Ke Anij ear kõm̦anm̦an armej, ear kõn̦aan bwe ren mour ñan indeeo ijin ioon lal̦. Innem, ejjel̦o̦k armej en kar nañinmej im mej. Bõtab, armej eo m̦oktata, Adam, ear jab pokake Ri Kõm̦anm̦an eo im ear luuji jeraam̦m̦an eo ñan mour indeeo. Innem, kõnke jej itok jãn Adam, jej bar mej. (Rom 5:8, UBS, 12; 6:23) Anij eo em̦ool, Jeova, ear jilkintok Nejin, Jijej, bwe en mej kõn kõj im kõjepl̦aaktok jeraam̦m̦an eo me Adam ear luuji.​—Riit Jon 3:16, UBS.

Mej eo an Jijej ear jeorl̦o̦k jerawiwi ko ad im kõm̦m̦an bwe jen maroñ bõk mour indeeo. Baibõl̦ ej jipañ kõj ñan jel̦ã kõn wãween naaj mour ijin ioon lal̦ ñe enaaj jako ad eñtaan kõn ad rũttol̦o̦k, nañinmej, im mej.​—Riit Aiseia 25:8, UBS; 33:24; Revelesõn 21:4, 5.

Ilo jo̦teen eo m̦okta jãn an Jijej kar mej, ear jiroñ rũkal̦oor ro an ñan keememej raan in mej eo an. Im ear kwal̦o̦k kilen aer kõm̦m̦ane men in ilo an kar kõm̦m̦ane juon kõjota jidikdik ippãer. Aolep iiõ, jej aikuj l̦oore wãween in Jijej ear kõm̦m̦ane. Im ilo ad keememej raan in mej eo an, jen kõl̦mãnl̦o̦kjen̦ kõn joñan an Jijej im Jeova yokwe kõj armej.​—Riit Luk 22:19, 20; 1 Jon 4:9, 10, UBS.

Ilo naaj iiõ in, Kwõjkwõj in Keememej Raan in Mej eo an Jijej enaaj wal̦o̦k ilo M̦ande, Eprõl̦ 14 raan, ãlikin an tulo̦k al̦. Kwõj lukkuun ruwainene in itok ñan iien in eaorõk ilo naaj jikin eo me Ri Kõnnaan ro an Jeova renaaj kõm̦m̦ane kwõjkwõj in ie.​—Riit Rom 1:11, 12, UBS.