jab kõm̦m̦an jabdewõt ñan l̦õm̦arein, bõtab kom̦win karõl̦o̦k er, kõnke ñe karõk in ak jerbal in ej jãn armej, innem enaaj jako.
39 Bõtab el̦aññe ej jãn Anij, kom̦ ban anjo̦ ioer. Ejjab men in wõt, ak bõlen kom̦ naaj oktak im jum̦aik Anij.”
40 Kõn men in, rar roñjake men ko ear ba im rar kadel̦o̦ñtok rijjilõk ro im deñl̦o̦k* er, innem rar jiroñ er bwe ren bõjrak jãn aer kõnono ilo etan Jesus, im rar karõl̦o̦k er.
41 Innem rar diwõjl̦o̦k jãn ippãn ro uwaan Im̦õn Ekajet eo El̦ap an ri-Ju, bõtab rar m̦õn̦õn̦õ kõnke rar bõk jeraam̦m̦an eo ñan eñtaan kõn ãt eo etan Jesus.
42 Im raan otemjej rar wõnm̦aanl̦o̦k wõt im jab ebbeer ilo aer katakin im kwal̦o̦k kõn ennaan eo em̦m̦an kõn Christ, Jesus, ilo tampel̦ eo im jãn em̦ ñan em̦.
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Ilo kajin Grik, men in ej jitõñl̦o̦k ñan enjel̦ ro renana.
^ Lale “Jeova” ilo Kõmel̦el̦e Ko.
^ Kajin Grik, “Sanhedrin.”
^ Ak “pokake Anij ãinwõt juon ri-tõl.”
^ Ak “wõjke.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Mel̦el̦ein, pokake e ãinwõt juon ri-tõl.
^ Lale “Parisi” ilo Kõmel̦el̦e Ko.
^ Ak “m̦an.”
