KATAK 3
M̦ool Ke bwe Ennaan eo Em̦m̦an ilo Baibõl̦ eo Ej jãn Anij?
1. An wõn naan ko ilo Baibõl̦ eo?
Baibõl̦ eo ej kwal̦o̦k juon ennaan em̦m̦an bwe armej ro renaaj mour indeeo ijin ioon lal̦. (Jabõn Kõnnaan 2:21) Ewõr 66 bok ko ilo Baibõl̦ eo. Anij ear kõjerbal enañin 40 em̦m̦aan ro retiljek ñan je bok kein. Moses ear je bok ko l̦alem m̦oktata ilo Baibõl̦ eo enañin 3,500 iiõ ko remootl̦o̦k. Rijjelõk Jon ear je bok eo ãliktata ilo Baibõl̦ eo elõñl̦o̦k jãn 1,900 iiõ ko remootl̦o̦k. An wõn l̦õmn̦ak ko kar je ilo Baibõl̦ eo? Anij ear kõjerbal kajoor eo an ñan kwal̦o̦k l̦õmn̦ak ko an ñan ri jeje Baibõl̦ ro. (2 Samuel 23:2) Em̦m̦aan rein rar je l̦õmn̦ak ko an Anij im jab l̦õmn̦ak ko aer make. Kõn men in, naan ko ilo Baibõl̦ eo rej jãn Anij.—Riit 2 Timote 3:16; 2 Piter 1:20, 21.
2. Etke jejel̦ã bwe aolep naan ko ilo Baibõl̦ eo rej jãn Anij?
Jejel̦ã bwe Baibõl̦ eo ej jãn Anij kõnke elukkuun jim̦we im jejjet wãween an kwal̦o̦k kanaan ko. Ejjel̦o̦k armej remaroñ kõm̦m̦ane men in. (Joshua 23:14, UBS) Anij wõt emaroñ jel̦ã kõn ta ko renaaj wal̦o̦k ñan armej ro ilo raan ko rej pãd im̦aan.—Riit Aiseia 42:9; 46:10.
Baibõl̦ eo eoktak jãn jabdewõt kain bok kõnke ej jãn Anij. Elõñl̦o̦k jãn 2 bilien Baibõl̦ ko ilo elõñl̦o̦k jãn 450 kajin ko. Meñe Baibõl̦ eo ej juon bok in etto im ejjab juon bok in jikuul̦, bõtab aolep mel̦el̦e ko ie kõn menin kõm̦anm̦an ko an Anij ãinwõt lal̦ in relukkuun jejjet im jim̦we. Bareinwõt, men ko ri jeje ro 40 rar jei rar jab idaptõk ippãn doon. Kobal̦o̦k ippãn men in, aolep mel̦el̦e ko ilo Baibõl̦ eo rej kam̦ool bwe Anij ej yokwe armej ro. Baibõl̦ eo emaroñ bar jipañ armej ro bwe ren kõm̦m̦an oktak ko bwe wãween mour ko aer en em̦m̦anl̦o̦k. Aolep kein kam̦ool kein rej jipañ elõñ milien armej ro ñan aer jel̦ã im tõmak bwe Baibõl̦ eo ej jãn Anij.—Riit 1 Tessalonika 2:13.
3. Ta ennaan ko rej pãd ilo Baibõl̦ eo?
Jãn kar jinoin, Anij ear kõn̦aan bwe armej ro ren mour ñan indeeo ilo lal̦ in. Eñin ej ennaan eo el̦aptata ilo Baibõl̦ eo. Baibõl̦ eo ej kõmmel̦el̦e kõn wãween an kar armej ro m̦oktata jerwaane jeraam̦m̦an eo ñan mour indeeo ilo juon pedetaij ijin ioon lal̦. Ej bareinwõt kõmmel̦el̦e kõn wãween lal̦ in enaaj jepl̦aak ñan m̦okta im erom juon pedetaij.—Riit Revelesõn 21:4, 5.
Ewõr kien ko, naan in kakapilõk ko im naan in rõjañ ko ilo Baibõl̦ eo. Bareinwõt, Baibõl̦ eo ej kwal̦o̦k kõn wãween an kar Anij kõm̦m̦an ñan armej ro ilo iien ko etto. Bwebwenato kein rej kwal̦o̦k kõn kain Anij rot Jeova. Kõn men in, Baibõl̦ eo emaroñ jipañ eok bwe kwõn jel̦ã kajjien Anij. Ej bareinwõt kwal̦o̦k ta ko kwõj aikuj kõm̦m̦ani bwe kwõn jeran Anij.—Riit Sam 19:7, 11; Jemes 2:23; 4:8.
4. Ewi wãween kwõmaroñ mel̦el̦e kõn Baibõl̦ eo?
Bok in enaaj jipañ eok ñan mel̦el̦e kõn Baibõl̦ im ej l̦oore wãween an kar Jesus katakin armej ro. Jesus ear kõjerbal eoon ko im ear kõmel̦el̦eik armej ro “bwe ren maroñ mel̦el̦e kõn Jeje ko.”—Riit Luk 24:27, 45, UBS.
Ennaan eo em̦m̦an jãn Anij el̦apl̦o̦k an aorõk jãn jabdewõt men ilo lal̦ in. Bõtab, jet armej rejjab kõn̦aan roñjake ennaan in. Im bar jet rej illu ñe rej roñ kõn ennaan in. Bõtab, jouj im jab ebbeer. Kate wõt eok bwe kwõn jel̦ã kajjien Anij kõnke men in enaaj jipañ eok bwe kwõn maroñ mour indeeo ijin ioon lal̦.—Riit Jon 17:3.
