Kwõj ke keini am̦ jar? Elõñ armej rej jar. Ebar lõñ armej rejjab tõmak ilo Anij bõtab rej jar. Etke armej rej jar? Ekkar ñan juon etale me rar kõm̦m̦ane ilo aelõñ in Bũranij, jimattan in armej ro ilo aelõñ en̦ rej jar ak kõl̦mãnl̦o̦kjen̦ jet iien bwe en “em̦m̦anl̦o̦k aer mour.” Armej rein, ekoba elõñ armej ilo Europe, rej jar bõtab rejjab watõk bwe jar ej juon wãween kabuñ ñan Anij. Unin aer jar ej bwe en em̦m̦an aer mour. Bõtab, ebar wõr jet armej rej jar ñan Anij ilo iien ko wõt me rej aikuj jipañ. Armej rein rej kõtmãne bwe Anij en kajju uwaake jar ko aer.​—Aiseia 26:16.

Ak kwe? Kwõj ke l̦õmn̦ak bwe jar ej baj juon wãween ñan kõm̦m̦an bwe en em̦m̦an am̦ mour? El̦aññe kwõj tõmak ilo Anij, jar ko am̦ rej ke jipañ eok? Ke ta, kwõj ke m̦õk in jar im kwõj l̦õmn̦ak bwe Anij ejjab uwaake eok? Baibõl̦ emaroñ jipañ eok bwe kwõn kile aorõkin jar. Enaaj jipañ eok bwe kwõn kile bwe jar ejjab baj juon wãween ñan kõm̦m̦an bwe en em̦m̦an ad mour, ak ej juon men eaorõk me emaroñ jipañ kõj bwe jen epaake Anij.