«У ТӰНЯ» кусарымаште «орва» манын кусарыме грек мут тӱрлӧ орвам ончыктен кертеш (Ап. паш. 8:28, 29, 38). Но, очыни, эфиопийысе евнух тыгай орва дене каен, кудыжо военный але спортивный орва деч кугурак лийын. Тыге шонашлан икмыняр амалым ончалына.

Кугу еҥ лийше эфиопийысе евнух кужу корнышто лийын. «Тудо Кандакиян — Эфиопийысе ӱдырамаш кугыжан — полатыштыже кугу еҥ лийын» да «чыла погыжлан вуйын шоген» (Ап. паш. 8:27). Акрет годсо Эфиопийын территорийышкыже мемнан жапысе Египетын эн кечывалвел ужашыже да Судан пуреныт. Кугу корнышто евнухлан, очыни, тӱрлӧ транспорт дене каяш логалын, да тудын эше багажше лийын докан. Мемнан эран икымше курымышто пассажир-влакым кондыштарашлан леведышан да ныл колесан орва-влакым кучылтыныт. Теве мом Апостол-влакын пашашт книга нерген ик справочникыште ойлалтеш: «Тыгай орва шукырак арверым налаш, корным куштылгырак чыташ да, очыни, айдемылан кужурак корным эрташ полшен» a.

Эфиопийысе евнух лудын, кунам Филипп тудын дене мутланаш тӱҥалын. Библий палдара: «Филипп куржын миен да орваште шинчыше еҥын [евнухын] пророк Исаиян книгажым лудмо йӱкым колын» (Ап. паш. 8:30). Путешествийлан орва-влак вашке кудалыштын огытыл. Теве молан евнух корнышто лудын кертын, а Филипп тудым поктен шуын кертын.

Эфиопийысе евнух «Филиппым пеленже орвашке шинчаш йодын» (Ап. паш. 8:31). Спортивный таҥасымашлан орваште шогаш гына лиеш ыле, а путешествийлан орваште вер ситышын лийын. Сандене евнух ден Филипп пырля шинчен каен кертыныт.

Апостол-влакын пашашт книган 8 ужашым да исторический фактым шотыш налын, ме умыленна: эфиопийысе евнухын кайыме орваже военный але спортивный орва деч кугурак. Сандене пытартыш жапыште ме тудым вес семын сӱретлаш тӱҥалынна.