ENAÑIN ke kar lukkuun nana am̦ mour, im joñan kwaar kõn̦aan mej? El̦aññe aet, innem bõlen kwõmaroñ mel̦el̦e kõn eñjake eo an Adriana. Ear nañinmej kõn an l̦e jãn joñan an inepata. Bareinwõt ear bũrom̦õj im l̦õmn̦ak bwe eban em̦m̦anl̦o̦k. Nañinmej in Adriana ear bõke, ej juon nañinmej in bũrom̦õj.

L̦õmn̦ak kõn bar juon em̦m̦aan jãn Jepaan etan Kaoru, me ear lale rũtto ro jinen im jemãn me renañinmej. L̦ein ej kõmel̦el̦e im ba: “Ilo kar iien in, iar lukkuun eddodo kõn men ko rar wal̦o̦k ilo jikin jerbal eo aõ. Tokãlik iar jino dike kijõ im ear jab em̦m̦an aõ kiki in boñ. Iar jino l̦õmn̦ak bwe enãj kar em̦m̦anl̦o̦k ñe imej bwe en jako aõ eddodo kõn inepata ko aõ.”

Juon em̦m̦aan jãn Nigeria etan Ojebode, ej ba: “Aolep iien iar lukkuun bũrom̦õj, joñan ikõn jañ, im iar pukot kilen aõ bõk mour e aõ.” Ak ej juon menin kam̦m̦oolol bwe Ojebode, Kaoru, im Adriana rar jab bõk mour ko aer. Ijoke, kajjojo iiõ elõñl̦o̦k jãn jibukwi to̦ujin armej rej kõm̦m̦ane men in.

Ro me ekkã aer bõk mour ko aer ej em̦m̦aan ro. Elõñ iaan rein rar bõk mour ko aer kõnke rar jook in kajjitõk jipañ. Jesus ear ba bwe ro renañinmej rej aikuji taktõ ro. (Luk 5:31, UBS) Kõn men in, el̦aññe kwõj bõk eñjake kein, jouj im jab jook in kajjitõk jipañ. Elõñ ro me el̦ap aer eñtaan kõn an l̦ap aer bũrom̦õj rej lo bwe aer etal im taktõ el̦ap an jipañ er. Ojebode, Kaoru, im Adriana rar aolep bõk jipañ jãn taktõ ro im kiiõ em̦m̦anl̦o̦k aer mour im rejel̦ã kilen kijenmej kõn nañinmej ko aer.

Elõñ wãween ko taktõ ro remaroñ kõm̦m̦ani ñan jipañ. Jet taktõ rej lel̦o̦k uno ko, im jet taktõ rej jipañ rein ikijjeen aer bwebwenato ippãer (therapist), ak jet iien remaroñ kõjerbal aolep wãween kein ruo ñan jipañ rein. Ro me rej bõk nañinmej rot in, rej bar aikuj jipañ jãn baam̦le ko aer im ro m̦õttaer. Bõtab, eo me emaroñ jeram̦ eo em̦m̦antata ej Jeova Anij, eo im ej letok jipañ ko rel̦l̦ap jãn naan ko an ilo Baibõl̦.

Ro rej bõk nañinmej in bũrom̦õj, ekkã aer aikuj bõk kilen kõm̦adm̦õd ko me aetok kũtieer. Bareinwõt, rej aikuj katak kilen kijenmej kõn nañinmej in aer ilo aer kõm̦m̦an oktak ilo mour ko aer. El̦aññe kwõj eñtaan kõn nañinmej rot in, kwõmaroñ reim̦aanl̦o̦k kõn juon kõjatdikdik kõn juon ilju em̦m̦an ãinwõt Ojebode. Ojebode ej ba: “Ij reim̦aanl̦o̦k ñan iien eo enaaj jejjet kũtien kanaan eo ilo Aiseia 33:24 me ej kwal̦o̦k kõn juon iien me ejjel̦o̦k enaaj bar ba, ‘Inañinmej.’” Ãinwõt Ojebode, kwõmaroñ bok kaenõm̦m̦an jãn kallim̦ur eo an Anij kõn juon “lal̦ ekããl,” ijo me enaaj ejjel̦o̦k bar “eñtaan” ie. (Revelesõn 21:1, 4) Kallim̦ur in ej kitibuj an Anij naaj bar jol̦o̦k ad eñtaan kõn bũrom̦õj im inepata. Kwoban bar bõk eñjake kein me rej kõm̦m̦an am̦ eñtaan. Enãj wõr juon iien kwoban bar “keememeji men ko rar wal̦o̦k ilo iien ko rej mootl̦o̦k.”​—Aiseia 65:17, UBS.